އާމްދަނީން ޓެކްސް ނެގުމުގެ ޤާނޫނުގެ ދަށުން މީރާއަށް ހުށަހަޅަންޖެހޭ އިންޓަރިމް ބަޔާން އޮންލައިންކޮށް ހުށަހެޅޭނެ

އަހަރަކު 10 މިލިއަން ރުފިޔާ ނުވަތަ އެއަށްވުރެ އިތުރަށް އާމްދަނީ ލިބޭ ފަރާތްތަކުން، ހުށަހަޅަންޖެހޭ އިންޓެރިމް ބަޔާން މިހާރު ހުށަހަޅަންޖެހޭނީ މީރާގެ އޮންލައިން ޕޯޓަލް "މީރާކަނެކްޓް” މެދުވެރިކޮށްކަމަށް އެ އޮތޯރިޓީން ހާމަކޮށްފިއެވެ.

މީރާއިން ވިދާޅުވީ އާމްދަނީން ޓެކްސް ނެގުމުގެ ޤާނޫނުގެ ދަށުން ރަޖިސްޓްރީކޮށްފައިވާ ފަރާތްތަކުގެ ތެރެއިން އަހަރަކު 30 މިލިއަން ރުފިޔާ ނުވަތަ އެއަށްވުރެ އިތުރަށް އާމްދަނީ ލިބޭ ފަރާތްތަކުން، އާމްދަނީން ޓެކްސް ނެގުމުގެ ޤާނޫނުގެ ދަށުން ދައްކަންޖެހޭ އިންޓަރިމް ޕޭމަންޓް ދައްކަންވާނީ މީރާ ކަނެކްޓް ނުވަތަ އެމް.އާރު.ޓީ.ޖީ.އެސް މެދުވެރިކޮށްކަމަށެވެ.

މީރާއިން ވަނީ ޓެކުހާގުޅޭ އިލްތިޒާމުތައް އޮންލައިންކޮށް އަދާކުރުން ލާޒިމުނުވާ ފަރާތްތަކުންވެސް، ކޯވިޑް-19އިން ރައްކާތެރިވުމުގެ ގޮތުން އިޖުތިމާޢީ ގައިދުރުކަން ދެމެހެއްޓުމަށްޓަކައި، ޓެކުހާގުޅޭ އެންމެހާ އިލްތިޒާމުތައް އޮންލައިންކޮށް އަދާކުރުމަށް އިލްތިމާސްކޮށްފައެވެ. މިދިޔަމަހުގެތެރޭ މީރާއިން ވަނީ އެ އޮތޯރިޓީން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމްވެސް ހަމަޖައްސާފައެވެ.

ޓެކުހުގެ އިތުރުން މީރާއަށް ބަލައިގަންނަމުންދާ އެހެނިހެން ފައިސާގެ ތެރެއިން އޮންލައިންކޮށް ބަލައިގަތުމުގެ އިންތިޒާމް ހަމަޖެހިފައިނުވާ ފައިސާވެސް މިހާރު އޮންލައިންކޮށް މީރާއަށް ދެއްކޭނެއެވެ. މިފަދަ ފައިސާ ބަލައިގަތުމަށް ހަމަޖެހިފައިވަނީ ޓެކްސް ފިޔަވައި އެހެނިހެން ފައިސާ ބަލައިގަތުމަށް ޙާއްސަކޮށްފައިވާ މީރާގެ "ވާރު ޕޭ" މެދުވެރިކޮށެވެ.

ވާރު ޕޭ މެދުވެރިކޮށް މީގެކުރިންވެސް ކުންފުނިތަކުގެ އަހަރީ ފީއާއި، އެއްގަމު އުޅަނދު އަދި ކަނޑު އުޅަނދުގެ އަހަރީ ފީއާއި، ޓްރެފިކްއާއި ގުޅޭގޮތުން ކުރާ ޖޫރިމަނާއާއި، މުދަލު ޒަކާތާއި މިނޫންވެސް ބައެއް ފައިސާ ދިޔައީ ބަލައިގަންނަމުންކަމަށް މީރާއިން ބުނެއެވެ.