ކޯވިޑް-19އާ ގުޅިގެން ވެލާނާ އިންޓަރނޭޝަނަލް އެއަރޕޯޓު ބަންދުކޮށްފައި އޮތުމަށްފަހު އަލުން ހުޅުވިތާ އެއްމަސްދުވަސްވީއިރު، އެއަރޕޯޓަށް ޖެއްސި އަދި ފުރި ފްލައިޓުތަކުގެ އަދަދަކީ 764 ކަމަށް އެމްއޭސީއެލުން ހާމަކޮށްފިއެވެ.
ވެލާނާ އިންޓަރނޭޝަނަލް އެއަރޕޯޓު، ވީއައިއޭ ހިންގާ އެމްއޭސީއެލުން ނެރެފައިވާ ތަފާސްހިސާބުތައް ދައްކާގޮތުން މިދިޔަ މަހުގެ 15 އިން މިމަހުގެ 15 އަށް ޖުމްލަ 764 އެއަރ ޓްރެފިކް މޫވްމަންޓު ވަނީ ރެކޯޑުކުރެވިފައެވެ. އެއަރ ޓްރެފިކް މޫވްމަންޓަކީ، އެއަރޕޯޓަށް ޖައްސާ ފްލައިޓުތަކުގެ އަދަދާއި އެއަރޕޯޓުން ފުރާފައިވާ ފްލައިޓުތަކުގެ އަދަދެވެ.
ޕީއެސްއެމް ނިއުސްއާ ވާހަކަދައްކަވަމުން މޯލްޑިވްސް އެއާޕޯޓް ކޮމްޕެނީ، އެމްއޭސީއެލްގެ ކޯރޕަރޭޓް ކޮމިއުނިކޭޝަންގެ ޖެނެރަލް މެނޭޖަރ ހަސަން އަރީފް ވިދާޅުވީ މީގެތެރޭގައި ހިމެނެނީ 399 ބައިނަލްއަޤްވާމީ އެއަރ ޓްރެފިކް މޫވްމަންޓާއި، 365 ރާއްޖޭގެ އެތެރޭގެ އެއަރ ޓްރެފިކް މޫވްމަންޓްކަމަށެވެ.
އެމްއޭސީއެލުން އާއްމުކޮށްފައިވާ ތަފާސްހިސާބުތައް ދައްކާގޮތުން ވީއައިއޭއަށް ޖައްސާފައިވާ ބައިނަލްއަޤްވާމީ ފްލައިޓުތަކުގައި 7،607 މީހުން ރާއްޖެއަށް އައިސްފައިވެއެވެ. އަދި 9،269 މީހުން ރާއްޖެއިން ފުރާފައިވެއެވެ. ރާއްޖޭގެ އެތެރޭގެ އުދުހުންތަކަށް ބާލާލާއިރު، ވީއާއިއޭއިން 3،480 މީހުން ރާއްޖޭގެ އެކި ހިސާބުތަކުން މާލެ ސަރަޙައްދަށް އައިސްފައިވެއެވެ. އަދި 4،323 ރާއްޖޭގެ އެކި ހިސާބުތަކަށް ފުރާފައިވެއެވެ.
ހަސަން އަރީފް ވިދާޅުވީ މިހާރު ރާއްޖެއަށް ޝެޑިއުލް ދަތުރުތައް ބާއްވަމުންދަނީ 4 އެއަރލައިނަކުން ކަމަށެވެ. އެހެން ނަމަވެސް ކުރިއަށް އޮތް ދުވަސްތަކުގައި އިތުރު އެއަރލައިންތަކުން ރާއްޖެއަށް ދަތުރުތައް ފެށުމަށް ޝައުގުވެރިކަން ފާޅުކޮށްފައިވާކަމަށް ހަސަން ވިދާޅުވިއެވެ.
"ފްލައިޓު މޫވްމަންޓްސް މިދިޔަ އަހަރާއި އަޅާ ބަލާއިރު ވަރަށް ދަށްކޮށް މިއުޅެނީ، އެހެން ނަމަވެސް ކުރިއަށް އޮތް ހައި ސީސަންގައި އިތުރު އެއަރލައިންތަކުން ރާއްޖެއަށް ދަތުރުތައް ފެށުމަށް ފައިލްކޮށްފައިވަނީ، އަދި ރާއްޖެއަށް މިހާރު އޮޕަރޭޓްކުރަމުންދާ އެއަރލައިންތަކުންވެސް ރާއްޖެއަށް ބާއްވާ ފްލައިޓުތަކުގެ ފްރީކުއެންސީ އިތުރުކުރުމަށް ފައިލްކޮށްފައިވަނީ، މިއާ އެކު ހެޔޮ ބަދަލުތަކެއް ފެންނާނެ ކަމަށް ލަފާކުރެވޭ،" ހަސަން ވިދާޅުވިއެވެ.
އެމްއޭސީއެލުން މީގެކުރިން ބުނެފައިވަނީ ރާއްޖޭގެ ބޯޑަރު ފަތުރުވެރިންނަށް އަލުން ހުޅުވާލިފަހުން މިމަހުގެ 9ވަނަ ދުވަހާއި ހަމައަށް ފަތުރުވެރިންނާއެކު ވީއައިއޭއަށް 30 ޕްރައިވެޓް ޖެޓު ޖައްސާފައިވާ ކަމަށެވެ.
އިމިގްރޭޝަންގެ ތަފާސްހިސާބުތައް ދައްކާގޮތުން ޖުލައި 15އިން އޮގަސްޓް 15ގެ ނިޔަލަށް ރާއްޖެ އައިސްފައިވަނީ 5177 ފަތުރުވެރިންނެވެ. މިއީ ޖުލައިމަހު ރާއްޖެ ޒިޔާރަތްކުރި 1701 ފަތުރުވެރިންނާއި މިހިނގާ އޮގަސްޓް މަހުގެ 15ގެ ނިޔަލަށް ރާއްޖެ ޒިޔާރަތްކުރި 3476 ފަތުރުވެރިންނެވެ.
އިމިގްރޭޝަންގެ މި ތަފާސްހިސާބުތަކަށް ބަލާއިރުވެސް ރާއްޖެއަށް އަންނަ ފަތުރުވެރިންގެ ޢަދަދު ދަނީ އިތުރުވަމުންނެވެ. އެގޮތުން ޖުލައިމަހާ އަޅާބަލާއިރު މިމަހުގެ މިހާތަނަށް ރާއްޖެ އައިސްފައިވާ ފަތުރުވެރިންގެ ޢަދަދު މިވަނީ އިތުރުވެފައެވެ.
އޮގަސްޓް މަހުގެ ފުރަތަމަ 15އަށް ބަލާއިރު އެންމެ ގިނަ ފަތުރުވެރިން އައިސްފައިވަނީ ޔޫއޭއީއިންނެވެ. އެއީ 504 ފަތުރުވެރިންނެވެ. ދެވަނައަށް އެންމެ ގިނަ ފަތުރުވެރިން އައި އިނގިރޭސިވިލާތުންނެވެ. އެއީ 421 ފަތުރުވެރިންނެވެ. 336 ފަތުރުވެރިންނާއިއެކު ތިން ވަނައަށް އެންމެ ގިނަ ފަތުރުވެރިން އައި އެމެރިކާއިންނެވެ.