ބީއެމްއެލްއިން 10 ހޮސްޕިޓަލަކަށް ޕަރސަނަލް ޕްރޮޓެކްޓިވް އިކުއިޕްމަންޓް, ޕީޕީއީ ހަދިޔާކޮށްފިއެވެ.
ބީއެމްއެލްއިން ބުނީ ކޯވިޑް-19އާ ގުޅިގެން ސިއްހީ ދާއިރާއަށް އެހީތެރިކަން ފޯރުކޮށްދިނުމަށްޓަކައި ބޭންކް އޮފް މޯލްޑިވްސް އިން 10 ހޮސްޕިޓަލަކަށް ފޭސް ޝީލްޑް ހަދިޔާކޮށްފައިވާ ކަމަށެވެ. އެގޮތުން ބީއެމްއެލުން ވަނީ 500 ފޭސް ޝީލްޑް ރާއްޖޭގެ އެކި ހިސާބުތަކުގައި ހިންގާ ހޮސްޕިޓަލްތަކަށް ހަދިޔާކޮށްފައެވެ.
ޕަރސަނަލް ޕްރޮޓެކްޓިވް އިކުއިޕްމަންޓް ހަދިޔާ ކޮށްފައިވާ ހޮސްޕިޓަލްތަކަކީ:
1.އައިޖީއެމްއެޗް
2.ހއ. އަތޮޅު ހޮސްޕިޓަލް (ހއ. ދިއްދޫ)
3.ކުޅުދުއްފުށީ ރީޖަނަލް ހޮސްޕިޓަލް
4.ނ. އަތޮޅު ހޮސްޕިޓަލް (ނ. މަނަދޫ)
5.އުނގޫފާރު ރީޖަނަލް ހޮސްޕިޓަލް
6.ވ. އަތޮޅު ހޮސްޕިޓަލް (ވ.ފެލިދޫ)
7.ފ. އަތޮޅު ހޮސްޕިޓަލް (ފ. ނިލަންދޫ)
8.ތ. އަތޮޅު ހޮސްޕިޓަލް (ތ. ވޭމަންޑޫ)
9.ގަން ރީޖަނަލް ހޮސްޕިޓަލް
10.ގއ. އަތޮޅު ހޮސްޕިޓަލް (ގއ. ވިލިނގިލި)
ބީއެމްއެލްއިން 10 ހޮސްޕިޓަލަކަށް ޕަރސަނަލް ޕްރޮޓެކްޓިވް އިކުއިޕްމަންޓް ހަދިޔާ ކުރުމާއި ގުޅޭގޮތުން ބީއެމްއެލްގެ މެނޭޖަރ ޕަބްލިކް ރިލޭޝަންސް މުހައްމަދު ސައީދު ވިދާޅުވީ ސިއްހީ ދާއިރާގެ ކުރީ ސަފުގައި މަސައްކަތް ކުރާ ފަރާތްތަކަށް ރައްކާތެރިކަން ކަށަވަރު ކުރުމަކީ މިވަގުތަށް އެންމެ މުހިންމު އެއްކަމެއްގެ ގޮތުގައި ދެކޭކަމަށެވެ.
" ސިއްހީ ދާއިރާގެ ބޭފުޅުންނަށް ސަލާމަތްތެރިކަން ހޯދުމަށް މިވަގުތު އެ ބޭފުޅުންނަށް ބޭނުންވާ އާލާތްތަކެއް ހަދިޔާކުރެވިގެންދާކަމީ ލިބޭ އުފަލެއްވެސްމެ އަދި މިފަދަ ދަނޑިވަޅެއްގައި ހާއްސަކޮށް އަތޮޅު ތެރޭގެ ބޮޑެތި ހުރިހާ ހޮސްޕިޓަލަކަށް މިފަދަ އާލާތްތަކެއް ފޯރުކޮށްދިނުމަކީވެސް ވަރަށް މުހިންމު އެހާމެ ބޭނުންތެރިކަމެއްވެސްމެ. " ސައީދު ވިދާޅުވިއެވެ.
ބީއެމްއެލް އިން ވަނީ ކޯވިޑް-19 އާ ގުޅިގެން ކަސްޓަމަރުންގެ ރައްކާތެރިކަމަށް ގިނަ ފިޔަވަޅުތަކެއް އަޅާފައެވެ. މިގޮތުން ގިނަ ހިދުމަތްތަކެއް އޮންލައިންކޮށް ލިބޭނެ މަގުފަހިކޮށް، އެޕޮއިންޓްމަންޓް އުސޫލުން ހިދުމަތް ދިނުމާއި، ޝޯޓް ޓަރމް ފައިނޭންސިންގ އެއް ތައާރަފް ކުރުމާއި، ޕަރސަނަލް، ހައުސިންގ އަދި ބިޒްނަސް ލޯނުތައް ފަސްކޮށްދިނުމާއި، ބޭންކް އޮފް މޯލްޑިވްސް މެދުވެރިކޮށް ނަގާފައިވާ ހުރިހާ ނެޝަނަލް ސްޓޫޑަންޓް ލޯނާއި އެޑިޔުކޭޝަނަލް އެސިސްޓަންސް ލޯނުތަކަށް ދައްކަންޖެހޭ މުއްދަތު ފަސްކޮށްދިނުމާއި، ސަރުކާރުގެ ކޮވިޑް-19 ރިކަވަރީ ސްކީމުގެ ދަށުން ބޭންކް އޮފް މޯލްޑިވްސް އިން ލޯނު ދޫކުރުން ހިމެނެއެވެ.