މިއަހަރުގެ ބާކީ އޮތް ދުވަސްތަކުގައި އެއްލައްކަ ވިހި ހާސް ފަތުރުވެރިން ރާއްޖެ އަންނާނެކަމަށް ލަފާކުރެވޭކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވީ ބޯޑަރު ހުޅުވާލުމާއެލު މިމަހުގެ ނިޔަލަށް 6000 ފަތުރުވެރިން އަންނާނެކަމަށް އަންދާޒާކޮށްފައިވާކަމަށެވެ. އަދި ކޯވިޑް-19ގެ ހާލަތު ރަނގަޅުވެއްޖެ ނަމަ މިއަހަރު ރާއްޖެ އަންނާނެ ފަތުރުވެރިންގެ އަދަދު އިތުރުވާނެކަމަށާއި ނަމަވެސް މިހާރުގެ ހާލަތަށް ބެލުމަށްފަހު މިއަހަރުގެ ބާކީ އޮތް ދުވަސްތަކުގައި އަންނާނެކަމަށް އަންދާޒާ ކުރެވޭނީ 1 ލައްކަ 20 ހާސް ފަތުރުވެރިންކަމަށް މިނިސްޓަރ ވިދާޅުވިއެވެ. އަދި މިހާރު ގެ ހާލަތު ރަނގަލުވެއްޖެނަމަ ފަސްލައްކައެއްހާ ފަތުރުވެރިން އަންނާނެކަމަށާއި ބެޑް ނައިޓްސް އުޅޭނީ މިދިޔަ އަހަރުގެ 50 އިންސައްތައާ ހަމައިގައިކަމަށްވެސް މިނިސްޓަރ ވިދާޅުވިއެވެ. އެހެންމަވެސް ފަތުރުވެރިންގެ އަދަދު މިދިޔަ އަހަރާ އަޅާބަލާއިރު 70 އިންސައްތަ މަދުވާނޭކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މީގެ ކުރިން ފަތުރުވެރިން ރާއްޖޭގައި ހޭދަކުރާ މުއްދަތު މަދު ނަމަވެސް މިހާރު ރާއްޖޭގައި ހޭދަކުރާ ދުވަސްތައް އިތުރުކަމަށާއި މުސްތަޤުބަލުގައިވެސް ފަތުރުވެރިން ރާއްޖޭގައި ހޭދަ ކުރާ ދުވަސްތައް އިތުރުވާނެކަމަށް އުއްމީދު ކުރައްވާކަމަށް މިނިސްޓަރ ވިދާޅުވިއެވެ. އެކަމުގެ ސަބަބުން ރިޒޯޓްތަކަށާއި، ސަފާރީތަކަށް އަދި ގެސްޓްހައުސްތަކުގެ އިތުރަށް ފަތުރުވެރިކަމުގެ ދާއިރާއާ ގުޅުން ހުރި އެހެނިހެން ދާއިރާތަކަށް ފައިދާވާނެކަމަށްވެސް ޓުއަރިޒމް މިނިސްޓަރ ވިދާޅުވިއެވެ.
"މިހާރު ހުންނަ ރޭޓުން އެއްލައްކަ ވިހާސް ޓުއަރިސްޓުން އަންނަ އިރު އޭގެ މާނައަކީ ދެލައްކަ ސާޅިސް ހާސް ޓުއަރިސްޓުންނޭ. އަޅުގަނޑުމެން އަންދާޒާ ކުރަނީ 14 ދުވަހަށް ތިބޭނެކަމަށް. ގެސްޓުން އަންނަ އަދަދާ ތިބޭ އަދަދަދުން މާ ބޮޑު މާނައެއް ނެތް. އަޅުގަނޑުމެން ބަލަންޖެހޭނީ ކިހާ ޑޮލަރެއް ޚަރަދުވޭތޯ." ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވިއެވެ.
ކޯވިޑް-19އާ ގުޅިގެން ރާއްޖޭގެ އިޤްތިޞާދު ވަނީ ދަށަށްގޮސްފައެވެ. އަދި ބޯޑަރު ހުޅުވާލިކަމުގައި ވީނަމަވެސް ދުނިޔޭގައި ފެތުރެމުންދާ މި ބަލިމަޑުކަމުގެ ސަބަބުން ރާއްޖެ އަންނަ ފަތުރުވެރިންގެ އަދަދުދެވެސް މަދުވާނޭކަމަށް ބައެއް ފަރާތްތަކުން ލަފާކުރެއެވެ. ޓުއަރިޒަމް މިނިސްޓަރ ވަނީ ރާއްޖެ އަންނަ ފަތުރުވެރިންގެ އަދަދު މަދުވިނަމަވެސް ފަތުރުވެރިކަމުގެ ދާއިރާއަށް ގެއްލުންވާ ވަރަށް އަގުތަށް ތިރި ނުކުރުމަށް އިލްތިމާސްކުރައްވާފައެވެ. އަދި މި ސިނާޢަތުގައި މަސައްކަތް ކުރާ މީހުން އެއްބަސްވެ، އަގުތައް އެއް ވަރެއްގައި ހިފެހެއްޓުމަށާއި އެތެރޭގެ ވާދަވެރިކަން މިދަނޑިވަޅުގައި ނުބޭއްވުމަށްވެސް މިނިސްޓަރ އިލްތިމާސްކުރެއްވިއެވެ.