ރާއްޖެއިން ޢުމުރާއަށް މީހުންގެ ގެންދިޔުމަށް ހުއްދަ ދީފައިވާ ކުންފުނިތަކުގެ ހުއްދައިގެ މުއްދަތު އިސްލާމިކް މިނިސްޓްރީން އިތުރުކޮށްދީފިއެވެ.
އިސްލާމިކް މިނިސްޓްރީން ވިދާޅުވީ މުއްދަތު އިތުރުކޮށްދީފައިވަނީ "ދިވެހިރާއްޖެއިން ޢުމުރާއަށް މީހުން ގެންދިޔުމާބެހޭ އުޞޫލު"ގެ ދަށުން 2 އަހަރުދުވަހަށް ހުއްދަ ދޫކޮށްފައިވާ ކުންފުނިތަކަކަށް ކަމަށެވެ. އެގޮތުން އެ ކުންފުނިތަކަށް ދީފައިވާ ހުއްދައިގެ މުއްދަތު ހަމަވާ ތާރީޚުން ފެށިގެން އެއް އަހަރުދުވަހަށް އިތުރުކޮށްދީފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
އެ ކުންފުނިތަކަށް ހުއްދައިގެ މުއްދަތު އިތުރުކޮށްދީފައިވަނީ ކޯވިޑް-19ގެ ސަބަބުން މިއަހަރުގެ މިހާހިސާބަށް އައިރުވެސް އެ ކުންފުނިތަކަށް ޢުމުރާ ދަތުރުތައް ކުރުމުގެ ފުރުޞަތު ލިބިފައިނުވާތީ ކަމަށް އިސްލާމިކް މިނިސްޓްރީން ވިދާޅުވެއެވެ. އެ މިިނިސްޓްރީން ވަނީ މިދިޔަ އަހަރުގެ ތެރޭ ޢުމްރާއަށް މީހުން ގެންދިޔުމުގެ ހުއްދަ 2 އަހަރުދުވަހަށް ކަނޑައަޅާ އުޞޫލެއް އެކުލަވާލާފައެވެ. މި އުޞުލާއެކު ޖުމުލަ 31 ކުންފުންޏަކަށް ޢުމުރާއަށް މީހުން ގެންދިޔުމުގެ ހުއްދަ ވަނީ ދޫކޮށްފައެވެ.
ދުނިޔޭގައި މިހާރު ފެތުރެމުންދާ ކޯވިޑް-19ގެ ސަބަބުން އުމުރާގެ އަޅުކަން އަދާކުރުމަށް ރާއްޖެއިން ފުރުޞަތު ލިބިފައިވަނީ ވަރަށް މަދުބަޔަކަށެވެ. އެހެންނަމަވެސް ސަޢުދީއާރައްބިއްޔާއިން މިހާރުވަނީ އަންނަ އަހަރު އެ ޤައުމުގެ ބޯޑަރުތައް ހުޅުވާލުމަށް ނިންމާފައެވެ. އަދި އެ ޤައުމުން މިހާރު އަންނަނީ މިއަހަރުގެ ޢުމުރާގެ ކަންކަމަށް ތައްޔާރުވަމުންނެވެ.