ރާއްޖެއިން ޢުމްރާއަށް މީހުން ގެންދިއުމަށް ޝައުޤުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުޞަތު ހުޅުވާލައިފިއެވެ.
އިސްލާމިކް މިނިސްޓްރީން ވިދާޅުވީ ރާއްޖެއިން މީހުން ޢުމްރާއަށް ގެންދިއުމަށްޓަކައި "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު" ގައިވާ ގޮތުގެ މަތީން އެކަމަށް އެދި ޕްރޮޕޯސަލް ހުށައެޅޭނެކަމަށެވެ. އެގޮތުން ޕްރޮޕޯސަލްފޮތް މިމަހުގެ 28 ވަނަ ދުވަހުން ފެށިގެން އަންނަ މަހުގެ 7 ވަނަ ދުވަހާ ހަމަޔަށް ބަންދު ނޫން ކޮންމެ ދުވަހަކު ހެނދުނު 9:00 އިން 12:00 އަށް ލިބެން ހުންނާނެކަމަށް މިނިސްޓްރީން ވިދާޅުވެއެވެ. ފްރޮޕޯސަލް ފޮތުގެ އަގަކީ 5000 ރުފިޔާއެވެ.
އިސްލާމިކް މިނިސްޓްރީން ވިދާޅުވީ ޕްރޮޕޯޒަލްތައް ބަލައިގަތުމަށް ހަމަޖެހިފައިވަނީ އަންނަ މަހުގެ 11 އިން 15 ވަނަ ދުވަހުގެ ނިޔަލަށް ކަމަށެވެ.
އިސްލާމިކް މިނިސްޓްރީން ދާދިފަހުން ވަނީ ރާއްޖެއިން ޢުމުރާއަށް މީހުންގެ ގެންދިޔުމަށް ހުއްދަ ދީފައިވާ ކުންފުނިތަކުގެ ހުއްދައިގެ މުއްދަތު އިތުރުވެސް ކޮށްދީފައެވެ.
އިސްލާމިކް މިނިސްޓްރީން ވިދާޅުވީ މުއްދަތު އިތުރުކޮށްދީފައިވަނީ "ދިވެހިރާއްޖެއިން ޢުމުރާއަށް މީހުން ގެންދިޔުމާބެހޭ އުޞޫލު"ގެ ދަށުން 2 އަހަރުދުވަހަށް ހުއްދަ ދޫކޮށްފައިވާ ކުންފުނިތަކަކަށެވެ. އެގޮތުން އެ ކުންފުނިތަކަށް ދީފައިވާ ހުއްދައިގެ މުއްދަތު ހަމަވާ ތާރީޚުން ފެށިގެން އެއް އަހަރުދުވަހަށް އިތުރުކޮށްދީފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
އެ މިނިސްޓްރީން ވަނީ މިދިޔަ އަހަރުގެ ތެރޭގައި ޢުމްރާއަށް މީހުން ގެންދިޔުމުގެ ހުއްދަ 2 އަހަރުދުވަހަށް ކުންފުނިތަކަށްދޭ އުޞޫލެއް އެކުލަވާލާފައެވެ. މި އުޞުލާއެކު ޖުމުލަ 31 ކުންފުންޏަކަށް ޢުމުރާއަށް މީހުން ގެންދިޔުމުގެ ހުއްދަ ވަނީ ދޫކޮށްފައެވެ.
ދުނިޔޭގައި މިހާރު ފެތުރެމުންދާ ކޯވިޑް-19ގެ ސަބަބުން އުމުރާގެ އަޅުކަން އަދާކުރުމަށް ރާއްޖެއިން ފުރުޞަތު ލިބިފައިވަނީ ވަރަށް މަދުބަޔަކަށެވެ. އެހެންނަމަވެސް ސަޢޫދީ އަރައްބިއްޔާއިން މިހާރުވަނީ އަންނަ އަހަރު އެ ޤައުމުގެ ބޯޑަރުތައް ހުޅުވާލުމަށް ނިންމާފައެވެ. އަދި އެ ޤައުމުން މިހާރު ދަނީ މިއަހަރުގެ ޢުމުރާގެ ކަންކަމަށް ތައްޔާރުވަމުންނެވެ.