"ކޯވިޑް ހުއްޓުވާނީ އަހަރެން - ރައްޔިތުންގެ ކެމްޕެއިން"ގެ ވީޑިއޯ އަދި ފޮޓޯ މުބާރާތުގެ މުއްދަތު އިތުރުކޮށްފި

ރާއްޖޭގެ މީޑިއާތައް ގުޅިގެން ހިންގާ "ކޯވިޑް ހުއްޓުވާނީ އަހަރެން" ޤައުމީ ކެމްޕޭނުގެ ދަށުން "ކޯވިޑް ހުއްޓުވާނީ އަހަރެން - ރައްޔިތުންގެ ކެމްޕެއިން" ގެ ނަމުގައި އާންމުންނަށް ބައިވެރިވެވޭ ގޮތަށް، ވީޑިއޯ އަދި ފޮޓޯ މުބާރާތުގައި ބައިވެރިވުމުގެ މުއްދަތު އިތުރުކޮށްފިއެވެ.

މި މުބާރަތުގައި ބައިވެރިވުމުގެ މުއްދަތު މިހާރު ވަނީ މިމަހުގެ 10ވަނަ ދުވަހުގެ އިރުއޮއްސި 6 ޖެހުމާ ހަމަޔަށް އިތުރުކޮށްދީފައެވެ.

އަގުހުރި ފައިސާގެ އިނާމު ހުށަހަޅާފައިވާ މި މުބަރާތުގައި ވީޑިއޯއާއި ފޮޓޯ ތައްޔާރު ކޮށް ފޮނުވަން ޖެހޭނީ "ކޯވިޑް ހުއްޓުވާނީ އަހަރެން" ކެމްޕޭނާ ގުޅޭގޮތުން އާންމު ހޭލުންތެރިކަން އިތުރުވާނެ ހިޔާލެއް ނުވަތަ މެސެޖެއް ދެވޭ ވީޑިއޯއާއި ފޮޓޯއެވެ.

ވީޑިއޯ މުބާރާތުގައި ބައިވެރިކުރާ ވީޑިއޯއެއްގެ ދިގުމިން 30 ސިކުންތަށް ވުރެ ދިގުވެގެން ނުވާނެކަމަށް "ކޯވިޑް ހުއްޓުވާނީ އަހަރެން" ގައުމީ ކެމްޕޭނުން ބުނެއެވެ. އަދި ވީޑިއޯގައި އޯޑިއޯ ވޮއިސް، ބެކްމިއުޒިކް ހިމަނާނަމަ، ހިމަނަންވާނީ ސާފުކޮށް އަޑުއަހަން ފަސޭހަ ވާނެ ގޮތަށްކަމަށާއި ހުރިހާ ވީޑިއޯއެއް ހުންނަން ވާނީ، mp4 ފޯމެޓްގައިކަމަށެވެ.

ފޮޓޯ މުބާރާތުގައި ހިމަނާ ފޮޓޯތަކުގައި، ތީމް އާ ގުޅޭ ގޮތުން ދޭ މެސެޖް، އަސަރު ސާފުވާން ވާނެކަމަށާއި ފޮޓޯތައް ހުންނަންވާނީ، JPG, JPEG ، PNG ފޯމެޓްގައެވެ.

ވީޑިއޯ އަދި ފޮޓޯ މުބާރާތުން ކުރެ ކޮންމެ މުބާރާތަކުން 1،2،3 ހޮވުމަށް ވަނީ ހަމަ ޖެހިފައެވެ. ވަނަވަނަ އަށް ދާނީ މުބާރާތް ނިމޭއިރު، އެންމެ ގިނަ ލައިކް އަދި ޝެއާ ލިބިފައި ހުންނަ ވީޑިއޯ އަދި ފޮޓޯއެވެ.

މި މުބާރާތުގައި 1ވަނަ ވީޑިއޯއަށް 15000 ރުފިޔާ ހުށައަޅާފައިވާއިރު 2ވަނަ އަަށް ދާ މީހަކަށް 10000 އަދި 3ވަނަ އަށް ވަނީ 7000 ރުފިޔާ ހުށައަޅާފައެވެ. 1ވަނަ ފޮޓޯ އަށް 10000 ރުފިޔާ ވަނީ ހުށައަޅާފައެވެ. އަދި 2ވަނަ ފޮޓޯއަށް 5000 ރުފިޔާ، 3ވަނަ ފޮޓޯ އަށް 3000 ރުފިޔާ ވަނީ ހުށައަޅާފައެވެ.

ވީޑިއޯ އަދި ފޮޓޯ މުބާރާތުގައި ބައިވެރި ކުރާ ތަކެތި މިމަހުގެ 30 ވާ ބުދަދުވަހުގެ އިރު އޮއްސި 6 އަށް ފޮނުވަން ވާނެއެވެ. ތަކެތި ފޮނުވާނީ 7231002 ޓެލެގްރާމް ނަންބަރަށެވެ.

ރާއްޖޭގެ މީޑިއާތައް ގުޅިގެން ހިންގާ "ކޯވިޑް ހުއްޓުވާނީ އަހަރެން" ގައުމީ ކެމްޕޭނުން ބުނީ އޮކްޓޯބަރު މަހުގެ 12ވަނަ ދުވަހު އެ ކެމްޕޭނުގެ ފޭސްކްބް ޕޭޖުގައި ޕޯސްޓްކޮށް ޝެއާ ކުރުމަށާއި ލައިކްސް ހޯދުމަށް އާންމުކޮށް ހުޅުވާލާނެކަމަށެވެ. މި މުބާރާތުގެ ދަށުން ޕޯސްޓު ކުރާ ވީޑިއޯ އަދި ފޮޓޯ ޝެއާކޮށް ލައިކް ހޯދުމަށް ހުޅުވާލައި ފުރުސަތު ބަންދުވާނީ އޮކްޓޯބަރު މަހުގެ 25ވަނަ ދުވަހުގެ އިރުއޮއްސި 6 ޖަހާއިރުއެވެ. މި މުބާރާތުގެ ނަތީޖާ ފާޅުކުރާނެ ދުވަހާއި ވަގުތު އެ ދުވަހު އިއުލާން ކުރުމަށް ވަނީ ހަމަޖެހިފައެވެ.