ރާއްޖޭގައި ކަނޑު އަޑީގެ ޑޭޓަރ ސެންޓަރެއް ޤާއިމުކުރުމުގެ ދޮރު ހުޅުވާލާފައިވާ ކަމަށް މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުޙައްމަދު މަލީހު ޖަމާލު ވިދާޅުވެއްޖެއެވެ.
މިނިސްޓަރ މަލީހު ވިދާޅުވީ މިކަން ކުރުމަށްޓަކައި ބައިނަލްއަޤްވާމީ ޓެލެކޮމިއުނިކޭޝަން ކުންފުނިތަކާއި، ޓެކްނޮލޮޖީ ކުންފުނިތަކަށް ދައުވަތު ދީފައިވާކަމަށެވެ.
ޖަޕާނުން ބޭއްވި ސައިންސް އެންޑް ޓެކްނޮލޮޖީ އިން ސޮސައިޓީ ފޯރަމްގައި ވާހަކަދައްކަވަމުން މިނިސްޓަރ މަލީހު ވިދާޅުވީ ރާއްޖޭގައި ބޭނުންކުރާ ސަބްމެރިން ކޭބަލްތަކުގެ ޑައިވަރސިޓީ އިތުރުކުރުމަށް މިހާރުވެސް މަސައްކަތް ކުރަމުން އަންނަކަމަށެވެ. ކަނޑުގެ މަގަށް ބަލާކަމުގައި ވާނަމަ ދިވެހިރާއްޖޭ އޮތީ އެންމެ މުހިއްމު ޝިޕިން ރޫޓްގައި ކަމަށާއި ރާއްޖޭގެ ކަނޑު އަޑީގެ ސީބެޑް ހުރިގޮތުން ކަނޑު އަޑީގައި ޑޭޓަރ ސެންޓަރުތަކެއް ގާއިމުކުރުމުގެ ރިސާޗް އަށް އެންމެ ކަމުދާ ގައުމަކީ ރާއްޖެކަމަށެވެ. އަދި މިހާރުވެސް ދިވެހިރާއްޖެއަކީ ކަނޑުއަޑީގެ ކޮޓަރިތަކާއި، ރެސްޓޯރެންޓުތައް ހުރި ޤައުމަކަށް ވެފައި ދިވެހިރާއްޖޭގައި ކަނޑު އަޑީގެ ޑޭޓަރ ސެންޓަރެއް ޤާއިމުކުރުމުގެ ދޮރު ވަނީ ހުޅުވާލެވިފައި ކަމަށް މިނިސްޓަރ ވިދާޅުވިއެވެ.
"ޓެކްނޮލޮޖީ އާއި އިންޓަރނެޓުން ލިއްބައިދޭ ފައިދާ ބޮޑު ކަމުގައި ވީ ނަމަވެސް މީގެ ސަބަބުން މުޖުތަމައުގެ ރައްޔިތުންގެ ދިރިއުޅުމުގެ ވައްޓަފާޅިއަށް ބަދަލުތައް އައިސްފައިވޭ. އެހެންކަމުން ޑިޖިޓަލް ޑިވެލޮޕްމަންޓްގައި ސޯޝަލް ސައިންސްގެ ދައުރު އިތުރަށް ފުޅާ ކުރަންޖެހިފައިވޭ. މިގޮތުން ޖަޕާނުގެ އިސްނެގުމެއްކަމުގައިވާ ސޮސައިޓީ 5.0 އަކީ މިނިސްޓަރ ތަރުހީބުދޭ ސޯޝަލް މޮޑެލް އެއް." މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލަކީ މުޙައްމަދު މަލީހު ޖަމާލު ވިދާޅުވިއެވެ.
މި ބައްދަލުވުމުގައި މިނިސްޓަރ ވަނީ ކޯވިޑް-19އަކީ މިވަގުތު ދުނިޔެއަށް ކުރިމަތިވެފައިވާ އެންމެ ބޮޑު ކާރިސާ ކަމުގައި ވީ ނަމަވެސް ދިވެހިރާއްޖެއަށް ބަލާނަމަ މޫސުމަށް އަންނަ ބަދަލުތަކަކީ އެންމެ ބޮޑު މައްސަލަކަމުގައި ފާހަގަކުރައްވާފައެވެ. މީގެ އިތުރުން ކާބޯތަކެތީގެ ރައްކާތެރިކަމާއި، ތިމާވެއްޓާއި ރައްޓެހި ހަކަތަ އަކީ މި ކުދި ޖަޒިރާ ޤައުމުގެ މުސްތަގުބަލަށް ވަރަށް މުހިއްމު އެއްޗެތިކަން ފާހަގަކުރެއްވިއެވެ. މިނިސްޓަރ ވިދާޅުވީ ސައިންސް، ޓެކްނޮލޮޖީ އާއި އިނޮވޭޝަންގެ އެހީގައި މި ހައްލުތައް ހޯދިދާނެކަމަށެވެ. އަދި ކޯވިޑް-19ގެ މި ކާރިސާއިން ރިސާޗް އެންޑް ޑިވެލޮޕްމަންޓް ބައިނަލްއަގުވާމީ ފެންވަރެއްގައި ކުރިއަށް ގެންދިއުމުގެ މުހިއްމު ކަމާއި، އިންޓަރނެޓްގެ މުހިއްމު ކަން އިތުރަށް ފާހަގަވެގެންދިޔަ ކަމަށެވެ.
ޖަޕާނުގެ ފަރާތުން ބޭއްވި ސައިންސް އެންޑް ޓެކްނޮލޮޖީ އިން ސޮސައިޓީ، އެސްޓީއެސް ފޯރަމަކީ ކޯވިޑް-19ގެ މި ހާލަތުގައި ސައިންސާއި ޓެކްނޮލޮޖީ އަދާކުރާ ދައުރަކީ ކޮބައިކަން މަޝްވަރާކުރެއްވުމަށް ބޭއްވި ބައްދަލުވުމެކެވެ.
މި ބައްދަލުވުމުގައި ޖަޕާނުގެ މިނިސްޓަރ އޮފް ސްޓޭޓް ފޮރ ސައިންސް އެންޑް ޓެކްނޮލޮޖީ އިނޯ ޝިންޖީގެ އިތުރުން 49 ޤައުމެއްގެ ސައިންސް އެންޑް ޓެކްނޮލޮޖީ އާއި ބެހޭ އިސްވެރިން ބައިވެރިވެވަޑައިގެންނެވިއެވެ.
އެސް.ޓީ.އެސް ފޯރަމް އުފެދިގެންދިޔައީ ނޮވެންބަރު 2004ވަނަ އަހަރުއެވެ. 2004ވަނަ އަހަރުންފެށިގެން ކޮންމެ އަހަރެއްގައި ޖަޕާނުގެ ކިޔޯޓޯގައި އެސް.ޓީ.އެސް ފޯރަމް އަންނަނީ ބާއްވަމުންނެވެ. މި ފޯރަމަކީ ސައިންސާއި ޓެކްނޮލޮޖީގެ އެހީގައި އިންސާނުންގެ ދިރއުޅުން ފަސޭހަ ކުރުމަށް ކުރެވޭނެ ކަންތައްތަކާއި، ދާއިރާއަށް ހުރި ގޮންޖެހުންތަކާއި، ގޮންޖެހުންތަކުން އަރައިގަތުމަށް ކުރެވޭނެ ކަންތައްތަކާއި ބެހޭގޮތުން މަޝްވަރާކުރުމަށް ދުނިޔޭގެ އެކި ކަންކޮޅުތަކުގެ ސައިންސާއި ޓެކްނޮލޮޖީގެ ދާއިރާގެ ލީޑަރުންގެ މެދުގައި ބާއްވާ ބައްދަލުވުމެކެވެ.