މިމަހުގެ 1 ދުވަހު ގެއްލިގެން ހޯދަމުން ދިޔަ ޝިރުމީނާ އަބޫބަކުރު ރަހީނުކުރިކަމަށް ބެލެވޭ މައްސަލާގައި ކުޑަކުއްޖަކު ހައްޔަރުކޮށްފިއެވެ.
ފުލުހުން ވިދާޅުވީ މި މައްސަލަ އާއި ގުޅިގެން ކޯޓު އަމުރެއްގެ ދަށުން 18 ނުފުރޭ ކުއްޖަކު އިއްޔެ ހައްޔަރުކޮށްފައިވާކަމަށެވެ.
އަދި މިމައްސަލައިގައި މިމަހުގެ 3 ވަނަ ދުވަހު ހައްޔަރު ކުރި އުމުރުން 31 އަހަރުގެ މީހާގެ ބަންދުގެ މުއްދަތު އިއްޔެ ދެވަނަ ފަހަރަށް އިތުރުކޮށްފައި ވާކަމަށެވެ. އެގޮތުން އެމީހާގެ ބަންދަށް 15 ދުވަސް ޖަހާފައިވާކަމަށް ފުލުހުން ވިދާޅުވެއެވެ.
މިމަހުގެ 1ވަނަ ދުވަހު ޝިރުމީނާ ގެއްލިގެން ހޯދަމުންދަނިކޮށް އޭނާ ވަނީ މިމަހުގެ 2ވަނަ ދުވަހު އަމިއްލައަށް ގެޔަށްގޮސްފައެވެ. ޢުމުރުން 33 އަހަރުގެ ޝިރުމީނާ އަބޫބަކުރު ގެއްލިގެން ފުލުހުން އޭނާ ހޯދަންފެށީ މިމަހުގެ 1 ވަނަ ދުވަހު މެންދުރުންފަހުން ފެށިގެން އޭނާގެ ޚަބަރެއް ނުވެގެން ރިޕޯޓު ކުރުމުންނެވެ.
ފުލުހުން ވިދާޅުވީ ބަޔަކު މީހުން ޝިރުމީނާ ރަހީނުކޮށް އޭނާ އާއި މެދު އަނިޔާވެރި އަމަލުތަކެއް ހިނގާފައިވާކަމަށް ބެލެވޭކަމަށެވެ. އަދި އޭނާއަށް އަނިޔާކޮށް ބްލެކްމެއިލްކޮށްގެން ގިނަ އަދަދެއްގެ ފައިސާ އަތުލާފައިވާކަމަށް ބެލެވޭތީ އެ މައްސަލަ ތަހުޤީގުކުރަމުން އަންނަކަމަށްވެސް ފުލުހުން ވިދާޅުވިއެވެ.