މީހުން ދިރިއުޅޭ ރަށްރަށުގެ 100 އަށްވުރެ ގިނަ ގެސްޓް ހައުސް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ.
މީހުން ދިރިއުޅޭ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީންދީފައި ވަނީ އޮކްޓޯބަރުމަހުގެ 15 ވަނަ ދުވަހުއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 19 ވަނަ ދުވަހުގެ ނިޔަލަށް މީހުން ދިރިއުޅޭ 24 ރަށެއްގެ 102 ގެސްޓްހައުސްއެއް ހުޅުވުމުގެ ހުއްދަ ވަނީ ދީފައެވެ. މި 102 ގެސްޓްހައުސާއިއެކު ގެސްޓް ހައުސް ސިނާއަތުގައި މިވަގުތު ރާއްޖޭގައި ފަތުރުވެރިންނަށް ޚިދުމަތްދެމުންދާ އެނދުގެ އަދަދަކީ 2132 އެކެވެ. އަދި މިއީ މުޅި ޖުމްލަ 1066 ކޮޓަރިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.
ފަތުރުވެރިންނަށް ޙިދުމަތްދިނުމުގެ ހުއްދަ މިވަގުތު ދީފައިވާ ރަށްރަށުގެ ތެރޭގައި ހިމެނެނީ:
ކ. ހުރާ
ކ. މާފުށި
ކ. ގުރައިދޫ
ކ. ހިންމަފުށި
ކ. ގުޅި
ކ. ތުލުސްދޫ
ކ. ގާފަރު
ބ. ކަމަދޫ
އއ. މަތިވެރި
އއ. އުކުޅަސް
އއ. ތޮއްޑޫ
އއ. ރަސްދޫ
އދ. ދިގުރަށް
އދ. އޮމަދޫ
ވ. ފުލިދޫ
ވ. ތިނަދޫ
ވ. ކެޔޮދޫ
ބ. ދަރަވަންދޫ
ބ. ކިނޮޅަސް
ބ. ކަމަދޫ
ނ. ފޮއްދޫ
ޏ. ފުވައްމުލައް
އައްޑޫ ސިޓީ، ފޭދޫ
އައްޑޫ ސިޓީ، މަރަދޫ ފޭދޫ
އަތޮޅުތެރޭގެ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދިންނަމަވެސް މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ އަދި ދީފައެއްނުވެއެވެ. ސަބަބަކީ މާލެ ސަރަހައްދުގައި ކޯވިޑް19 ފެތުރޭ މިންވަރު އަދިވެސް ދަށްނުވުމެވެ. އެންމެންގެ އެއްބާރުލުމާއިއެކު މާލެ ސަރަހައްދުގައި ކޯވިޑްގެ ނަންބަރުތައް ދަށްކޮށްދިނުމަށް ޓޫރިޒަމް މިނިސްޓަރ ވަނީ އެދިވަޑައިގެންފައެވެ.
މީހުން ދިރިއުޅޭ ރަށްރަށުގެ ގެސްޓް ހައުސްތައް އަލުން ހުޅުވުމަށް މިނިސްޓްރީން ހުއްދަދޭއިރު އެންމެ ފުރަތަމަ ކަމެއްގެ ގޮތުގައި ބަލާނީ ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަކޮށްފައި ވޭތޯއެވެ. އެގޮތުން ކަރަންޓީނާއި، އައިސޮލޭޝަންގެ އިންތިޒާމްތަކާއި، ޞިއްޙީގޮތުން ފުރިހަމަކުރަންޖެހޭ ކަންކަން ފުރިހަމަކޮށްފައިވާކަން އެ ރަށެއްގެ ކައުންސިލުން މިނިސްޓްރީއަށް ކަށަވަރުކޮށްދޭންޖެހެއެވެ. އަދި އަލުން ގެސްޓްހައުސްތައް ހުޅުވާލުމުގެ އެއްވެސް އިއުތިރާޒެއްނެތްކަން ކައުންސިލުން ހާމަކުރަންޖެހެއެވެ. ކައުންސިލްތަކުގެ ހުއްދަ ނުލިބިގެން މިހާރުވެސް ބައެއް ރަށްރަށުގެ ގެސްޓްހައުސްތައް ނުހުޅުވިގެން އެކަމުގެ ކަންބޮޑުވުން ބައެއް ގެސްޓްހައުސްތަކުގެ ވެރިން ވަނީ ފާޅުކޮށްފައެވެ.
ލޯކަލް ޓޫރިޒަމްގެ ޚިދުމަތްދޭ ރަށްރަށުގައި ގެއިން ބޭރުގަޔާއި، އާއްމު ތަންތަނުގައި އުޅޭއިރު، މާސްކް އެޅުމަށް އެޗް.ޕީ.އޭއިން ވަނީ އަންގަވާފައެވެ.