ހުޅުމާލޭ ދެވަނަ ފިޔަވަހީގެ ދަށުން، ޤާއިމުކުރާ ޔޮޓް މެރީނާ އަދި ކްރޫޒް ޓަރމިނަލް ތަރައްޤީކުރުމަށް ޝައުޤުވެރިވާ ފަރާތްތަކުން އެކަމަށް އެދި ހުށައެޅުމަށް އެޗްޑީސީން ހުޅުވާލައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ކުރި އިޢުލާނެއްގައި ބުނީ މިކަމަށް ޝައުގުވެރިވާ ފަރާތްތަކަށް ފުރުސަތު ހުޅުވާލާފައިވަނީ ވީހާވެސް ގިނަ ފަރާތްތަކަށް ހަމަހަމަކަމާއިއެކު ފުރުސަތު ހުޅުވާލުމުގެ ބޭނުމުގައިކަމަށެވެ. އަދި މިމަހުގެ 16 ވަނަ ދުވަހުގެ ކުރިން ޝައުޤުވެރިވާ ފަރާތްތަކަށް ފުރުސަތު އޮންނާނެކަމަށް އެޗްޑީސީން ބުނެއެވެ.
އެޗްޑީސީން ބުނީ އިންވެސްޓް ކުރުމުގެ ގައިޑްލައިން އެޗްޑީސީގެ ވެބްސައިޓުން މިހާރު ލިބެން ހުންނާނެކަމަށެވެ.
ހުޅުމާލޭގައި ޔޮޓް މެރީނާ އަދި ކްރޫޒް ޓަރމިނަލް ތަރައްޤީކުރުމަށް ހަމަޖެހިފައިވާ ބިން މިހާރު ވަނީ ހިއްކާފައެވެ. ހުޅުމާލޭގައި ޤާއިމުކުރާ ޔޮޓް މެރީނާ އަދި ކްރޫޒް ޓަރމިނަލް ހެދުމަށް ގާތްގަނޑަކަށް 15 ހެކްޓަރުގެ ބިން ތަރައްޤީކުރެވިގެންދާނެ ކަމަށް އެޗް.ޑީ.ސީން ބުނެއެވެ.
ހުޅުމާލޭގައި ހެދުމަށް ހަމަޖެހިފައިވާ ޔޮޓް މެރީނާ އަދި ކްރޫޒް ޓަރމިނަލް ތަރައްޤީކުރާނީ ބައިނަލްއަޤުވާމީ ފެންވަރުގައިވެސް މިފަދަ ޚިދުމަތްތައް ދޭ މިންގަނޑުތަކާއި އުޞޫލުތަކާ އެއްގޮތައްކަމަށް އެ ކުންފުނިން ވަނީ ބުނެފައެވެ. އަދި ޖިއޮގްރަފީގެ ގޮތުން ބަލާނަމަވެސް، ޔޮޓް މެރީނާ ތަރައްޤީކުރެވިގެންދާ ސަރަޙައްދަކީ އެކަމަށް އެންމެ އެކަށީގެންވާ ސަރަޙައްދުކަމަށްވެސް އެޗްޑީސީން ބުނެއެވެ.
މިތަން ތަރައްޤީކުރާ ސަރަޙައްދަކީ ދުނިޔޭގެ ނިސްބަތުންވެސް ގިނަ އަދަދެއްގެ ސުޕަރ ޔޮޓްތަކާއި، ބޮޑެތި ޕަސެންޖަރ ލައިންތައް މިހާރުވެސް ދަތުރުކުރާ ސަރަޙައްދެއްކަމުން މިފަދަ ޚިދުމަތެއް ތަޢާރަފުވެގެން ދިޔުމާއެކު، ރާއްޖޭގެ ފަތުރުވެރިކަމަށްވެސް އެކަމުގެ ސަބަބުން ހެޔޮ ބަދަލުތަކެއް އަންނާނެއެވެ.