މިއަހަރު ރާއްޖެ ޒިޔާރަތްކުރި 5 ލައްކަވަނަ ފަތުރުވެރިޔާއަށް ހޫނު މަރުހަބާއެއް ކިޔައިފިއެވެ.
މިއަހަރު ރާއްޖެ އައި 5 ލައްކަވަނަ ފަތުރުވެރިޔާ އަކީ ޖަރުމަނަވިލާތުން ރާއްޖެ ޒިޔާރަތްކުރި ކިއަރސްޓަން މެޑަލިން ނިޓްކަ ނަމަކަށް ކިޔާ އަންހެނެކެވެ. އޭނާ ރާއްޖެ އައިސްފައިވަނީ އެމިރޭޓްސްގެ ފްލައިޓެއްގައި މިއަދު ހެނދުނު 11:05 ހާއިރުއެވެ.
ރާއްޖެ އައި 5 ލައްކަވަނަ ފަތުރުވެރިޔާއަކީ އަންހެނަކަށް ވާއިރު ބޯޑަރު ހުޅުވާލި ފަހުން ރާއްޖެއައި 1 ލައްކަވަނަ ފަތުރުވެރިޔާ އަކީވެސް އަންހެނެއްކަން ފާހަގަކޮށްލެވެއެވެ.
މިއަހަރުގެ 5 ލައްކަ ވަނަ ފަތުރުވެރިޔާ މިއަދު ރާއްޖެ އައިއިރު އެމްއެމްޕީއާރުސީން ވަނީ އެ ފަތުރުވެރިޔާއަށް ހޫނު މަރުޚަބާއެއް ކިޔުމަށް ހާއްސަ ކަންތައްތަކެއް އެއަރޕޯޓުގައި ކުރިއަށްގެންގޮސްފައެވެ. އެގޮތުން ސަގާފީ ހަރަކާތްތަކަކާއެކު ފަތުރުވެރިޔާއަށް ވަނީ ހޫނު މަރުހަބާއެއް ކިޔާފައެވެ. މީގެއިތުރުން ޓުއަރިޒަމް މިނިސްޓްރީ، އެމްއެމްޕީއާރުސީ، އެމްއޭސީއެލް އަދި މޯލްޑިވްސް އިމިގްރޭޝަނުން ވަނީ އޭނާއަށް ޚާއްސަ ހަދިޔާތަކެއްވެސް ދީފައެވެ.
މިއަހަރުގެ 5 ލައްކަވަނަ ފަތުރުވެރިޔާ މިއަދު ރާއްޖެ އައިއިރު ކުރިން ލަފާކުރި ގޮތުން 5 ލައްކަވަނަ ފަތުުރުވެރިޔާ އަންނާނެކަމަށް ކުރިން ލަފާކުރީ މިމަހުގެ 19 ވަނަ ދުވަހުއެވެ. ނަމަވެސް ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު އިތުރުވެ، ސަރުކާރުން ކަނޑައެޅި އަމާޒަށް އޭގެކުރިން ވާސިލުވާނެކަމަށް ޓުއަރިޒަމް މިނިސްޓްރީން ވަނީ މީގެކުރިން ވިދާޅުވެފައެވެ.
ކޯވިޑްއާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު ޖުލައިމަހުގެ 15 ވަނަ ދުވަހު ބޯޑަރު ހުޅުވާލިފަހުން މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު 1 ލައްކައަށް އަރާފައިވާއިރު، އެ އަމާޒަށްވެސް ކުރިން ލަފާކުރި ދުވަހަށްވުރެ ކުރިން ވަނީ ވާސިލުވެފައެވެ.
ޓޫރިޒަމް މިނިސްޓްރީން ވިދާޅުވީ، މިއަހަރު 525000 ފަތުރުވެރިން ރާއްޖެ ޒިޔާރަތްކުރާނެކަމަށް މިހާރު އަންދާޒާކުރެވޭކަމަށެވެ. އަދި އަންނަ އަހަރު 1.5 މިލިއަން ފަތުރުވެރިން ރާއްޖެ އަންނާނެކަމަށް މިހާރު އެ މިނިސްޓްރީން ވަނީ ލަފާކޮށްފައެވެ. މީގެއިތުރުން އަންނަ އަހަރުގެ ތެރޭގައި 10 މިލިއަނަށްވުރެ ބެޑް ނައިޓްސް އިތުރުވާނެކަމަށްވެސް އެ މިނިސްޓްރީން ވަނީ އަންދާޒާކޮށްފައެވެ.
ރާއްޖެ ޒިޔާރަތްކުރާ ފަތުރުވެރިންގެ އަދަދު ދުވަހަކަށްވުރެ ދުވަހެއް އިތުރުވަމުން އަންނައިރު، ސަރުކާރުން ދަނީ ރާއްޖޭގެ ފަތުރުވެރިކަން ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އަދި އެމަސައްކަތްތަކާއެކު ފަތުރުވެރިކަމާ ގުޅޭ ބައިނަލްއަޤްވާމީ ގިނަ އެވޯޑްތަކެއްވެސް ރާއްޖެއަށް ދަނީ ލިބެމުންނެވެ. އެގޮތުން ވޯލްޑް ޓްރެވަލް އެވޯޑްސްގެ "ވޯލްޑް ލީޑިންގ ޑެސްޓިނޭޝަން"ގެ އެވޯޑާއި، ސައުތު އެޝިއަން ޓްރެވަލް އެވޯޑްސްގެ 19 އެވޯޑެއް ވަނީ ރާއްޖެއަށް ލިބިފައެވެ.