މާލެ ސަރަޙައްދުގައި ބަހުގެ ޚިދުމަތް މިއަދާ ހަމައަށް ދެމުން އައިސްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އާއި އެމްޕީއެލްއިންނެވެ. ދެ ކުންފުންޏަކުން ވަކިވަކިން ޚިދުމަތް ދެމުން އަންނައިރު އާއްމުންނަށް ދަތިތަކާ ކުރިމަތިލާން ޖެހޭކަމުގެ ޝަކުވާ މަދުންނަމަވެސް އަންނަނީ ފެންމަތިވަމުންނެވެ. މި މައްސަލައަށް ހައްލެއް ހޯދުމަށާއި އެމްޓީސީސީއަކީ ދަތުރުފަތުރުގެ ޚިދުމަތްތައް ދިނުމަށް ޚާއްސަ ކުންފުންޏަކަށް ވުމުން މާލެ ސަރަޙައްދުގެ ބަހުގެ ޚިދުމަތް ދިނުމަށް އެ ކުންފުންޏާ ހަވާލު ކުރުމުގެ ވިސްނުން އެބަހުރިކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހް ވަނީ ހާމަކުރައްވާފައެވެ.
ސިނާމާލެ ބްރިޖް އާއެކު މާލެއާއި ހުޅުމާލެ އާ ދެމެދު ކޮންމެ ދުވަހަކު ދަތުރުކުރާ މީހުންގެން އަދަދުވަނީ އިތުރުވެ މިދެމެދު ބަހުގައި ދަތުރުކުރާ މީހުންގެ އަދަދުވެސް ވަނީ އިތުރުވެފައެވެ. ސްކޫލަށް ދާ ދަރިވަރުންނާއި ވަޒީފާތަކަށް ދާ މީހުންގެ އިތުރުން ދަތުރުދާ ފަރާތްތަކުންވެސް ބަހުގެ ޚިދުމަތް ހޯދަމުން ގެންދެއެވެ.
މާލެއާއި ހުޅުމާލެއާ ދެމެދު ބަހުގެ ޚިދުމަތް ދެމުން އަންނަނީ މޯލްޑިވްސް ޕޯޓްސް ލިމިޑެޓުންނެވެ. އަދި ހުޅުމާލޭގެ އެތެރޭގައި ބަހުގެ ޚިދުމަތް ދެމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީންނެވެ. މިދެކުންފުނިން ބަހުގެ ޚިދުމަތް މިހާރު ދެމުން އަންނައިރު މިސަރުކާރުގެ ވިސްނުން ހުރީ މިސަރަޙައްދުގެ ބަހުގެ ޚިދުމަތް އެމް.ޓީ.ސީ.ސީ.އާ ޙަވާލުކޮށްގެން ކުރިއަށް ގެންދިއުމަށް ކަމަށް ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙް މިވަނީ ހާމަކުރައްވާފައެވެ.
އެމް.ޓީ.ސީ.ސީ.އަށް 40 އަހަރު ފުރުމުގެ މުނާސަބަތާއި ގުޅުވައިގެން ގެނެސްދިން "ކާމިޔާބު 40" ޓީވީ ޕްރޮގްރާމްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވީ މާލެ ސަރަޙައްދުގެ އެއްގަމު ދަތުރުފަތުރުގެ ޚިދުމަތަށް ހެޔޮ ބަދަލުތަކެއް އަންނަންޖެހޭ ކަމަށެވެ. އެގޮތުން މިސަރަޙައްދުގެ ބަހުގެ ޚިދުމަތް އެމް.ޓީ.ސީ.ސީ.އާ ޙަވާލުކުރުމާ ބެހޭ ގޮތުން މިހާރު މަޝްވަރާތައް ކުރިއަށްދާ ކަމަށްވެސް އެމަނިކުފާނު ވިދާޅުވިއެވެ. އަދި މިމަޝްވަރާތައް ނިމި، މިފެށޭ އަހަރުގެ ކުރީކޮޅު އެމް.ޓީ.ސީ.ސީ.ން އެމަސައްކަތާ ޙަވާލުވެ އިތުބާރު ހުރި ރަނގަޅު ޚިދުމަތްތަކެއް ދޭން ފަށާނެ ކަމަށް އުއްމީދުކުރައްވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މާލެ ސަރަޙައްދުގެ ބަހުގެ ޚިދުމަތް އެމްޓީސީސީއަށް ބަދަލުކުރައްވާނެ ކަމަށް ޓްރާންސްޕޯޓް މިނިސްޓަރވެސް މީގެ ކުރިން ވަނީ ވިދާޅުވެފައެވެ. އަދި މާލޭގައި މިނީ ބަހުގެ ޚިދުމަތް ދިނުމަށްވެސް ހަވާލުކޮށްފައިވަނީ އެމްޓީސީއަށެވެ. އެމްޓީސީސީން މާލެ ސަރަޙައްދުގައި ބަހުގެ ޚިދުމަތް ދެމުން އަންނައިރު އެކުންފުނިން އަންނަނީ އަތޮޅުތަކުގައިވެސް ބަހުގެ ޚިދުމަތް ފޯރުކޮށްދެމުންނެވެ. އެގޮތުން ހދ. ކުޅުދުއްފުއްޓާއި ގދ. ތިނަދޫގައި، ސްކޫލް ބަހާއި، އާއްމު ބަސްދަތުރުގެ ޚިދުމަތް ދިނުމަށް، ސަރުކާރުން ޙަވާލުކުރައްވާފައިވަނީ އެމްޓީސީސީއަށެވެ.
މާލެ ސަރަޙައްދުގައި ބަހުގެ ޚިދުމަތްތައް ފޯރުކޮށްދިނުމަށްޓަކައި ޑަބަލްޑެކް ބަހާއި ސިންގަލް ޑެކް ބަސް އަންނަނީ ބޭނުންކުރަމުންނެވެ. އަދި ބަހުގެ ޚިދުމަތް ރައްޔިތުންނަށް އެންމެ ރަނގަޅު ފެންވަރެއްގައި ފޯރުކޮށްދިނުމަށްޓަކައި މާލެއާއި ހުޅުމާލޭގެ އެކި ސަރަޙައްދުތަކުގައި ބަސްސްޓޮޕްތައްވެސް ވަނީ ހަދާފައެވެ.