ރާއްޖެއަށް މިހާރު ބައިނަލްއަޤްވާމީ 26 އެއަރލައިންއަކުންދަނީ ދަތުރުތައް ބާއްވަމުންކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ އެންެމެ ފަހުގެ 'މޯލްޑިވްސް ޓޫރިޒަމް އަޕްޑޭޓްސް' ރިޕޯޓުގައިވާގޮތުން މި ދަތުރުތަކާއެކު ރާއްޖެއާއި ދުނިޔޭގެ އެކި ހިސާބުތަކާއި ވަނީ ގުޅާލެވިފައެވެ.
ކޯވިޑް19 ގެ ސަބަބުން ރާއްޖޭގެ ބޯޑަރު ބަންދުކޮށްފައިވަނީ މާރޗް މަހުގެ ތެރޭގައެވެ. އަދި އަލުން ބޯޑަރު ހުޅުވާލީ ޖުލައި 15 ވަނަ ދުވަހުއެވެ. ބޯޑަރުތައް ހުޅުވާލުމާއެކު ރާއްޖެއަށް ދަތުރުތައް ފަށަމުންދާ އެއަރލައިންތައް ދަނީ އިތުރުވަމުންނެވެ. އަދި މީގެއިތުރުން ރާއްޖެއަށް ދަތުރުތައް ފަށާފައިވާ އެއަރލައިންތަކުންވެސް ވަނީ ފަތުރުވެރިކަމުގެ ހައި ސީސަނާއި ދިމާކޮށް ރާއްޖެއަށް ބާއްވާ ދަތުރުތަކުގެ އަދަދުތައް އިތުރުކޮށްފައެވެ.
ރާއްޖެއަށް ދަތުރުތައް ކުރާ އެއަރލައިންތަކުގެ އަދަދު 26އަށް އަރާފައިވާއިރު، މިދިޔަ ނޮވެމްބަރުމަހުގެ ކުރީކޮޅު ރާއްޖެއަށް ދަތުރުތައް ބާއްވަމުން އައިސްފައިވަނީ 14 އެއަރލައިންއަކުންނެވެ. އެހެން ކަމުން ކުރު މުއްދަތެއްގެ ތެރޭގައި އަލުން ރާއްޖެއަށް ދަތުރުތައް ފެށި އެއަރލައިންތަކުގެ އަދަދަށް ވަނީ ބޮޑު ކުރިއެރުމެއް ލިބިފައެވެ.
ރާއްޖެއަށް ދަތުރުތައް ބާއްވަމުންދާ އެއަރލައިންތަކުގެ ތެރޭގައި އޭރޯފްލޮޓް، އެއަރ އިންޑިއާ، ބްރިޓިޝް އެއަރވޭސް، އެޑްލްވެއިސް، އެމިރޭޓްސް، އިއްތިހާދު އެއަރވޭސް، ޤަތަރު އެއަރވޭސް، ސްޕައިސްޖެޓް، ސްރީލަންކަން އެއަރލައިން، ޓާކިޝް އެއަރލައިން ފާހަގަކޮށްލެވެއެވެ.
ކޯވިޑް19ގެ ސަބަބުން އޭވިއޭޝަން ސިނާއަތަށް ވަރަށް ބޮޑަށް އަސަރުކޮށް، އެއަރލައިންތަކަށް އޭގެ ނޭދެވޭ އަސަރުވަނީ ކޮށްފައެވެ. ރާއްޖޭގެ ބޯޑަރު އަލުން ހުޅުވާލުމާއިއެކު އެއަރލައިންތަކުގެ ޝައުޤުވެރިކަން ރާއްޖެއަށް އިތުރުކުރުމަށް ގިނަ މަސައްކަތްތަކެއް ކުރިއަށްގެންގޮސްފައެވެ. އެގޮތުން ރާއްޖެ އަންނަ އެއަރލައިންތަކަށް ގްރައުންޑް ހޭންޑްލިންއާއި، ލޭންޑިން ޗާޖަސްގެ އިތުރުން ނެވިގޭޝަން ޕާކިން ޗާޖުން ބޮޑު ޑިސްކައުންޓެއް ދީފައިވާކަން ފާހަގަކޮށްލެވެއެވެ.
ރާއްޖެއަށް ދަތުރުކުރާ އެއަރލައިންތައް އިތުރުވެފައިވާއިރު، ރާއްޖެއަށް އަންނަ ފަތުރުވެރިންގެ އަދަދުވެސް ވަނީ އިތުރުވެފައެވެ. އެގޮތުން މިއަހަރުގެ ފުރަތަމަ 6 ދުވަސްތެރޭ ރާއްޖެއަށް 18086 ފަތުރުވެރިން ވަނީ ޒިޔާރަތްކޮށްފައިކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.