މާލެ ސަރަހައްދުގައި ހިންގާ ކާފިއުއާ ގުޅިގެން މާލޭގެ ގޭބިސީތަކުން ކުނި ނެރެންޖެހޭ ގަޑި ވެމްކޯއިން އަވަސްކޮށްފިއެވެ.
ވޭސްޓް މެނޭޖްމަންޓް ކޮޕަރޭޝަން "ވެމްކޯ"އިން ވިދާޅުވީ މަދަމައިން ފެށިގެން މާލޭގެ ގޭބިސީތަކުން ކުނި ރެންޖެހޭ ގަޑިއަކީ ރޭގަނޑު 8:30އިން 9:30އާ ދެމެދުކަމަށެވެ. މިގޮތަށް ބަދަލު ގެނައީ ވެމްކޯގެ މުވައްޒަފުންނަށްވެސް ކާފިއުއަށް އަމަލުކުރުމުގެ ފުރުސަތު ފަހިކޮށްދިނުމަށާއި މުވައްޒަފުންނާއި ކަސްޓަމަރުންނާ ކޮންޓެކްޓްވުން ކުޑަ ކުރުމަށްކަމަށް ވެމްކޯއިން ވިދާޅުވެއެވެ.
މާލެއިން މިވަގުތުތަކުގައި ކުނި ނެގިނަމަވެސް ހުޅުމާލެއާއި ވިލިމާލޭގައި ކުނި ނެރެން ޖެހޭނީ ކުރިންވެސް ނެރެން ކަނޑައަޅާފައި އޮތް ގަޑީގައެވެ. އެއީ ރޭގަނޑު 10އިން 12އަށެވެ.
ކުނި ނެރޭއިރު ކުނިކޮތަޅުން ލީކު ނުވާގޮތަށް ދެ ކޮތަޅުގައި ކުނި ބަންދުކުރުމަށް ވެމްކޯއިން ވަނީ އެދިފައެވެ. އަދި ކުރިއެކޭވެސް އެއްފަދައިން ވެމްކޯއިން ކުނި ނަގާނީ ޢިމާރާތްތަކުގެ ގްރައުންޑް ފްލޯއިންނެވެ.
ކޯވިޑް-19ގެ ސަބަބުން ވެމްކޯއިން ކުނި އުކާލުމުގެ ޚިދުމަތްދޭ ގަޑިތަކަށް މީގެ ކުރިންވެސް ވަނީ ބަދަލުގެނެސްފައެވެ. އެގޮތުން އެންމެ ފުރަތަމަ މިދިޔަ އޭޕްރީލްމަހުން ފެށިގެން އެ ކުންފުނިން އަންނަނީ މާލޭގައި ގޭބިސީތަކުން ކޮންމެ ދުވަހެއްގެވެސް މެންދުރު 12 އިން 2 އަކަށް އެގެއެއްގެ ތިރިއަށް ކުނި ނެރެފައި ބެހެއްޓުމުން ކުނި އުކައިދިނުމުގެ މަސައްކަތް ކުރަމުންނެވެ.