އައްޑޫ ސިޓީގެ ހަންކެނޑެ އަދި ސަވާހިލިގައި ފަތުރުވެރިކަން ތަރައްޤީކުުރުމަށް ނިންމާފައިވާކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ވިދާޅުވެއްޖެއެވެ.
އެމްޑީޕީން ކުރިއަށްގެންދާ "ރަށްވެހި ފަތިސް" ކެމްޕެއިނުގައި އައްޑޫ ސިޓީއަށް ޚާއްސަކޮށްގެން ބޭއްވި ބައްދަލުވުމުގައި ވާހަކަފުޅުދައްކަވަމުން މިނިސްޓަރ ފައްޔާޒް ވިދާޅުވީ އައްޑޫ ސިޓީގައި ފަތުރުވެރިކަމުގެ އެނދުތައް އިތުރުކުރުމަށް މަސައްކަތްތަކެއްކުރުމަށް ހަމަޖެހިފައިވާ ކަމަށެވެ. އެގޮތުން އައްޑޫ ސިޓީ ހަންކެނޑި އަދި ސަވާހިލިގައި އިންޓަރގްރޭޓަޑް ރިސޯޓް ޑިވެލޮޕްމަންޓް ކޮންސެޕްޓަށް ފަތުރުވެރިކަން ތަރައްޤީކުރުމަށް ނިންމާފައިވާކަމަށް މިނިސްޓަރ ފައްޔާޒް ވިދާޅުވިއެވެ.
"އެނދުތައް އިތުރުކުރުމަށް އަޅުގަނޑުމެން އެބަ މަސައްކަތްކުރަމުން، އެގޮތުން އައްޑޫ ސިޓީ ސަވާހިލި އަދި ހަންކެނޑެގައި، މީގެން ކޮންމެ ރަށެއްގައި ގާތްގަނޑަކަށް 2000 އެނދު ޑިވެލޮޕްކުރެވޭތޯ މި މަސައްކަތްކުރަނީ،" މިނިސްޓަރ ފައްޔާޒް ވިދާޅުވިއެވެ.
މިނިސްޓަރ ފައްޔާޒް ވިދާޅުވީ މި މަޝްރޫޢު ކުރިއަށް ގެންދާނެގޮތުގައި ޕްލޭންތައް ތައްޔާރުކުރުމުގެ މަސައްކަތް ކުރަމުންދާކަމަށެވެ.
ރާއްޖޭގެ ދެކުނުން އައްޑޫ ސިޓީގައި ފަތުރުވެރިކަން ޕްރޮމޯޓު ކުރުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން އައްޑޫ ސިޓީގައި 8000 އެނދު ތަރައްޤީކުރުމަށް ސަރުކާރުން ކުރިޔަށްގެންދާ މަޝްރޫއުގެ ތެރެއިން ފަތުރުވެރިކަމުގެ ޚާއްސަ ސަރަހައްދުތައް ކަނޑައަޅައި، 5 ސަރަހައްދަކުން 4000 އެނދު ތަރައްޤީކުރުމުގެ ފުރުސަތު ވަނީ ހުޅުވާލާފައެވެ.
މި ބިންތަކުގެ ތެރެއިން 31 ބިމެއް މިހާރުވަނީ ބީލަންތައް ކާމިޔާބުކުރި ފަރާތްތަތަކާއި ހަވާލުކޮށްފައެވެ. އަނެއް 62 ބިމަށް ކުރިމަތިލުމުގެ ފުރުސަތު މިހާރުވަނީ ހުޅުވާލާފައެވެ. އައްޑޫ ސިޓީގައި ފަތުރުވެރިކަމަށް ކަނޑައެޅި ސަރަހައްދުތަކުގެ ތެރެއިން އެންމެ ގިނަ ބިން ދޫކުރަން ހަމަޖެހިފައިވަނީ ހިތަދޫންނެވެ.