"ބަލާއް ނިއޭށީ އައްޑޫ އެކާނލޯ، އެތެއި ތިބެއި ދޮންދީނަސް ބެނަން" މިއީ އައްޑޫގެ ޖައްވުގައި މިނިވަންކަމާއި އެކު ފިޔަ ޖަހަމުންދާ ދޮންދީނީގެ ވާހަކަ ކިޔައިދެމުން އައްޑޫ ބަހުން ހަދާފައިވާ ރީތި ލަވައެއްގެ ފެށުމެކެވެ. މިއީ އައްޑޫގެ މީހުންނަށް އާ ލަވަޔަކަށް ނުވިޔަސް މިފަހަރު މިއޮތީ އެ ލަވައިގެ ފެށުމަށް ކުޑަ ބަދަލެއް ގެންނަން ޖެހިފައެވެ. މިހާރު އައްޑޫއަށް ޙާއްސަވެގެން އައްޑޫގައި އުޅެނީ ހަމައެކަނީ ދޮންދީނިއެއް ނޫނެވެ. އައްޑޫގައި މިހާރު އަސްތަކެއް ވެސް އުޅެއެވެ. އައްޑޫގައި އުޅޭ ދޮންދީނިތައް ބަލާލަން އަންނަން އައްޑޫ މީހުން ދޭ ދަޢުވަތު، އަސްތައް ބަލަން ވެސް ދެން ދޭނެއެވެ.
އައްޑޫ ސިޓީ ފޭދޫގެ ސަންސެޓު ބީޗަކީ އެތަނުގެ ނަމުން ދޭހަވާ ފަދައިން ރީތި އިރު އޮއްސޭ މަންޒަރެއް ފެންނަ ސަރަހައްދެކެވެ. ކޮންމެ ދުވަހަކުވެސް އެރީތި 'ސަންސެޓު' ބެލުމަށް ގިނަ ބަޔަކު ޒިޔާރަތް ކުރެއެވެ. އެހެނަސް ބުރާސްފަތި ދުވަހު ހަވީރު ރައްޔިތުންގެ ހިތް ދަމައިގަތީ ރީތި އިރު އޮއްސޭ މަންޒަރާއެކު ފެނިގެން ދިޔަ 'އަސްލާން'ގެ ނަން ދީފައިވާ ޗާލު ހުދު އަހުގެ ހަރަކާތުންނެވެ.
އިއްޔެއަކީ، އަސްލާން ރާއްޖޭގެ މާހައުލަށް ހޭނެމުންގޮސް ރައްޔިތުންނާއެކު ވަގުތު ކޮޅެއް ހޭދަކޮށްލުމަށް ބޭރަށް ނުކުތް ފުރަތަމަ ފަހަރެވެ.
އައްޑޫގެ ހުނަރުވެރި އަންހެން ފޮޓޯގްރާފަރ ފަސާހަތުގެ، ހިތްޤާއިމު ރީތި ފޮޓޯތަކުން އެތައް ބައެއްގެ ހިތް ކަތިލައިފިއެވެ. ސަންސެޓު ބަލަން ނިކުތް އަސްލާން އެތަނަށް އެއްވި ކުޑަކުދިން ހެއްވާލައިފިއެވެ. އައްޑޫއަށް ގެނައި 3 އަހުގެ ތެރެއިން އަސްލާންއަކީ އެންމެ ގިނަ ބައެއްގެ ސަމާލުކަން ހުއްޓުނު އަހެވެ. ސަބަބުތައް ކިތަންމެހާވެސް ގިނައެވެ. އިއްޔެ ވަނީ ފުރަތަމަ ފަހަރަށް އާއްމުންނަށް އަސް ދުއްވާލުމުގެ ފުރުޞަތުވެސް ދީފައެވެ.
އައްޑޫގެ އަސްތައް ބަލަހައްޓާ ސަދަން ސްޓޭލިއަންސްއިން އެފުރުސަތު ހުޅުވާލީ، ޓްރެއިނަރު ވަލުގައި ހިފައިގެން ހުރެ ދުއްވާލުމަށެވެ. ސަދަން ސްޓޭލިއަންސްއިން ފުރަތަމަ ފުރުސަތު ހުޅުވާލީ 30 ފަރާތަކަށެވެ. އަންނަ ތަރުތީބުން ފުރުސަތު ދޭއިރު، އެދުވަހަކަށް ކަނޑައެޅޭ އަދަދައް މީހުން ހަމަވުމުން ދެން ނަންނޯޓު ކުރާ ފަރާތްތަކަށް ދެން އޮންނަ ދުވަހަކު ފުރުޞަތު ދޭނެއެވެ.
އަސް ދުއްވުމުގެ އަގުވެސް ބޮޑެއް ނޫނެވެ. އަސްތައް ބަލާލަން އަސްތައް ހުންނަ ތަނަށް ވަދެވެނީ 20 ރުފިޔާއަށެވެ. އަދި އަސް ދުއްވަން ސަދަން ސްޓޭލިއަންސްއިން ނަގަނީ އެންމެ 150 ރުފިޔާއެވެ.
އާދޭހެވެ. މިހާރު އައްޑޫއިން އަސްދުއްވުމުގެ ފުރުސަތު އެބައޮތެވެ. އެއަސްތަކާއެކު ފޮޓޯ ނަގާލުމުގެ ފުރުސަތު ވެސް އެބައޮތެވެ. ފޮޓޯތައް ހިއްސާ ކުރަމުން ފޮޓޯގްރާފަރު ފަސާހަތުވެސް ބުނެލީ "ބަލާއް ނިއޭށީ އައްޑޫ އެކާނލޯ،..." މިހެންނެވެ. އެހެންވީމާ ދެން ކިޔަންވީ "އެތެއި ތިބެއި 'އަހަސް' ބެނަން"، މިހެން ނޫން ހެއްޔެވެ.
ވަފީޤާ
އަގެއް ކުޑައެއް ނޫނެއްނު އެންމެ 150