ކިންގް ސަލްމާނު މިސްކިތް މި ރޯދަ މަހަށް، ނުހުޅުވި ވަނީ އެތަނުގެ ވަސީލަތްތައް ޤާއިމުނުކުރެވޭތީކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
މި ރޯދަ މަހަށް ކިންގް ސަލްމާން މިސްކިތް ހުޅުވޭނެކަމަށް މީގެކުރިން ސަރުކާރުން ވިދާޅުވިނަމަވެސް ފަހުންވަނީ މިސްކިތް ރޯދައަށް ނުހުޅެވޭނެކަމަށް ވިދާޅުވެފައެވެ.
އިސްލާމިކް މިނިސްޓްރީން ނެރުނު ނޫސްބަޔާނެއްގައި ވިދާޅުވެފައިވަނީ ގިނަ ޚިދުމަތްތަކެއް ދެވޭ ގޮތަށް އެ މިސްކިތް ޢިމާރާތްކުރިނަމަވެސް އަދިވެސް އެތަނުގައި ޤާއިމްކުރަންޖެހޭ ވަސީލަތްތައް ޤާއިމްކުރެވިފައިވާ ނުވާ ކަމަށެވެ. އަދި އެވަސީލަތްތައް ޤާއިމްކުރުމުގެ މަސައްކަތް ދިވެހި ސަރުކާރާއި ސަޢުދީ ޢަރަބިއްޔާގެ ސަރުކާރާ ގުޅުގެން ކުރަމުން އަންނަކަމަށް އެމިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން ވިދާޅުވީ މިސްކިތް ހުޅުވުމަށް ތާރީޚްތަކެއް ކަނޑައެޅި ހިސާބުން ކޯވިޑް-19ގެ ޙާލަތު މުޅި ދުނިޔެއަށް ކުރިމަތިވީ ގޮތަށް އަދިވެސް ރައްކާތެރިކަމާއެކު ސައުދީން ވަޑައިގަންވާ ބޭފުޅުންނަށް ވަޑައިނުގަނެވޭ ފަދަ ހާލަތަކަށް ނާންނާތީ، މިސްކިތް ހުޅުވުން ލަސްވާ ކަމަށެވެ. އަދި މިސްކިތް ހުޅުވުމުގެ ރަސްމިއްޔާތުގައި ބައިވެރިވުމަށް ސައުދީ ސަރުކާރުން ޝައުގުވެރިކަން ފާޅުކޮށްފައިވާ ކަމަށް މިނިސްޓްރީން ވިދާޅުވެއެވެ.
މިކަމާ ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވީ ރަމަޟާން މަހުގެ ތެރޭ މިސްކިތް ނުހުޅުވޭނެކަމަށާ، ކޯވިޑް-19ގެ ޙާލަތަށް ލުއިތަކެއް ލިބުމާއެކު މިސްކިތް ހުޅުވުމަށް މަސައްކަތް ކުރަމުން އަންނަކަމަށެވެ. އަދި ކިންގް ސަލްމާން މިސްކިތުގެ ޑިޒައިންނާ ގުޅޭގޮތުން މިނިސްޓަރ ވިދާޅުވީ އެ މިސްކިތުގެ ޑިޒައިނާ ގުޅޭގޮތުން މެލޭޝިއާގެ ކުންފުންޔަކުން ކޮޕީރައިޓްސްގެ މައްސަލަ ހުށައަޅާފައިވާކަމަށެވެ. އަދި އެކަމާ މެދު ޤާނޫނީ ގޮތުން އަޅަންޖެހޭ ފިޔަވަޅުތައް އަޅާނެކަމަށް އެ ކުންފުނިން ބުނެފައިވާކަމަށް މިނިސްޓަރ ވިދާޅުވިއެވެ.
ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢުދުގެ ހިލޭ އެހީގެ ދަށުން ބިނާކުރާ "ކިންގް ސަލްމާން" މިސްކިތުގެ މަސައްކަތް ކުރަމުންދަނީ ތުރުކީވިލާތުގެ ޖޮއިންޓް ވެންޗަރ ކުންފުންޏެއްކަމަށްވާ އަލްކޭ-ޓަރމެކްސްއިންނެވެ. ޑިޒައިން އެންޑް ބިލްޑް އުސޫލުން މިސްކިތް ބިނާކުރުމުގެ މަސައްކަތް އެކުންފުންޏާ ހަވާލުކޮށްފައިވަނީ 28 ފެބްރުއަރީ 2017 ގައެވެ.
ކިންގް ސަލްމާން މިސްކިތް ފަރުމާކޮށްފައިވާ ގޮތަށް ބަލާއިރު، މި މިސްކިތުގައި ނަމާދުކުރުމަށް ޚާއްސަ ސަރަޙައްދުތަކުގެ އިތުރުން، އިސްލާމީ މަރުކަޒަކުން ލިބޭނެ ގިނަ ޚިދުމަތްތަކެއް ވަނީ ޤާއިމުކޮށްފައެވެ. އެގޮތުން މިސްކިތުގެ އެންމެ ތިރި ވުޞޫއުކުރުމަށް ޚާއްސަކޮށްފައިވާއިރު، ފުރަތަމަ ފަންގިފިލާއާއި ދެވަނަ ފަންގިފިލާ ޚާއްސަކޮށްފައިވަނީ ނަމާދުކުރުމަށެވެ. މި ދެ ފަންގިފިލާގައި ގާތްގަނޑަކަށް 4000 މީހުންނަށް އެއްފަހަރާ ނަމާދުކުރެވޭނެއެވެ.
މިސްކިތުގެ 3 ވަނަ ފަންގިފިލާގައި 4 ކްލާސްރޫމަކާއި، 5 ސެމިނަރ ރޫމެއްގެ އިތުރުން އިސްލާމިކް ލައިބްރަރީއަކާއި އިދާރީ މަސައްކަތްތަކަށް ޚާއްސަ ތަނެއްވަނީ ހަދާފައެވެ. 4ވަނަ ފަންގިފިލާ ޚާއްސަކޮށްފައިވަނީ އެކިއެކި ސެމިނަރތަކާއި ކޮންފަރެންސްތައް ބޭއްވުމަށް ޚާއްސަ އޮޑިޓޯރިއަމަކަށެވެ. މިއީ 350 މީހުންގެ ޖާގައިގެ އޮޑިޓޯރިއަމެކެވެ. މީގެ އިތުރުން މިސްކިތުގެ 5ވަނަ ބުރި ތަރައްޤީކޮށްފައިވަނީ ދީނީ ދަރުސް ދިނުމަށާއި، ނަމާދުކުރުމަށްވެސް ބޭނުންކުރެވޭނެހެން މަލްޓި-ޕަރޕަސް ހޯލެއްގެ ގޮތުގައެވެ.
މިސްކިތް ޒީނަތްތެރިކުރުމުގެގޮތުން ޗާންދަލިޔާތަކާއި ޢަރަބި ކަލިގްރަފީއާއި، ކިރީތި ޤުރުޢާނުގެ އާޔަތްތަކާއި، އިސްލާމީ ސަޤާފަތާއި ގުޅުންހުރި ތަފާތު ލިޔުންތައް ބޭނުންކޮށްފައިވެއެވެ.