ވެކްސިން ޖަހާފައިވާ ބަޔަކު އުޅޭ މަންޒިލަކަށް ރާއްޖެ ހެދުމަށް "އަހަރެން ވެކްސިން ޖަހައިފިން" ކެމްޕެއިން ރަސްމީކޮށް އިޕްތިތާހްކޮށްފިއެވެ.
މި ކެމްޕެއިން އިފްތިތާހްކޮށްދެއްވީ ޓޫރިޒަމް މިނިސްޓަރ ޑރ. އަބްދުﷲ މައުސޫމްއެވެ.
"އަހަރެން ވެކްސިން ޖަހައިފިން" ނުވަތަ "އައިއޭމް ވެކްސިނޭޓެޑް" ކެމްޕެއިނަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީން އިސްނަގައިގެން ޓޫރިޒަމް މިނިސްޓްރީއާއި ގުޅިގެން ފަށާފައިވާ ކެމްޕެއިނެކެވެ.
މި ކެމްޕެއިން ފެށުމުގެ ރަސްމިއްޔާތުގައި ވާހަކަދައްކަވަމުން އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދު ވިދާޅުވީ، މި ކެމްޕެއިނަކީ ވަރަށް މުހިންމު މަޤްސަދެއްގައި އެމްއެމްޕީއާރުސީން ޓޫރިޒަމް މިނިސްޓްރީއާއި ގުޅިގެން ފަށާފައިވާ ކެމްޕެއިނެއްކަމަށެވެ. ކެމްޕެއިންގެ މަޤްސަދަކީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ހުރިހާ ފަރާތަކަށް ވެކްސިން ޖަހައި މުޅި ދުނިޔޭންވެސް އެންމެ ފުރަތަމަ "ފުލީ ވެކްސިނޭޓެޑް" ޓޫރިޒަމެއް ޤާއިމްކުރާ ޤައުމަށް ރާއްޖެ ހެދުންކަމަށް ތޮއްޔިބު ވިދާޅުވިއެވެ.
" ކޯވިޑް ދިފާއު ޤައުމީ ކެމްޕެއިނާއިއެކު ފަތުރުވެރިކަމުގެ ސިނާއަތުގައި މަސައްކަތްކުރާ ހުރިހައި ފަރާތްތަކަށްވެސް ވަނީ ވެކްސިން ޖެހުމުގެ މަސައްކަތް ފަށާފައި. އައިއެމް ވެކްސިނޭޓެޑް ކެމްޕެއިންގެ މަޤްސަދަކީ ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ހުރިހައި ފަރާތްތަކަކީ ކޯވިޑް19 އިން ރައްކާތެރިވުމަށް ވެކްސިން ޖަހާފައިވާ ފަރާތެއްކަމަށް ހަދައި އެކަމަށް ހިތްވަރުދީ ދިވެހިރާއްޖޭގެ ފަތުރުވެރިކަމުގެ ދާއިރާއަކީ ދުނިޔޭގެ އެންމެ ފުރަތަމަ ފުލީ ވެކްސިނޭޓެޑް ޓޫރިޒަމެއް ޤާއިމްކުރާ ޤައުމަށް ވެވޭތޯ ބެލުން." ތޮއްޔިބު ވިދާޅުވިއެވެ.
މިދިޔަ ދުވަސްތަކަކީ ރާއްޖޭގެ ފަތުރުވެރިކަމަށް ގިނަ ގޮންޖެހުންތަކެއް ކުރިމަތިވި ދުވަސްތަކެއްކަމަށް ތޮއްޔިބު ވިދާޅުވިއެވެ. ނަމަވެސް ދުނިޔޭގެ ޓްރެވެލް ރާޑާއިން ރާއްޖެ ފޮހެވިގެން ނުދިޔުމަށްޓަކައި ގިނަ މަސައްކަތްތަކެއް ކޮށްފައިވާކަން ތޮއްޔިބު ފާހަގަކުރެއްވިއެވެ.
އައިއޭމް ވެކްސިނޭޓެޑް ކެމްޕެއިމް ޕްރޮމޯޓްކުރުމަށް ވެކްސިން ފުރިހަމަކުރުމުން ވިޒިޓް މޯލްޑިވްސް ވެބްސައިޓްގައި ޤާއިމްކޮށްފައިވާ މައިކްރޯސައިޓުން ފަތުރުވެރިކަމުގެ ދާއިރާގައި ވެކްސިން ފުރިހަމަކުރާ ރިސޯޓް، ގެސްޓްހައުސް އަދި ސަފާރީ ފަދަ ތަންތަނުގެ މައުލޫމާތާއި ފޮޓޯ ގެނެސްދޭނެކަމަށް ތޮއްޔިބު ވިދާޅުވިއެވެ.
"މި ކެމްޕެއިންގެ ހާއްސަ ބައެއްގެ ގޮތުގައި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ވެކްސިންގެ 2 ޑޯޒް ފުރިހަމަކުރުމުން އައިއޭމް ވެކްސިނޭޓެޑް ބެޖް ދިނުމަށް ވަނީ ހަމަޖެހިފައި. މިކަން އިޝްތިހާރުކުރުމަށް ހިންގާ ސޯސަލް މީޑިއާ ކެމްޕެއިންތަކުގައި މުވައްޒަފުންގެ ޕޮޓޯއާއި ވީޑިއޯ ދައްކައި ދިވެހިރާއްޖެއަކީ ރައްކާތެރި މަންޒިލެއްގެ ގޮތުގައި އިޝްތިހާރުކުރެވިގެންދާނެ. އަދި އައިއޭމް ވެކްސިނޭޓެޑް ކެމްޕެއިމް ޕްރޮމޯޓްކުރުމަށް ވިޒިޓް މޯލްޑިވްސް ވެބްސައިޓްގައި ޤާއިމްކޮށްފައިވާ މައިކްރޯސައިޓުން ފަތުރުވެރިކަމުގެ ދާއިރާގައި ވެކްސިން ފުރިހަމަކުރާ ރިސޯޓް، ގެސްޓްހައުސް އަދި ސަފާރީ ފަދަ ތަންތަނުގެ މައުލޫމާތާއި ފޮޓޯ ގެނެސްދެވޭނެ." ތޮއްޔިބު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރ މައުސޫމް ވިދާޅުވީ، ރާއްޖޭގެ ވެކްސިން ޕްރޮގްރާމް ފެށިތާ ވަރަށް އަވަހަށް ފަތުރުވެރިކަމުގެ ސިނާއަތުގެ މުވައްޒަފުންނަށް ވެކްސިން ދޭން ފެށުމަކީ ލިބުނު ބޮޑު ކާމިޔާބީއެއްކަމަށެވެ. އެގޮތުން މިހާތަނަށް ރިސޯޓްތަކުގެ 99 އިންސައްތަ މުވައްޒަފުންނަށް ވެކްސިންގެ ފުރަތަމަ ޑޯޒް ޖަހާފައިވާކަމަށް މިނިސްޓަރ ވިދާޅުވިއެވެ.
"އަޅުގަނޑު އެންމެ ފުރަތަމަ ހިތައްއެރީ 2021 ވަނަ އަހަރުވެސް އެހާއަވަހަކަށް ވެކްސިނެއް ނުލިބޭނެއޭ. އެހެންނަމަވެސް މާތްﷲ ގެ އިރާދަފުޅުން އަޅުގަނޑުމެންނަށް ވަރަށް އަވަހަށް ވެކްސިން ލިބި ވެކްސިން ޖަހަން ފެށި މިއަދު އަޅުގަނޑުމެން މި ހަފްލާ ފާހަގަކުރާއިރު ފަތުރުވެރިކަމުގެ ދާއިރާގައި މަސައްކަތްކުރާ ވަރަށް ގިނަ މުވައްޒަފުންނަށް ވަނީ ފުރަތަމަ ޑޯޒް ވެކްސިން ޖެހިފައި. ރިސޯޓްތަކުގައި މަސައްކަތްކުރާ މުވައްޒަފުންގެ %99 މުވައްޒަފުންނަށް މިހާރު ވަނީ ވެކްސިންގެ ފުރަތަމަ ޑޯޒް ޖެހިފައި. އަދި 8000 މުވައްޒަފުންނަށް 2 ވަނަ ޑޯޒް މިހާރު ޖެހިއްޖެ." މައުސޫމް ވިދާޅުވިއެވެ.
ވެކްސިންގެ 2 ޑޯޒް ފުރިހަމަކުރާ މުވައްޒަފުންނަށް މި ބެޖް ލިބޭނެއެވެ. އަދި 2 ވަނަ ޑޯޒް ވެކްސިން ޖެހުމަށްފަހު ރަށްރަށުގެ ހާލަތު ބެލުމަށްފަހު ރިސޯޓް މުވައްޒަފުންނަށް ރައްރަށަށް ދަތުރުކުރެވޭނެކަމަށް މިނިސްޓްރީން ވިދާޅުވެއެވެ.