ކޯވިޑް-19 ކޮންޓްރޯލް ކުރުމުގައު ސިއްޙީ ޚިދުމަތްތެރިން ވެވަޑައިގަންނަވަނީ ބޮޑު ޤުރުބާނީއެއްކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ޤައުމާ މުޚާތަބުކުރައްވާ ދެއްކެވި ވާހަކަފުޅުގައި ވަނީ ކޯވިޑްގެ މި ދަނޑިވަޅުގައި ރާއްޖެއަށް ބޭނުންވާ މިންވަރަށް، ބޭސްފަރުވާގެ ވަސީލަތްތަކާއި ޞިއްޙީ ޚިދުމަތްތަކަށް ބޭނުންވާ އާލާތްތައް ހުރި ނަމަވެސް، އިންސާނީ ވަސީލަތްތައް އެވަރަކަށް ނެތްކަމަށެވެ.
ރައީސް ވަނީ މި ދަނޑިވަޅުގައި ޤައުމީ ޚިދުމަތެއްގެ ގޮތުގައި، ޢާއިލާތަކާ ވަކިން، ވަރަށް ބުރަކޮށް މަސައްކަތްކުރައްވަމުން ގެންދަވާ، ޞިއްޙީ ޚިދުމަތްތެރިންނާއި ސަލާމަތީ ބާރުތަކުން، އަދި ހިލޭ ސާބަހަށް މަސައްކަތް ކުރައްވާ ހުރިހާ ބޭފުޅުންވެސް، ކޯވިޑް ކޮންޓްރޯލް ކުރުމުގައި، ވެވަޑައިގަންނަވަނީ ވަރަށް މަތިވެރި ޤުރުބާނީއެއްކަން ފާހަގަކުރައްވާފައެވެ. މިގޮތުން މިދިޔަ ރަމަޟާން މަހުވެސް، ރެޔާއި ދުވާލުގެ ގިނަ ވަގުތުތައް އެބޭފުޅުން ހޭދަކުރެއްވީ، ކޯވިޑް ކޮންޓްރޯލް ކުރުމުގެ މަސައްކަތުގައިކަން ރައީސް ފާހަގަކުރެއްވިއެވެ،
"އެހެންކަމުން، މިއުފާވެރި ފިޠުރު ޢީދުގައިވެސް، އެބޭފުޅުން އެކުރައްވާ ދީނީ އަދި ޤައުމީ ޖިހާދުގެ އަގު ވަޒަންކޮށް، އެހުރިހާ ބޭފުޅުންނަށް ނުހަނު އިޚްލާޞްތެރިކަމާއެކު ޝުކުރު ދަންނަވަމުން، ޢީދުގެ ތަހުނިޔާއާއި ހެޔޮއެދުންތައް އަރިސްކުރަން. އެ ބޭފުޅުން އެކުރައްވާ މަތިވެރި މަސައްކަތުގައި މާތްﷲ ބަރަކާތް ލައްވައި، ދަރުމަޔާއި ޘަވާބު ދެއްވާނެ." ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވިއެވެ.
ރައީސް ވަނީ މިއަދު ފާހަގަކުރަމުންދާ ބައިނަލްއަޤްވާމީ ނަރުހުންގެ ދުވަހުގެ މުނާސަބާގައި ރާއްޖޭގެ ހުރިހާ ނަރުހުންނަށް، ދުވަހުގެ ތަހުނިޔާ އަރިސްކޮށް ނަރުހުން އެ ކޮށްދެއްވަމުން ގެންދަވައި ޚިދުމަތްތަކަށް ތަޢުރީފާއި ސާބަސް ރައްދުކުރައްވާފައެވެ.