މިދިޔަމަހު ރާއްޖެއަށް މުދާ އެތެރެކުރި މިންވަރު ބޮޑުތަނުން އިތުރުވެ، ދައުލަތަށް ލިބުނު އާމްދަނީ 101 އިންސައްތަ އިތުރުވެއްޖެއެވެ.
ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަ އަހަރުގެ އޭޕްރިލްމަހު ރާއްޖެއަށް އެތެރެކޮށްފައިވަނީ 1.8 ބިލިއަން ރުފިޔާ މުދަލެވެ. މިއަދަދު މިއަހަރުގެ އޭޕްރީލްމަހު ވަނީ 3 ބިލިއަން ރުފިޔާއަށް އިތުރުވެފައެވެ. މިއީ 67 އިންސައްތަ އިތުރު އަދަދެކެވެ.
ހުސްވިމަހު ރާއްޖެއަށް އެންމެ ގިނަ އަދަދަކަށް އެތެރެކޮށްފައިވަނީ ކާބޯތަކެތީގެ ބާވަތްތަކެެެވެ. އެގޮތުން 779 މިލިއަން ރުފިޔާގެ ކާބޯތަކެތިވަނީ މިދިޔަ އޭޕްރީލްމަހުގެ ރާއްޖެއަށް އެތެރެކޮށްފައެވެ. ދެން އެންމެ ގިނަ އަަދަދަކަށް ރާއްޖެއަށް އެެތެރެކޮށްފައިވަނީ މެޝިނަރީ އާއި އެކި ބާވަތްތަކުގެ ކަރަންޓް ސާމާނެވެ. އެއީ 517 މިލިއަން ރުފިޔާއެވެ. ދެން އެންމެ ގިނަ އަދަދަކަށް އެތެރެކޮށްފައިވަނީ ތެލުގެ ބާވަތްތަކެވެ. އެގޮތުން 402 މިލިއަން ރުފިޔާގެ ތެލުގެ ބާވަތްތައްވަނީ އޭޕްރީލްމަހު ރާއްޖެއަށް އެތެރެކޮށްފައެވެ.
ރާއްޖޭގެ މުދާ އެތެރެކުރި މިންވަރު އިތުރުވުމާއެކު ދައުލަތަށް ލިބުނު އާމްދަނީވެސް ވަނީ މި މުއްދަތުގައި އިތުރުވެފައެެވެ. ތަފާސް ހިސާބުތައް ދައްކާގޮތުން 2020 ވަނަ އަހަރުގެ އޭޕްރިލް މަހު 129 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ އޭޕްރިލް މަހު މި ޢަދަދުވަނީ 261 މިލިއަން ރުފިޔާއަށް އިތުރުވެފައެވެ. އަދި މީގެ އިތުރަށް މިއަހަރުގެ އޭޕްރިލް މަހު ރޯޔަލްޓީގެ ގޮތުގައި 4 މިލިއަން ރުފިޔާ ލިބިފައިވާކަމަށް ކަސްޓަމްސްއިން ހާމަކުރެއެވެ.
މިދިޔަމަހު އިމްޕޯޓް އިތުރުވި ނަމަވެސް އެކްސްޕޯޓް ވަނީ ދަށްވެފައެވެ. ތަފާސް ހިސާބުތައް ދައްކާގޮތުން 2020ވަނަ އަހަރުގެ އޭޕްރީލްމަހު ރާއްޖެއިން 237 މިލިއަން ރުފިޔާގެ މުދާވަނީ ބޭރުކޮށްފައެވެ. އެހެން ނަމަވެސް މިއަހަރުގެ އޭޕްރީލްމަހު ރާއްޖެއިން ބޭރުކޮށްފައިވަނީ 174 މިލިއަން ރުފޔާގެ މުދަލެވެ. މިއީ 27 އިންސައްތަ ދަށް އަދަދެކެވެ.
ރާއްޖެއިން އެންމެ ގިނަ އަދަދަކަށް އެކްސްޕޯޓްކުރަނީ މަހުގެ ބާވަތްތަކެެވެ. އޭޕްރީލްމަހު ރާއްޖެއިން އެންމެ ގިނަ އަދަދަކަށް ބޭރުކޮށްފައިވަނީ ގަނޑުކުރި ކަޅުބިލަމަހެވެ. އެގޮތުން 51 މިލިއަން ރުފިޔާގެ ގަނޑުކުރި ކަޅުބިލަމަސް ވަނީ ހުސްވި އޭޕްރީލްމަހު ރާއްޖެއިން ބޭރުކޮށްފައެވެ.
މިދިޔަމަހު ރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޔޫ.އޭ.އީ، އިންޑިއާ އަދި އޮމާންއިންއެވެ. ޔޫ.އޭ.އީން 444 މިލިއަން ރުފިޔާގެ މުދާ އެތެރެކޮށްފައިވާއިރު އިންޑިއާއިން 411 މިލިއަން ރުފިޔާގެ މުދާ އަދި އޮމާންއިން 370 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.
މިދިޔަމަހު ރާއްޖެއިން އެންމެ ގިނަ އަދަދަކަށް މުދާ ބޭރުކޮށްފައިވަނީ ތައިލެންޑަށެވެ. އެގޮތުން މި މުއްދަތުގައި ރާއްޖެއިން ބޭރުކޮށްފައިވާ ޖުމްލަ މުދަލުގެ 56 އިންސައްތައަކީ ތައިލޭންޑަށް އެކްސްޕޯޓްކޮށްފައިވާ މުދަލެވެ. ދެން އެންމެ ގިނަ އަދަދަކަށް މުދާ ބޭރުކޮށްފައިވަނީ އިންޑިއާއަށެވެ. އެގޮތުން 9 އިންސައްތަ މުދާ އިންޑިއާއަށް ބޭރުކޮށްފައިވަނީ އިންޑިއާއަށެވެ. ތިންވަނައަށް އެންމެ ގިނަ އަދަދަކަށް ރާއްޖެއިން މުދާ ބޭރުކޮށްފައިވަނީ އިނގިރޭސިވިލާތަކަށެވެ.
ފާއިތުވި އޭޕްރިލް މަހު ރާއްޖެއަށް އިމްޕޯޓް ކުރި މުދަލުގެ ސީ.އައި.އެފް އަގު 2020 ވަނަ އަހަރުގެ އޭޕްރިލް މަހާ އަޅާބަލާއިރު 67 އިންސައްތަ ވަނީ އިތުރުވެފައެވެ.
2020 ވަނަ އަހަރުގެ އޭޕްރިލް މަހު ދިވެހިރާއްޖެއަށް 1.8 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ އޭޕްރިލް މަހު މި ޢަދަދުވަނީ 3 ބިލިއަން ރުފިޔާ އަށް އިތުރުވެފައެވެ.