ރާއްޖޭގެ ފަތުރުވެރިކަމަށް 50 އަހަރު ފުރުން ކުލަގަދަކޮށް ފާހަގަކުރުމަށް "ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ" އެކުލަވާލައިފިއެވެ. މި ކޮމެޓީ އެކުލަވާލާފައިވަނީ ޓޫރިޒަމް މިނިސްޓްރީންނެވެ.
"ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ"ގެ މައިގަނޑު މަޤްޞަދަކީ ދިވެހިރާއްޖޭގެ ޓޫރިޒަމަށް 50 އަހަރު ފުރޭ އަހަރު ކުލަގަދަކޮށް ފާހަގަ ކުރުމަށްޓަކައި ހިންގާ ހަރަކާތްތައް ވިލަރެސްކުރުމެވެ. އަދި ޓޫރިޒަމް އިންޑަސްޓްރީއާއި މިއިންޑަސްޓްރީ އާއި ގުޅިލާމެހިފައިވާ އެހެން ފަރާތްތަކުގެ ބައިވެރިވުން އޮންނަ ގޮތަށް ރާއްޖޭގެ ސިޓީތަކާއި، އަތޮޅުތަކުގައި ތަފާތު ހަރަކާތައް އިންތިޒާމްކޮށް ކުރިއަށް ގެންދިއުމެވެ.
ޓޫރިޒަމް މިނިސްޓްރީން ވިދާޅުވީ، މިކޮމިޓީގެ ފުރަތަމަ ބައްދަލުވުގައި ގޯލްޑަން ޖުބްލީ ފާހަގަކުރުމަށް ކުރިއަށްގެންދަން ގަސްދުކުރާ ހަރަކާތްތަކުގެ ކަލަންޑަރާއި ގުޅޭގޮތުން މެންބަރުން މަޝްވަރާކުރެއްވިކަމަށެވެ. އަދި ގޯލްޑަން ޖުބްލީގެ މައިގަނޑު ހަރަކާތްތައް ކުރިއަށް ގެންދިއުމާއި ހަރަކާތައް ހިންގުމަށް ބޭނުންވާ ބަޖެޓާއި އިންތިޒާމުތަކާއި ގުޅޭގޮތުން ޚިޔާލާއި މަޝްވަރާ ބަދަލު ކުރެއްވުނުކަމަށް ޓްއަރިޒަމް މިނިސްޓްރީން ވިދާޅުވިއެވެ.
ޓޫރިޒަމް އިންޑަސްޓްރީގެ ޖަމްއިއްޔާތަކުގެ މަޝްވަރާއާއި އެކު އެކުލަވާލި މި ކޮމެޓީގައި 11 މެމްބަރުން ހިމެނެއެވެ. ކޮމެޓީގެ ޗެއަރއަކީ ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމްއެވެ. ދެން ކޮމެޓީގައި ހިމެނެނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މޯލްޑިވްސް ގެސްޓްހައުސް އެސޯސިއޭޝަން، ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް ކަނޑައަޅާ މެމްބަރެކެވެ. މީގެއިތުރުން މޯލްޑިވްސް އެލަޔަންސް އޮފް ޑައިވް އޮޕަރޭޓަރސް، މިއުޒިޝަންސް ޔޫނިއަން އޮފް މޯލްޑިވްސް، ޗެފްސް ގިލްޑް އޮފް މޯލްޑިވްސް، މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖް، މިނިސްޓްރީ އޮފް ޔޫތް ސްޕޯރޓްސް އެންޑް ކޮމިއުނިޓީ އެމްޕަވަރމަންޓް، އަދި މިނިސްޓްރީ އޮފް ހޯމްއެފެއަރޒް، ތަމްސީލުކުރައްވާ މެންބަރުންވެސް ކޮމެޓީގައި ހިމެނޭއެވެ.
"ޓޫރިޒަމް ގޯލްޑަންޖުބްލީ ސްޓިއަރިންގ ކޮމިޓީ"ގެ އިދާރީ މަސައްކަތްތައް ކުރިއަށް ގެންދިއުމަށް ހަމަޖެހިފައިވަނީ މިނިސްޓްރީ އޮފް ޓޫރިޒަމުންނެވެ. ޓޫރިޒަމް ގޯލްޑަން ޖުބްލީއަށް ތައްޔާރުވުމަށް ޚާއްޞަ ޓާސްކްފޯރސް އެއްވެސް މިހާރުވަނީ މިނިސްޓްރީ އޮފް ޓޫރިޒަމް ގައި އެކުލަވާލާފައެވެ.
އަންނަ އަހަރަކީ ރާއްޖޭގެ ފަތުރުވެރިކަމުގައި 50 އަހަރު ފުރޭ ގޯލްޑަން ޖުބުލީއެވެ. މިއަހަރު ކުލަގަދަކޮށް ފާހަގަކުރުމަށް ޓޫރިޒަމް މިނިސްޓްރީން ނިންމަވާ އެ މަސައްކަތްތައް މިހާރު ވަނީ ފައްޓަވާފައެވެ.