ކޯވިޑް19ގެ ނަންބަރުތައް ރާއްޖޭގައި ކުއްލިއަކަށް އިތުރުވެގެންދިއުންވީ ކޯވިޑަށްފަހު އަލުން ރަނގަޅުވަމުން އައި ފަތުރުވެރިކަމަށް ލިބިގެންދިޔަ ބޮޑު ހީނަރުކަމަކަށެވެ. މޭމަހުގެ ތެރޭގައި ކޯވިޑް ޖެހޭ މީޙުންގެ އަދަދު ރާއްޖޭގައި ވަރަށް ބޮޑަށް އިތުރުވެގެންދިޔައެވެ. ދުވާލެއްގެ މައްޗަށް ޕޮޒިޓިވްވާ މީހުންގެ އަދަދު 2000 އިން މައްޗަށްވެސް އެރިއެވެ.
ރާއްޖެފަދަ ފަތުރުވެރިކަމަށް ބަރޯސާވެފައިވާ ޤައުމަކަށް ކޯވިޑް19ގެ އަދަދުތައް ދަށްކޮށް ބެހެއްޓުމަކީ ފަތުރުވެރިކަމުން ލިބޭ މަންފާ އިތުރުކުރުމަށް ވަރަށް މުހިންމު ކަމެކެވެ. ކޯވިޑް19ގެ ކޭސްތައް ރާއްޖޭގައި އިތުރުވާން ފެށުމާއިއެކު ޔޫކޭ ފަދަ ޤައުމުތަކުން ދަތުރުކުރުން ރައްކާތެރި ނޫން ޤައުމުތަކުގެ ލިސްޓަށްވެސް ރާއްޖެ އިތުރުކުރިއެވެ. އަދި ދެކުނު އޭޝިއާ ސަރަހައްދުގެ ޤައުމުތަކުން ރާއްޖެ އަންނަ ފަރާތްތަކަށް ވިޒާ ދިނުންވެސް ރާއްޖެއިން ވަގުތީގޮތުން މެދުކަނޑާލިއެވެ.
ކޯވިޑަށްފަހު ރަނގަޅުވަމުން އައި ފަތުރުވެރިކަމަށް މީގެ އަސަރު ވަރަށް ބޮޑަށްވެސް ކުރިއެވެ. ފަތުރުވެރިންގެ ނަންބަރުތަކުން މިކަން ހާމަވެގެންވެސް ދިޔައެވެ. މިއަހަރުގެ މާރޗްމަހު ރާއްޖެއަށް 109585 ފަތުރުވެރިން ޒިޔާރަތްކުރިއެވެ. ނަމަވެސް އޭޕްރީލްމަހު ރާއްޖެ އައިސްފައިވަނީ 91200 ފަތުރުވެރިންނެވެ. އަދި ކޯވިޑް19 ގެ ހާލަތު ރާއްޖޭގައި އެންމެ ނުރައްކާވި މޭމަހު ރާއްޖެ އައިސްފައިވަނީ 64613 ފަތުރުވެރިންކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ.
ކޯވިޑް19 ފެތުރުން ހުއްޓުވުމުގެ ގޮތުން ސަރުކާރުން ވަނީ ގިނަ ފިޔަވަޅުތަކެއް އަޅުއްވާފައެވެ. މިއާއިއެކު 1000 އިން މަތީގައި ހުރި ކޯވިޑްގެ ނަންބަރުތައް ހަފްތާއެއްގެ ތެރޭގައި ވަނީ 400 އަށް ތިރިވެފައެވެ. ނަންބަރުތައް ދަށްވާނަމަ ރާއްޖޭގެ ފަތުރުވެރިކަމުގައި މުސްތަޤްބަލު ފެންނާނީ ވަރަށް އަމާންކޮށެވެ. އެއީ ރާއްޖެ އިޝްތިހާރުކުރަނީ މި ދަނޑިވަޅުގައިވެސް އެންމެ ރައްކާތެރި އެއް މަންޒިލްގެ ގޮތުގައިކަމަށް ވުމެވެ.
ކޯވިޑްގެ ނަންބަރުތައް އިތުރުވެ ފަތުރުވެރިކަން ހީނަރުވެފައިވާކަމަށް އިޝާރާތްކުރައްވައި ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެފައިވަނީ ޖުލައިމަހުގެ ތެރޭގައި އަނެއްކާވެސް ރާއްޖޭގެ ފަތުރުވެރިކަން ރަނގަޅުވާން ފަށާނެކަމަށެވެ. މިއަހަރު ރާއްޖެއަށް ގެނައުމަށް ސަރުކާރުން އަމާޒުކޮށްފައިވަނީ 1.5 މިލިއަން ފަތުރުވެރިންނެވެ. މިނިސްޓަރ މައުސޫމް ވިދާޅުވީ އަދިވެސް މި އަދަދަށް ރާއްޖެއަށް ފަތުރުވެރިން ގެނެވޭނެކަމުގެ އުންމީދު އެބައޮތްކަމަށެވެ.
ފިނޭންސް މިނިސްޓަރ އިބްރާހިމް އަމީރު ވިދާޅުވެފައިވަނީ ކޯވިޑް-19ގެ ކުރިން ރާއްޖޭގެ ފަތުރުވެރިކަން އޮތް ޙާލަތަށް އަލުން އަނބުރާ ދެވޭނެކަމަށް ބެލެވެނީ އަންނަ އަހަރުގެ ކުރީކޮޅުގައިކަމަށެވެ. މިނިސްޓަރ ވިދާޅުވީ، މިދިޔަ އަހަރު ނިމުނުއިރު ސަރުކާރުން އަންދާޒާކުރި ޢަދަދަށްވުރެ ރާއްޖެ އައި ފަތުރުވެރިން އިތުރުވެފައިވާކަމަށެވެ. އަދި މިއަހަރުގެ ފުރަތަމަ 4 މަސްދުވަހުވެސް ރާއްޖެއަށް ފަތުރުވެރިން އަންނާނެކަމަށް އަންދާޒާ ކުރި އަދަދަށްވުރެ އިތުރަށް ފަތުރުވެރިން އައިސްފައިވާކަމަށް މިނިސްޓަރު ވިދާޅުވިއެވެ.
ރާއްޖެއިން މިހާރު ވަނީ ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަކީ ވެކްސިން ޖަހާފައިވާ ބަޔަކަށް ހެދުމަށް "އަހަރެން ވެކްސިން ޖަހައިފިން"ގެ ނަމުގައި ކެމްޕެއިނެއްވެސް ފަށާފައެވެ. ރިސޯޓްތަކުގެ 95 އިންސައްތަ މުވައްޒަފުން މިހާރު ވަނީ ކޯވިޑް19 ގެ ފުރަތަމަ ޑޯޒް ފުރިހަމަ ކޮށްފައެވެ. އަދި 2 ވަނަ ޑޯޒް 65 އިންސައްތަ މުވައްޒަފުން ފުރިހަމަކޮށްފައިވެއެވެ. މިއީވެސް ރާއްޖެ އަންނަ ފަތުރުވެރިންގެ އަދަދުތައް އިތުރުކޮށް ރާއްޖެއާއިމެދު އެމީހުންގެ މެދުގައި އޮންނަ ޔަޤީންކަން އިތުރުކުރުމަށް ކުރިއަށްގެންދާ ކެމްޕެއިނެކެވެ.
ރާއްޖެއަށް މިހާރު ބައިނަލްއަޤްވާމީ 37 އެއަރލައިނަކުން އަންނަނީ ދަތުރުކުރަމުންނެވެ. މިހުރިހާ ކަމަކާއިއެކު ރާއްޖޭގައި ކޯވިޑް19ގެ ނަންބަރުތައް ދަށްކޮށް ބަހައްޓައިފިނަމަ ރާއްޖެއަށް މިއަހަރު ގެނައުމަށް ސަރުކާރުން އަމާޒުހިފާފައިވާ އަދަދަށްވުރެވެސް އިތުރަށް ފަތުރުވެރިން އައުމަކީ އެކަށީގެންވާ ކަމެކެވެ. ދުނިޔޭގެ އެކި ކަންކޮޅުތަކުން ފަތުރުވެރިން ތިބީ ރާއްޖެ އަންނަން ބޭނުންވެފައެވެ. ކޯވިޑް19ގެ ނަންބަރުތައް ދަށްކުރުމަކީ ސަރުކާރާއި އާންމުން ގުޅިގެން ކުރެވޭނެކަމެކެވެ.