މިމަހުގެ ފުރަތަމަ 10 ދުވަހު ރާއްޖެއަށް 17000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތައް ދައްކައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ޖޫންމަހުގެ 1 ވަނަ ދުވަހުން 10 ވަނަ ދުވަހަށް ރާއްޖެއަށް އައިސްފައިވަނީ 17331 ފަތުރުވެރިންނެވެ. މިމަހުގެ އެވްރެޖްކޮށް ދުވާލެއްގެ މައްޗަށް ރާއްޖެއަށް 1733 ފަތުރުވެރިން އާދެއެވެ. އެންމެ ގިނައިން ފަތުރުވެރިން އައިސްފައިވަނީ މިމަހުގެ 6 ވަނަ ދުވަހުއެވެ. އެއީ 2308 ފަތުރުވެރިންނެވެ.
ކޯވިޑްގެ ނަންބަރުތައް ރާއްޖޭގައި އިތުރުވުމާއިއެކު ފަތުރުވެރިކަން ވަނީ ކޮންމެވެސް ވަރަކަށް ހީނަރުވެފައެވެ. ނަމަވެސް މިހާރު ނަންބަރުތައް ދައްވާން ފެށުމާއިއެކު އަނެއްކާވެސް ފަތުރުވެރިންކަން ރަނގަޅުވާން ފަށާނެކަމަށް ތަޖުރިބާކާރުން ބުނެއެވެ. މިއަހަރުގެ ޖަނަވަރީ މަހު ރާއްޖެއަށް ޒިޔާރަތްކޮށްފައިވަނީ 92103 ފަތުރުވެރިންނެވެ. ފެބްރުއަރީ މަހު 96882 ފަތުރުވެރިން ޒިޔާރަތްކޮށްފައިވާއިރު މާރޗް މަހު ރާއްޖެ އައީ 109،585 ފަތުރުވެރިންނެވެ. އޭޕްރިލް މަހު 91200 ފަތުރުވެރިން އަދި މެމަހު 64،613 ފަތުރުވެރިން ރާއްޖެ އައިސްފައިވެއެވެ.
ފަތުރުވެރިން މިހާރު އެވްރެޖްކޮށް ރާއްޖޭގައި 9 ދުވަސް ހޭދަކުރެއެވެ. ކޯވިޑުން ރައްކާތެރިވުމަށް އެޅި ފިޔަވަޅެއްގެ ގޮތުން ބޯޑަރުތައް ބަންދުކޮށްފައި ހުޅުވާލިފަހުން ރާއްޖެ އަންނަ ފަތުރުވެރިން ރާއްޖޭގައި ހޭދަކުރާ ދުވަހުގެ އަދަދު ވަނީ އިތުރުވެފައެވެ.
މިދިޔަ އަހަރުގެ ޖޫންމަހު ރާއްޖޭގެ ބޯޑަރު އޮތީ އެއްކޮށް ބަންދުކޮށްފައެވެ. އެހެންކަމުން މިދިޔަ އަހަރުގެ ޖޫންމަހު ރާއްޖެއަށް އެއްވެސް ފަތުރުވެރިއަކު އައިސްފައެއް ނުވެއެވެ. މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ. އެއީ ރާއްޖެ ޒިޔާރަތްކުރި ފަތުރުވެރިންގެ %23.8 އެވެ. 2 ވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އެއީ %19 އެވެ. އަދި %5.5. އާއިއެކު 3 ވަނައިގައި އުޅެނީ ޖަރުމަނުވިލާތެވެ.
ކޯވިޑަށްފަހު ރާއްޖޭގައި އޮޕަރޭޓްކުރާ 1034 ފެސިލިޓީ މިހާރު ވަނީ އަލުން ހުޅުވާފައެވެ. މީގެތެރޭގައި ހިމެނެނީ 162 ރިސޯޓް، 700 ގެސްޓްހައުސް، 160 ސަފާރީ އަދި 12 ހޮޓެލްއެވެ.