އިންކަމް ސަޕޯޓް އެލަވަންސަށް އެދި ހުށަހަޅާފައިވާ ހުރިހާ ފޯމެއް މިހާރު ޕްރޮސެސްކޮށް ނިމިފައިވާ ކަމަށް ޖޮބް ސެންޓަރުން ހާމަކޮށްފިއެވެ.
އިންކަމް ސަޕޯޓް އެލަވަންސަކީ ކޯވިޑް-19އާ ގުޅިގެން ގިނަ ބައެއްގެ ވަޒީފާ ގެއްލުމާއި، އަދި ވިޔަފާރިތައް ހުއްޓި އާމްދަނީއަށް އަސަރުކުރުމާއި ގުޅިގެން، އެފަދަ ފަރާތްތަކަށް އެހީވުމަށް ސަރުކާރުން ދޭންފެށި އެލަވަންސްއެކެވެ. މި އެލަވަންސަށް އެދި އެޕްލިކޭޝަން ހުށަހަޅަން ޖެހެނީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ހިންގާ ޖޮބް ސެންޓަރއަށެވެ.
އިންކަމް ސަޕޯޓް އެލަވަންސް ދޭން ފަށާފައިވަނީ މިދިޔަ އަހަރުގެ އޭޕްރީލް މަހުން ފެށިގެންނެވެ. އެގޮތުން ތިން ފިޔަވައްސަކަށް ބަހާލައިގެން ޑިސެމްބަރުމަހުގެ ނިޔަލަށް ވަނީ އިންކަމް ސަޕޯޓް އެލަވަންސް ދީފައެވެ. ޖޮބް ސެންޓަރުން ވިދާޅުވީ އިންކަމް ސަޕޯޓް އެލަވަންސަށް ޝަރުތު ހަމަވާ ފަރާތްތަކުގެތެރެއިން މިހާރު އެލަވަންސް ހަވާލުނުކުރެވި އިނީ އެންމެ ފަރާތަކަށް ކަމަށެވެ. އެފަރާތާ އެލަވަންސް ހަވާލު ނުކުރެވި ވަނީ ހުށަހެޅި ފޯމްގެ ބޭންކު އެކައުންޓް ތަފްސީލްތަކުގައި މައްސަލައެއް އުޅޭތީކަމަށާއި، މިހާރު އެކަން ހައްލުކޮށް، ފިނޭންސަށް ފޮނުވާފައިވާ ކަމަށް ޖޮބް ސެންޓަރއިން މައުލޫމާތުދެއެވެ.
އިންކަމް ސަޕޯޓް އެލަވަންސަށް އެދި ހުށަހަޅާފައިވާ ހުރިހާ ފޯމްތައް ޕްރޮސެސްކޮށް ނިމިފައިވީ ނަމަވެސް، ޝަކުވާތައް ބަަލައިގަންނަމުންދާ ކަމަށާއި، މައްސަލައެއް އުޅޭ ނަމަ އެކަންތައްތައް ރަނގަޅު ކުރުމުގެ ފުރުސަތު އަދިވެސް ހުޅުވާލެވިފައިވާ ކަމަށް ޖޮބް ސެންްޓަރުން ވިދާޅުވެއެވެ.
ފިނޭންސް މިނިސްޓްރީގެ ތަފާސް ހިސާބުތަށް ދައްކާގޮތުން 22،945 މީހަކަށް 421 މިލިއަން ރުފިޔާވަނީ ދޫކޮށްފައެވެ.
މީގެކުރިން ޖޮބް ސެންޓަރުން ހިއްސާކުރި މައުލޫމާތުތަކުގައިވާ ގޮތުން އިންކަމް ސަޕޯޓް އެލަވަންސް އެންމެ ގިނަ އަދަދަކަށް ދޫކޮށްފައިވަނީ ކ. އާއި ރ.އަތޮޅުގެ ރަށްވެހިންނަށެވެ. އެގޮތުން އިންކަމް ސަޕޯޓް އެލަވަންސްގެ ގޮތުގައި ދޫކޮށްފައިވާ ޖުމްލަ އަދަދުގެ ތެރެއިން 60 މިލިއަން ރުފިޔާ އަކީ ރ.އަތޮޅުން މި އެލަވަންސަށް އެދުނު ފަރާތްތަކަށް ދޫކޮށްފައިވާ ފައިސާއެވެ. އަދި ކ.އަތޮޅުން މި އެލަވަންސަށް އެދުނު ފަރާތްތަކަށްވަނީ 60.1 މިލިއަން ރުފިޔާ ދޫކޮށްފައެވެ.
އިންކަމް ސަޕޯޓް އެލަވަންސަށް އެންމެ ގިނަ އަދަދަކަށް އެދިފައިވަނީ 21 އަހަރާއި 30 އަހަރާއި ދެމެދުގެ އުމުރު ފުރައިގެ މީހުންނަށެވެ. އެގޮތުން 7400އަށްވުރެ ގިނަ މީހުންނަކީ މި އުމުރު ފުރައިގެ މީހުންނެވެ. އަދި އެލަވަންސް ލިބިފައިވާ މީހުންގެ ތެރޭގައި ގިނައީ ފިރިހެނުންކަމަށްވެސް ޖޮބް ސެންޓަރުގެ ތަފާސް ހިސާބުތަކުން ދައްކައެވެ.
ވަޒީފާއަށް ނުރަނގަޅު އަސަރު ކޮށްފައިވާ މީހުންނަށް އިންކަމް ސަޕޯޓް އެލަވަންސް ދިނުމުގެ ޝަރުޠުތަކުގެ ތެރޭގައި، ދިވެހި ރައްޔިތަކަށް ވުމާއެކު، ދިވެހިރާއްޖޭގައި ދިރިއުޅޭ މީހެއްކަމުގައި ވާންޖެހެއެވެ. އަދި އެއީ ޢުމުރުން 18 އަހަރާއި، 65 އަހަރާއި ދެމެދުގެ މީހަކަށް ވާންޖެހެއެވެ. މުސާރަ އުނިކޮށްފައިވާ މީހަކަށް 5000 ރުފިޔާއިން ދަށުން ޢާމްދަނީއެއް ލިބޭނަމަ އެމީހަކަށް އިނާޔަތުގެ ގޮތުގައި 5000 ރުފިޔާއިން އެ ޢަދަދު އުނިކުރުމުން ބާކީ އޮންނަ ޢަދަދާ އެއްވަރުގެ ޢަދަދެއް ވަނީ ދީފައެވެ.