ރާއްޖޭގައި އޮޕަރޭޓްކުރަމުންދާ ޓްރެވެލް އެޖެންސީގެ އަހަރީ ރިޕޯޓު މިމަހުގެ 30 ވަނަ ދުވަހުގެ ކުރިން ޓޫރިޒަމް މިނިސްޓްރީއަށް ހުށައެޅުމަށް އަންގައިފިއެވެ.
ދިވެހިރާއްޖޭގައި ދަތުރުރާވާ ހިންގުމާ ބެހޭ ޤަވާއިދުގެ 9 ވަނަ މާއްދާގެ ދަށުން ޓްރެވަލް އެޖެންސީގެ އަހަރީ ރިޕޯޓެއް ކޮންމެ އަހަރެއްގެ ޖޫން މަހުގެ 30 ވަނަ ދުވަހުގެ ކުރިން މިނިސްޓްރީ އޮފް ޓޫރިޒަމަށް ހުށަހަޅަންޖެހެއެވެ. އެހެންކަމުން ރާއްޖޭގައި އޮޕަރޭޓްކުރަމުންދާ ހުރިހާ ޓްރެވެލް އެޖެންޓުންވެސް މިމަހުގެ 30 ވަނަ ދުވަހުގެ ކުރިން ރިޕޯޓް ހުށައެޅުމަށް ޓޫރިޒަމް މިނިސްޓްރީން ވަނީ އެދިފައެވެ. އަދި 2020 ވަނަ އަހަރުގެ އަހަރީ ރިޕޯޓު މިހާރު ހުށަހަޅުއްވާފައިވާ ފަރާތްތަކުން އަލުން ރިޕޯޓު ހުށަހަޅަން ނުޖެހޭނެކަމަށްވެސް ޓޫރިޒަމް މިނިސްޓްރީން ވަނީ އެދިފައެވެ.
ޓްރެވެލް އެޖެންސީތައް ހިންގުމުގެ ޤަވާއިދަށް މިއަހަރުގެ ފެބްރުއަރީ މަހުގެ 25 ވަނަ ދުވަހު އިސްލާހު ގެނެސް ވަނީ އަލުން ގެޒެޓްކޮށްފައެވެ. ކުރިން އޮންނަގޮތުން އަހަރީ ރިޕޯޓު ހުށަނާޅާނަމަ ޓްރެވެލް އެޖެންސީ ހިންގުމުގެ ހުއްދަ އަމިއްލައަށް ބާތިލްވެއެވެ. ނަމަވެސް ފަހުން ގެނައި އިސްލާހާއެކު ރިޕޯޓް ހުށަނާޅައިފިނަމަ ހުއްދަ ބާތިލްކުރާނީ މިނިސްޓްރީން ނޯޓިސް ދިނުމަށްފަހުގައެވެ.
ޓޫރިޒަމް މިނިސްޓްރީން ވިދާޅުވީ، ރިޕޯޓް ހުށައަޅަން ޖެހެނީ އެއީ ހަރަކާތްތެެރިވަމުންދާ އެޖެންސީއެއްކަން މިނިސްޓްރީއަށް އެނގުމަށްޓަކައިކަމަށެވެ. ގިނަ އެޖެންސީތައް ހިންގަމުން އައިނަމަވެސް ރިޕޯޓް ހުށަނާޅާތީ އެއީ ހިންގަމުން އަންނަ އެޖެންސީއެއްކަން މިނިސްޓްރީއަށް ނޭނގޭކަމަށް ޓޫރިޒަމް މިނިސްޓްރީން ވިދާޅުވެއެވެ.
"ދިވެހިރާއްޖޭގައި ޓޫރިޒަމާއި ގުޅުންހުރި ދަތުރު ރަވައި، ހިންގުމުގެ ޚިދުމަތް ދިނުމާބެހޭ ޤަވާއިދު" އިސްލާހްކޮށް އަލުން ގެޒެޓްކޮށްފައިވަނީ ކުދި ފަންތިއާއި މެދު ފަންތީގެ ވިޔަފާރިތަކަށް ފަސޭހަ ވޭނެގޮތައްކަމަށް މިނިސްޓްރީން މީގެކުރިން ވަނީ ބުނެފައެވެ.
ޤަވާއިދުގައި ކުރިން އޮތްގޮތުން ބޭރުގެ ބޮޑެތި ޓްރެވެލް އެޖެންސީތަކަށް ޓްރެވަލް އެޖެންސީ ރެޕްރެޒެންޓޭޓިވް އޮފީސްތައް ރާއްޖޭގައި ހުޅުވާލެވެއެވެ. ނަމަވެސް އޭގެބަދަލުގައި މިހާރު އެފަދަ އޮފީހެއް ހިންގަންޖެހޭނީ ލޯކަލް ޓްރެވެލް އެޖެންސީތަކުގެ އެޖެންޓަކާއި ގުޅިގެންނެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖޭގައި މިވަގުތު 454 ޓްރެވެލް އެޖެންޓުން ވަނީ ރަޖިސްޓްރީކޮށްފައެވެ.