އެމްއެމްޕީއާރުސީއަކީ ރާއްޖޭގެ ފަތުރުވެރިކަން އިޝްތިހާރުކުރުމުގެ ޒިންމާ އަދާކުރާ މައި ކުންފުންޏެވެ. ކޯވިޑް19ގެ ކުރިންވެސް ވިޒިޓް މޯލްޑިވްސްއިން އައީ ރާއްޖެ އިޝްތިހާރުކުރުމަށް ދުނިޔޭގެ އެކި ކަންކޮޅުތަކުގައި ކެމްޕެއިންތައް ބާއްވަމުންނެވެ.
ކޯވިޑް19 އާއިއެކު ރާއްޖޭގެ ބޯޑަރު ބަންދުކޮށް ރާއްޖެ އަންނަ ފަތުރުވެރިންގެ އަދަދު ސުމަކަށް ވެއްޓުނެވެ. މިއާއިއެކު ރާއްޖޭގެ ފަތުރުވެރިކަން އިޝްތިހާރުކުރާ މައި ކުންފުނީގެ ހައިސިއްޔަތުން އެމްއެމްޕީއާރުސީއަށް ކުރަންޖެހުނު މަސައްކަތްތަށްވީ އިތުރެވެ. ރާއްޖޭގެ ފަތުރުވެރިކަމަށް ލިބުނު ގެއްލުމުން އަރައިގަނެ އަނެއްކާވެސް ރާއްޖެ އަންނަ ފަތުރުވެރިންގެ އަދަދު އިތުރުކުރަން އެމްއެމްޕީއާރުސީއަށް މަޖުބޫރުވިއެވެ.
ކޯވިޑްގެ ހާލަތުގައި ޤައުމުތަކުގެ ބޯޑަރު ބަންދުކޮށް ދަތުރުފަތުރުކުރުން ހުއްޓާލާފައި އޮތުމުގެ ސަބަބުން އެންމެ ފުރަތަމަ ރާއްޖެ އިޝްތިހާރުކޮށްފައިވަނީ އޮންލައިން ވަސީލަތްތައް ބޭނުންކޮށްގެންނެވެ. ނަމަވެސް މިހާރު ފިޒިކަލްކޮށްވެސް އެމްއެމްޕީއާރުސީން ފެއަރތަކާއި އިވެންޓްތަކުގައި ބައިވެރިވެއެވެ.
މިއަހަރުގެ މިހާތަނަށް ދުނިޔޭގެ ގިނަ ޤައުމުތަކެއްގައި ރާއްޖެ އިޝްތިހާރުކުރުމުގެ ވަރުގަދަ ކެމްޕެއިންތަކެއް އެ ކުންފުނިން ވަނީ ކުރިއަށްގެންގޮސްފައެވެ. މި ހަރަކާތްތަކުގައި 704 މިލިއަނަށްވުރެ ގިނަ މީހުންނަށް ރާއްޖެއާއި ބެހޭ މައުލޫމާތުދީ ރާއްޖެ އިޝްތިހާރުކުރެވިފައިވާނެކަމަށް އެމްއެމްޕީއާރުސީން ބުނެއެވެ.
މިއަހަރުގެ މިހާތަނަށްވެސް އެމްއެމްޕީއާރުސީން ވަނީ ދުނިޔޭގެ 17 އަށްވުރެ ގިނަ ޤައުމުގައި ރާއްޖެ އިޝްތިހާރުކުރުމުގެ އެކިއެކި ކެމްޕެއިންތައް ކުރިއަށްގެންގޮސްފައެވެ. އެ ކުންފުނީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް އެންމެ ގިނަ މީހުންނަށް ރާއްޖެ އިޝްތިހާރުކުރެވިފައިވަނީ ސައުތު އެފްރިކާގައެވެ. އެމްއެމްޕީއާރުސީން ކުރިއަށްގެންދިޔަ އެކިއެކި ކެމްޕެއިން ހަރަކާތްތަކުގައި ސައުތު އެފްރިކާގެ 301 މިލިއަނަށްވުރެ ގިނަ މީހުންނަށް ވަނީ ރާއްޖެއާއި ގުޅޭ މައުލޫމާތު ފޯރުކޮށްދީފައެވެ.
2 ވަނަ އަށް އެންމެ ގިނަ މީހުންނަށް ރާއްޖޭގެ މައުލޫމާތު ދީފައިވަނީ އެމެރިކާގައެވެ. އެ ޤައުމުގެ 219 މިލިއަން މީހުންނަށް ރާއްޖޭގެ މައުލޫމާތު ދީފައިވާއިރު 3 ވަނައިގައި އުޅެނީ ސައުތު ކޮރެއާއެވެ. ސައުތު ކޮރެއާގެ 105 މިލިއަން މީހުންނަށް ރާއްޖެއާއި ގުޅޭ މައުލޫމާތު ދީފައިވާކަމަށް އެމްއެމްޕީއާރުސީން ބުނެއެވެ.
މި ޤައުމުތަކުގެ އިތުރުންވެސް އެހެން ބައެއް ޤައުމުތަކުގައި ހިންގި ކެމްޕެއިންތަކުންވެސް އެ ޤައުމުތަކުގެ ގިނަ ބަޔަކަށް ރާއްޖެއާއި ގުޅޭ މައުލޫމާތުތައް ފޯރުކޮށްދެވިފައިވާކަމަށް އެމްއެމްޕީއާރުސީން ބުނެއެވެ. ބޮޑެތި ކެމްޕެއިންތައް ހިންގި ބައެއް އެހެން ޤައުމުތަކުގެ ތެރޭގައި އިނގިރޭސިވިލާތް، ފްރާންސް، އިޓަލީ، ރަޝިއާ، ޖަރުމަނުވިލާތް، ސްވިޒަލޭންޑް، އޮސްޓްރިއާ، ޗައިނާ، ތުރުކީ އިންޑިއާ، ސްޕެއިން ހިމެނެއެވެ.
އަހަރުގެ ކުރިއަށްވެސް އެމްއެމްޕީއާރުސީން ވަނީ ގިނަ ކެމްޕެއިން ހަރަކާތްތަކެއް ރާވާފައެވެ. އޭގެތެރޭގައި އެކިއެކި ފެއަރތަކުގައި ބައިވެރިވުމާއި، ރޯޑްޝޯތަކާއި، އެކްސްޕޯތައް ހިމެނެއެވެ.