އަަލަށް ފަށާ ކުދި ވިޔަފާރިތަކަށް އަމާޒުކޮށްގެން މަސައްކަތްކުރާނެ ޖާގައެއް ހޯދައިދިނުމަށް ބީސީސީން މާލޭގައި ކޯ ވޯކް ސްޕޭސްއެއް ހުޅުވައިފިއެވެ.
ސީޑް ބައި ބީސީސީގެ ނަމުގައި ހުޅުވާފައިވާ މި ކޯ ވޯކް ސްޕޭސް ހުޅުއްވައިދެއްވީ އިކޮނޮމިކް މިނިސްޓަރ ފައްޔާޒް އިސްމާއިލެވެ.
ކޯ ވޯކްސްޕޭސްއަކީ ފްރީލާންސްކޮށް މަސައްކަތްކުރާ ފަރާތްތަކަށާއި އަލަށް ވިޔަފާރި ފަށާ ޒުވާނުންނަށް ހެޔޮ އަގެއްގައި ވިޔަފާރީގެ މަސައްކަތްކޮށް، ޚިޔާލު ބަދުލުކުރެވޭނެ ފަހި މާހައުލެއް ފޯރުކޮށްދިނުމުގެ މަޤްސަދުގައި ފަރުމާކުރެވިފައި ހުންނަ ތަންތަނެވެ. ސީޑް ބައި ބީސީސީގައި އެއްފަހަރާއި ގާތްގަނޑަކަށް 40 މީހުންނަށް މަސައްކަތްކުރެވޭނެއެވެ.
މިތަނާ ގުޅޭގޮތުން މައުލޫމާތުދެއްވަމުން އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވީ، މިފަދަ އިތުރު ތަންތަން މާލެއާއި އަތޮޅުތަކުގައި ޤާއިމްކުރުމުގެ ވިސްނުން އެބަހުރި ކަމަށެވެ.
" ހައި ސްޕީޑް އިންޓަރނެޓާއި، ޕްރިންޓިންއާއި މި ހުރިހާ ޚިދުމަތްތައް މިތަނުން ލިބޭނެ. ވެބްސައިޓު މެދުވެރިކޮށް ބުކް ކޮށްލެވޭ، އެކި ޕެކޭޖްތަށް ވަރަށް ކުޑަ އަގެއްގައި ހުންނާނެ، އުއްމީދަކީ މީގެ ކާމިޔާބު ލެވެލްއަށް ބަލާފައި އެކްސްޕެންޑު ކުރުުން. މާލޭގައިވެސް އަދި އަތޮޅުތަކުގައިވެސް، " މިނިސްޓަރ ފައްޔާޒް ވިދާޅުވިއެވެ.
ފައްޔާޒް ވިދާޅުވީ ކުދި ވިޔަފާރިތަަކަށް މިފަދަ އެހީތެރިކަން ފޯރުކޮށްދިނުމުން އިޤްތިސާދުގެ މައިބަދަ ވަރުގަދަވެގެންދާކަމަށެވެ. އެގޮތުން ކުދި ވިޔަފާރިތަކަށް އެހީވުމަށް އިކޮނޮމިކް މިނިސްޓްރީން ގިނަ މަސައްކަތްތަކެއް ކުރުމަށް ރާވާފައިވާ ކަމަށާ، އެގޮތުން ފެހުމުގެ މަސައްކަތްކުރާ ފަރާތްތަކަށް ޚާއްސަ ތަނެއް ޤާއިމްކުރަން ނިންމާފައިވާ ކަމަށް މިނިސްޓަރ ވިދަޅުވިއެވެ.
ކޯ ވޯކް ސްޕޭސް ހުޅުވާފައި ހުންނާނީ ހެނދުނު 8:30އިން ރޭގަނޑު 10:00އަށެވެ. ކޯ ވޯކް ސްޕޭސް ހުޅުވާފައިވަނީ އޯކިޑްމަގު ކަނީރުވިލާ ބިލްޑިންގައެވެ.
ކޯޝެއާޑް ވޯކްސްޕޭސްއަކީ ކުދި ވިޔަފާރިތަކާއި، ފްރީލާންސްކޮށް މަސައްކަތްކުރާ ފަރާތްތަކަށް އަމާޒުކޮށްގެން ޔޫ.އެން.ޑީ.ޕީގެ ސަސްޓެއިނަބަލް އިކޮނޮމިކް އެންޕަވަރމެންޓް އެންޑް ޑިވެލޮޕްމަންޓް ފޯ އެސް.އެމް.އީ، ސީޑްސް ޕްރޮޖްކްޓްގެ މާލީ އެހީގެ ދަށުން ތަރައްޤީކޮށްފައިވާ ތަނެކެވެ.