އެވްރެޖްކޮށް މިހާރު ކޮންމެ ދުވަހަކު ރާއްޖެއަށް 3،113 ފަތުރުވެރިން އަންނަ ކަމަށް ތަފާސް ހިސާބުތަކުން ދައްކައިފިއެވެ.
ކޮންމެ ދުވަހަކު ރާއްޖެއަށް އަންނަ ފަތުރުވެރިންގެ އަދަދު އެންމެ ފަހުން 3000 އަށް ވުރެ މައްޗަށް އަރާފައިވަނީ މިދިޔަ އޭޕްރީމަހުއެވެ.
ކޯވިޑްގެ ހާލަތާއި ގުޅިގެން ރާއްޖެއަށް އަންނަ ފަތުރުވެރިންގެ އަދަދުތައް ފާއިތުވީ ދެމަސްދުވަހުވަނީ ދަށްވެފައެވެ. އެގޮތުން މިދިޔަ މެއިމަހު ރާއްޖެއަށް އެވްރެޖްކޮށް ކޮންމެ ދުވަހަކު އައިސްފައިވަނީ 2084 ފަތުރުވެރިންނެވެ. އަދި ޖޫންމަހު މި އަދަދު ހުރީ 1872ގައެވެ.
މިއަހަރު ފެށިގެން އައީ އުންމީދީ ނަމްބަރުތަކަކާއި އެކުއެވެ. އެގޮތުން މިއަހަރުގެ ޖެނުއަރީމަހު އެވްރެޖްކޮށް ކޮންމެ ދުވަހަކު ރާއްޖެއަށް 2،971 ފަތުރުވެރިން އައިސްފައިވެއެވެ. ފެބްރުއަރީމަހު ރާއްޖެއަށް އެވްރެޖްކޮށް ކޮންމެ ދުވަހަކު 3،460 ފަތުރުވެރިން އައިސްފައިވާއިރު، މާރޗުމަހު ކޮންމެ ދުވަހަކު 3،535 ފަތުރުވެރިން އައިސްފައިވެއެވެ. އަދި އޭޕްރީލްމަހު ރާއްޖެއަށް ކޮންމެ ދުވަހަކު 3،040 ފަތުރުވެރިން އައިސްފައިވެއެވެ.
ތަފާސް ހިސާބުތައް ދައްކާގޮތުން މިމަހުގެ މިހާތަނަށް ރާއްޖެއަށް ވަނީ 65382 ފަތުރުވެރިން އައިސްފައެވެ. މިއީ މިދިޔަ މަހުގެ ރާއްޖެއަށް ޒިޔާރަތްކުރި 56166 ފަތުުރުވެރިންނާއި އަޅާ ބަލާއިރު، 9216 ފަތުރުވެރިންގެ އިތުރުވުމެކެވެ.
އަހަރުގެ މިހާތަނަށް ރާއްޖެއަށް ޖުމްލަ 575931 ފަތުރުވެރިން ޒިޔާރަތްކޮށްފައިވާއިރު، އެއް ޤައުމަކުން އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ. އެގޮތުން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ 23.8 އިންސައްތަ އަކީ ރަޝިއާ ފަތުރުވެރިންނެވެ.
ދެވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް ޒިޔާރަތްކޮށްފައިވަނީ އިންޑިއާއިންނެވެ. ރާއްޖެއަށް ޒިޔާރަތްކޮށްފައިވާ ފަތުރުވެރިންގެ 16.5 އިންސައްތަ އަކީ އިންޑިއާ ފަތުރުވެރިންނެވެ. ތިންވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް ޒިޔާރަތްކޮށްފައިވަނީ ޖަރުމަންވިލާތުންނެވެ. ރާއްޖެއަށް ޒިޔާރަތްކޮށްފައިވާ ފަތުރުވެރިންގެ 5.5 އިންސައްތައަކީ ޖަރުމަންވިލާތުން ރާއްޖެއަށް ޒިޔާރަތްކޮށްފައިވާ ފަތުރުވެރިންނެވެ.
ޓޫރިޒަމް މިނިސްޓްރީން ހާމަކުރާގޮތުގައި ރާއްޖެއަށް އަންނަ ފަތުރުވެރިން އެވްރެޖްކޮށް 9 ދުވަހުގެ ޗުއްޓީއެއް ރާއްޖޭގައި ހޭދަކުރެއެވެ.