މިދިޔަމަހު ނޮޓިލަސް މޯލްޑިވްސް ރިސޯޓްގެ ކޮންމެ މުވައްޒަފަކަށް ސަރވިސް ޗާޖުގެ ގޮތުގައި 1623 ޑޮލަރު ލިބިއްޖެއެވެ. މިއީ ދިވެހި ރުފިޔާއިން ބަލާ ނަމަ 25026 ރުފިޔާއެވެ.
ރިސޯޓު ވޯކާސް މޯލްޑިވްސް ފޭސްބުކް ޕޭޖުގައި އާއްމުކޮށްފައިވާ ހިސާބުތަކަށް ބަލާއިރު ނޮޓިލަސްއަކީ މިދިޔަމަހު އެންމެ ބޮޑު ސަރވިސް ޗާޖެއް ދިން ރިސޯޓެވެ. އެންމެ މަތީ ފަންތީގެ ޚިދުމަތްދޭ ނޮޓިލަސް މޯލްޑިވްސްއަކީ އަބަދުވެސް ރަނގަޅު ސަރވިސް ޗާޖެއް ބަހާ ރިސޯޓެކެވެ.
ރިސޯޓުތަކުގައި މަސައްކަތްކުރާ މުވައްޒަފުން ދޭ މައުލޫމާތުތަކުގެ މައްޗަށް ބިނާކޮށް ރިސޯޓް ވޯކާސް އިން ނެރޭ މި މައުލޫމާތުތަކުން ދައްކާގޮތުން 1000 ޑޮލަރަށްވުރެ ބޮޑު އަދަދަކުން ސަރވިސް ޗާޖު ބަހާފައިވަނީ 3 ރިސޯޓަކުންނެވެ. އެއީ ނޮޓިލަސް މޯލްޑިވްސްގެ އިތުރުން، ދަ ރިޓްސް ކާލްޓަން މޯލްޑިވްސް އަދި ވޯލްޑޯފް އެސްޓޯރިއާ އިތާފުއްޓެވެ.
އެގޮތުން ދަ ރިޓްސް ކާލްޓަންއިން ސަރވިސް ޗާޖުގެ ގޮތުގައި އޮގަސްޓްމަހު ދީފައިވަނީ 1352.10 ޑޮލަރެވެ. މިއީ 20849 ރުފިޔާއެވެ. ވޯލްޑޯފް އެސްޓޯރިއާ އިތާފުށިން އޮގަސްޓްމަހު ސަރވިސް ޗާޖުގެ ގޮތުގައި ވަނީ 1263.95 ޑޮލަރު ދީފައެވެ. މިއީ 19490 ރުފިޔާއެވެ. އޮގަސްޓްމަހު އެންމެ ދަށްކޮށް ސަރވިސް ޗާޖު ދިން ރިސޯޓްތަކުގެ އަދަދުތަށް އުޅެނީ 5000 ރުފިޔާއަށްވުރެ ދަށުގައެވެ.
ބައެއް ރިސޯޓްތަކުން ސަރވިސް ޗާޖު ނުދޭ މައްސަލައަކީ ރިސޯޓްތަކުގައި މަސައްކަތްކުރާ މުވައްޒަފުން ފާހަގަކުރާ މައްސަލައެކެވެ. ނަމަވެސް ރާއްޖޭގެ ވަޒީފާއާ ބެހޭ ޤާނޫނުން ވަނީ ސަރވިސް ޗާޖުގެ ގޮތުގައި ނަގާ ފައިސާ މުވައްޒަފުންނަށް ދިނުމަށް ލާޒިމްކޮށް ޤާނޫނު އިސްލާހުކޮށްފައެވެ. އަދި އެ ޤާނޫނާއި ހިލާފުވާ ފަރާތްތަކަށް ފިޔަވަޅު އަޅާނެކަމަށްވެސް ޤާނޫނުގައި ބަޔާންކޮށްފައިވެއެވެ.