އަންނަ ޖަނަވަރީ މަހުގެ ފުރަތަމަ ދުވަހުން ފެށިގެން ގޭގައި ފަތުރުވެރިންނަށް ޚިދުމަތް ދޭ ނިޒާމު "ހޯމް ސްޓޭ" ތައާރަފްކުރުމަށް މަސައްކަތްކުރަމުންދާކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ޓޫރިޒަމް މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ ޢަލީ ރައްޒާން ވިދާޅުވީ، ޓޫރިޒަމް މިނިސްޓްރީގެ ޑައިވަރސިފިކޭޝަން އެންޑް ލޯކަލައިޒޭޝަން ޓީމުން ރާއްޖޭގެ އެކި އަތޮޅުތަކަށް ކުރަމުންދާ ދަތުރުތަކުގައިވެސް ހޯމް ސްޓޭ ތައާރަފްކުރުމާއި ގުޅޭގޮތުން މަޝްވަރާކޮށް ކައުންސިލްތަކުގެ ޚިޔާލާއި މަޝްވަރާ ހޯދަމުންދާކަމަށެވެ. މިނިސްޓްރީގެ ވިސްނުން ހުރީ ޤާނޫނަށް ގެންނަންޖެހޭ ބަދަލުތައް ގެނައުމަށްފަހު އަންނަ ޖަނަވަރީ މަހުން ފެށިގެން މީހުން ދިރިއުޅޭ ހުރިހައި ރަށެއްގައި ހޯމް ސްޓޭ ތައާރަފްކުރުންކަމަށް ރައްޒާން ވިދާޅުވިއެވެ.
"ހޯމްސްޓޭއާއި ގުޅިގެން މިނިސްޓްރީން މިހާރު މިދަނީ އިންޑަސްޓްރީގެ ސްޓޭކްހޯލްޑަރުންނާއި މަޝްވަރާކުރަމުން. ހޯމް ސްޓޭގެ އެންމެ ބޮޑު ސްޓޭކްހޯލްޑަރަކަށް ވާނީ ރަށްރަށުގެ ކައުންސިލްތައް. މިދަތުރުގެ އެންމެ ބޮޑު ބޭނުމަކީ ކައުންސިލްތަކުގެ އިންޕުޑް މިކަމަށް ހޯދުން. ދެން މިނިސްޓްރީގެ ވިސްނުން މިހުރީ ޤާނޫނަށް ގެންނަންޖެހޭ ބަދަލުތައް ގެނެސްފައި 1 ޖަނަވަރީ 2022ގައި ރާއްޖޭގައި މީހުން ދިރިއުޅޭ ހުރިހައި ރަށެއްގައި ހޯމް ސްޓޭއަށް ހުއްދަދޭން." ރައްޒާން ވިދާޅުވިއެވެ.
ޓޫރިޒަމް މިނިސްޓްރީން ވިދާޅުވީ ރަށްރަށުގެ ކައުންސިލްތަކުން ތިބީ ހޯމް ސްޓޭ ތަޢާރަފުކުރަން ބޭނުންވެފައިކަމަށެވެ. ކައުންސިލްތަކުން ބޭނުންވަނީ ވީހާވެސް އަވަހަށް މިކަންކުރަންކަމަށް މިނިސްޓްރީން ވިދާޅުވެއެވެ.
ޓޫރިޒަމް މިނިސްޓްރީން ވިދާޅުވީ، ފަތުރުވެރިކަމުގެ ސިނާޢަތުގައި ޙަރަކާތްތެރިވާ އެސޯސިއޭޝަންތަކާއި އެހެނިގެން ފަރާތްތަކާއެކު ވަރަށް އަވަހަށް ސެމިނަރއެއް ބޭއްވުމަށް މަސައްކަތްކުރަމުން ދާކަމަށެވެ. އެއަށްފަހު ޤާނޫނަށް ގެންނަންޖެހޭ ބަދަލު ގެނައުމަށް މަޖިލީހަށް ފޮނުވާނެކަމަށް ޓޫރިޒަމް މިނިސްޓްރީން ވިދާޅުވެއެވެ.
ހޯމް ސްޓޭއަކީ ރާއްޖޭގެ ފަތުރުވެރިކަން ވަށައިޖެހޭ ނިޒާމަކަށް ހެދުމަށް ތަޢާރަފުކުރުން މުހިންމު ޕްރޮޑަކްޓެއްކަމަށް ފަތުރުވެރިކަމާބެހޭ ވަޒީރު ޑރ.ޢަބްދުﷲ މަޢުސޫމު މީގެކުރިން ވަނީ ވިދާޅުވެފައެވެ. ޑރ. މައުސޫމް ވިދާޅުވީ ހޯމް ސްޓޭއަކީ، ރައީސުލްޖުމުހޫރިއްޔާ އިބްރާހީމް މުޙައްމަދު ސާލިހުގެ ސިޔާސަތެއް ކަމަށްވާ ރަށްރަށަށް ފަތުރުވެރިކަން ގެނައުމުގެ ސިޔާސަތުގެ ތެރެއިން ކުރިއަށްދާ ޓުއަރިޒަމް ޑައިވާސިފިކޭޝަން ލޯކަލައިޒޭޝަން ޕްރޮޖެކްޓްގެ އެއް ކެޓެގަރީކަމަށެވެ.
ހޯމް ސްޓޭ ފަތުރުވެރިކަމަކީ، އެރަށެއްގައި ދިރިއުޅޭ ބަޔަކާއިއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ. މި ބާވަތުގެ ފަތުރުވެރިކަމަކީ ދުނިޔޭގެ ޤައުމުތަކުގައި ކާމިޔާބު ކަމާއެކު ހިންގާ އެއް މޮޑެލެވެ. ހޯމްސްޓޭ ޓުއަރިޒަމްގެ އިތުރުން، ސްޕޯޓްސް ޓުއަރިޒަމް، މައިސް ޓުއަރިޒަމް އަދި ކަލްޗަރަލް ޓުއަރިޒަމް ޕްރޮމޯޓްކުރުމުގެ މަސައްކަތް ސަރުކާރުން ދަނީ ކުރަމުންނެވެ.