އެގްރި ސެންޓަރުން ރިސޯޓްތަކަށް ތަކެތި ސަޕްލައި ކުރުމަށް ތައްޔާރުވަމުންދާކަމަށް އެސެންޓަރުން ހާމަކުރައްވައިފިއެވެ.
ދިވެހި ދަނޑުވެރިން ހައްދާ ތަކެތި ގަނެ، ދަނޑުވެރިންނަށް ހަމައަގު ހޯދައިދިނުމުގެ ބޭނުމުގައި އެސްޓީއޯއިން އެގްރި ސެންޓަރުގެ ނަމުގައި ސެންޓަރެއް ހުޅުވީ މިދިޔަ އޭޕްރީލްމަހުގެތެރޭގައެވެ. އެ ސެންޓަރުން މިހާރުވަނީ ރާއްޖޭގެ 500 އެއްހައި ދަނޑުވެރިން ރަޖިސްޓްރީކޮށްފައެވެ.
ޕީއެސްއެމް ނިއުސްއަށް ދެއްވި އިންޓަރވިއުއެއްގައި އެސްޓީއޯގެ އެގްރި ސެންޓަރުގެ އޮޕަރޭޝަންސް މެނޭޖަރ މުޙައްމަދު ޝަހާދު ވިދާޅުވީ ދަނޑުވެރިންގެ އުފެއްދުންތަކަށް ރަނގަޅު އަގެއް ހޯދައިދިނުމަށް އެ ސެންޓަރުން ގިނަ މަސައްކަތްތަކެއް ކުރަމުންދާ ކަމަށެވެ.
އެގޮތުން ރިސޯޓްތަކަށް ދަނޑުވެރިންގެ އުފެއްދުންތަށް ސަޕްލައިކުރަން އެކި ރިސޯޓްތަކާއެކު މަޝްވަރާކުރަމުންދާ ކަމަށް އޭނާ ވިދާޅުވިއެވެ. އަދި މި މަސައްކަތުގެ ދަށުން ރިސޯޓްތަކަށް ސަޕްލައިކުރަން ވަރަށް އަވަހަށް ފަށާނެ ކަމަށްވެސް ޝަހާދު ވިދާޅުވިއެވެ.
"ރިސޯޓްތަކާއި މަޝްވަރާ ކުރަމުން މިދަނީ ދާއިމީ ގޮތެއްގައި ރިސޯޓްތަކަށް ސަޕްލައިކުރެވޭނެ ގޮތްތަކާއި ގުޅޭގޮތުން. އުއްމީދަނީ މި މަސްތެރޭ ނޫނީ އަންނަ މަސްތެރޭ ރިސޯޓްތަކަށް ސަޕްލައި ކުރަން ފެށުން." ޝަހާދު ވިދާޅުވިއެވެ.
އެގްރި ސެންޓަރުން ދަނޑުވެރިންގެ އަތުން ގަންނަ ބާވަތްތައް ދަނީ ހޯލްސޭލްކޮށް ވިޔަފާރިތަކަށް ވިއްކަމުންނެވެ. މިއާއެކު ދަނޑުވެރިންނަށް ދެމެހެއްޓެނިވި ގޮތެއްގައި ދަނޑުވެރިކަން ކޮށް، އެކަމުން ލިބެންޖެހޭ ނަފާ ފުރިހަމަ ގޮތުގައި ލިބޭނެކަމަށް އެގްރި ސެންޓަރއިން ދެކެއެވެ.
އެގްރި ސެންޓަރުން މިހާރުވެސް ގާތްގަނޑަކަށް ފަންސާހަކަށް ވިޔަފާރިއަކަށް ދަނޑުވެރިކަމުގެ އުފެއްދުންތަށް ސަޕްލައިކޮށްދެމުންދާ ކަމަށް ޝަހާދު ވިދާޅުވިއެވެ.
އެސްޓީއޯ އެގްރި ސެންޓަރުން ދަނީ ދަނޑުވެރިންގެ އަތުން 16 ބާވަތެއް ގަންނަމުންނެވެ. އޭގެތެރޭގައި ހިމެނެނީ ކަރާ، ކެޕްސިކަމް، ޓޮމާޓޯ، ކައްޓަލަ، ދަނޑިއަލުވި، ކިޔުކަންބާ، މެލަން، ލެޓިއުސް، ޗައިނީޒް ކެބެޖް، ބީންސް، ބަށި، ބަރަބޯ، ބަޓާނަ، ފަތްކެޔޮ، ގިތެޔޮމިރުސް އަދި ތޮޅިމިރުހެވެ. އެގްރި ސެންޓަރުން ދަނީ އިތުރު ބާވަތްތަށްވެސް މިލިސްޓަށް އިތުރު ކުރުމަށް މަސައްކަތްކުރަމުންނެވެ.