ރ.މާމިގިލީގައި ތަރައްޤީކުރާ "ކޯރާކޯރާ މޯލްޑިވްސް" ރިސޯޓް އަންނަ މަހުގެ އެއްވަނަ ދުވަހު ހުޅުވުމަށް ތައްޔާރުވެއްޖެއެވެ.
ކޯރާކޯރާ މޯލްޑިވްސްއަށް ވެލާނާ އިންޓަރނޭޝަނަލް އެއަރޕޯޓުން ސީ ޕްލޭންގައި 45 މިނެޓުން ދެވޭނެއެވެ. 5 ތަރީގެ މި ރިިސޯޓުގައި ތަފާތު އެކި ކެއުންތައް ލިބޭ 4 ރެސްޓޯރެންޓު ހުރެއެވެ. ސްޕާއެއްގެ ޚިދުމަތާއި ޕަޑީ ސެޓިފައިޑް ސްކޫލެއްވެސް ހުރެއެވެ.
ތަފާތު ކޮންސެޕްޓަކަށް ތަރައްޤީކޮށްފައިވާ މި ރިސޯޓުން އެންމެ ފާހަގަކޮށްލެވެނީ ރާއްޖޭގެ ތާރީޚު ދައްކުވައިދޭ ދާރުލްއާސާރެވެ. މިއީ ރިސޯޓެއްގައި ހުޅުވާ މިފަދަ ފުރަތަމަ ދާރުލްއާސާރެވެ. އަދި ޤައުމީ ދާރުލްއާސާރު ފިޔަވަައި ރާއްޖޭގައި ދިވެހި ސަޤާފަތާއި ތާރީޚު ދައްކުވައިދޭ އެންމެ ގިނަ ޢަދަދެއްގެ ތަކެތި ފެންނަން ހުންނާނީ މި ދާރުލް އާސާރުންކަމަށް ކޯރާކޯރާ ރިސޯޓުން ހާމަކުރެއެވެ.
އެގޮތުން ރިސޯޓުގައިވަނީ އިންޑޯ ދާރުލް އާސާރަކާއި އައުޓް ޑޯ ދާރުލްއާސާރެއް ތަރައްޤީކޮށްފައެވެ. އާސާރީގޮތުން ފާހަގަކޮށްލެވޭ ގާތްގަނޑަކަށް 400 ތަކެއްޗާއި ސަޤާފަތް ދައްކުވައިދޭ ކުރެހުންތަކެއް މި ދާރުލްއާސާރުގައި ހުންނާނެ ކަމަށްވެސް އެ ރިސޯޓުން ހާމަކުރެއެވެ. އައުޓް ޑޯ ދާރުލް އާސާރުގައި ދިވެހިންގެ ދިރިއުޅުމުގެ އާދަކާދަތަށް ދައްކުވައިދޭ 120 އަހަރުވެފައިވާ ގެއަކާއި 900 އަހަރުވެފައިވާ ވެވެއް ހުންނާނެ ކަމަށް އެ ރިސޯޓުން ހާމަކުރެއެވެ.
ކޯރާކޯރާ މޯލްޑިވްސްގައި ތަފާތު އެކި ކެޓަގަރީތަކުގެ ކޮޓަރިތަށްވަނީ ތަރައްޤީކޮށްފައެވެ. އެގޮތުން ޖުމްލަ 100 ކޮޓަރީގެ ރިސޯޓުގައި ބީޗް ވިލާ އާއި މޫދު ވިލާވެސް ހުންނާނެއެވެ.