އޮތެންޓިކް މޯލްޑިވްސްގެ ފިހާރައެއް ކޮންމެ ރިސޯޓެއްގައި ހުޅުވުމަކީ އަމާޒެއްކަމަށް އިކޮނޮމިކް މިނިސްޓަރ އަލްއުސްތާޛު ފައްޔާޒު އިސްމާއިލް ވިދާޅުވެއްޖެއެވެ.
އިކޮނޮމިކް މިނިސްޓަރ ފައްޔާޒު މިހެން ވިދާޅުވީ އޮތެންޓިމް މޯލްޑިވްސްގެ ފިހާރައެއް ފުރަތަމަ ފަހަރަށް ރާއްޖޭގެ ރިސޯޓެއްގައި ހުޅުވުމަށް ބޭއްވި ރަސްމިއްޔާތުގައެވެ. މި ފިހާރަ ހުޅުވާފައިވަނީ މާލެ އަތޮޅު ކުޑަވިލިނގިލި ރިސޯޓްގައެވެ.
ކުޑަވިލިނގިލި ރިސޯޓްގައި ހުޅުވި އޮތެންޓިކް މޯލްޑިވްސްގެ ފިހާރަ ހުޅުވައިދެއްވީ ޓޫރިޒަމް މިނިސްޓަރ ޑރ އަބްދުﷲ މައުސޫމްއެވެ. މީގެއިތުރުން މިރަސްމިއްޔާތުގައި ވަނީ އޮތެންޓިކް މޯލްޑިވްސްގެ ވެބްސައިޓްވެސް ލޯންޗްކޮށްފައެވެ. މި ވެބްސައިޓް މެދުވެރިކޮށް ދުނިޔޭގެ ކޮންމެ ތަނެއްގައި ހުރެގެންވެސް އޮތެންޓިކް މޯލްޑިވްސްއިން ވިއްކާ އުފެއްދުންތައް ގަނެވޭނެކަމަށް ބީސީސީއިން ބުނެއެވެ.
މި ފިހާރަ ހުޅުވުމަށްފަހު ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓަރ އަލްއުސްތާޛު ފައްޔާޒު އިސްމާއިލް ވިދާޅުވީ، އޮތެންޓިކް މޯލްޑިވްސް ހުޅުވި އިރުވެސް އޭގެ މާކެޓެއްކަމަށް ބެލީ ރާއްޖެ އަންނަ ފަތުރުވެރިންކަމަށެވެ. އަދި އޮތެންޓިކް މޯލްޑިވްސްގެ އައުޓްލެޓެއް ރާއްޖޭގެ ކޮންމެ ރިސޯޓެއްގައިވެސް ހުޅުވުމަކީ އަމާޒެއްކަމަށް މިނިސްޓަރ ވިދާޅުވިއެވެ.
އޮތެންޓިކް މޯލްޑިވްސްއިން ވިއްކާ އުފެއްދުންތަކަށް މާކެޓް އެބައޮތްކަމަށާއި، ދެން މަސައްކަތްކުރާނީ ދިވެހި އުފެއްދުންތެރިކަމުގެ ފެންވަރާއި ކޮލެޓީ މިހާރަށްވުރެ ރަނގަޅުކުރުމަށް މިނިސްޓަރ ވިދާޅުވިއެވެ.
"އަބަދުވެސް އަޅުގަނޑުމެންގެ ގޯލަކަށް ވެފައިއޮތީ ފަތުރުވެރިންނާއި ހަމައަށް އައުން. ކޮންމެ ރިސޯޓެއްގަވެސް ސްވެނިއަރ ޝޮޕެއް އެބަހުރޭ. އަޅުގަނޑުމެން ބޭނުންވީ ދިވެހި ސްވެނިއަރ ޝޮޕެއް ރިސޯޓްތަކުގައި ހުރުން. އެ މަސައްކަތުގެ ފުރަތަމަ ކާމިޔާބީ މީދެން. ރިސޯޓުން އަމިއްލައަށް އަޅުގަނޑުމެންނަށް ރިކުއެސްޓް ކުރީވެސް މިތަން ހުޅުވަން. އަދި ވަރަށް ރަނގަޅު ލޮކޭޝަންއެއްގައި އެބޭފުޅުން މިކަން ހަމަޖައްސައިދިނީ. އަޅުގަނޑު ގަބޫލުކުރާ ގޮތުގައި ރާއްޖޭގެ ހަމަ ކޮންމެ ރިސޯޓަކީވެސް އެކަހަލަ އިންޓްރެސްޓް ހުރި ރިސޯޓްތަކެއް. އަޅުގަނޑުމެން މިދަނީ އެކިއެކި ރިސޯޓްތަކާއިވެސް ވާހަކަދައްކަމުން. އަޅުގަނޑުމެންގެ އުންމީދަކީ ދިވެހިރާއްޖޭގެ ކޮންމެ ރިސޯޓެއްގައި އޮތެންޓިކް މޯލްޑިވްސްގެ ފިހާރައެއް ނޫނީ ކޮންމެވެސް ވަރެއްގެ އައުޓްލެޓެއް އިނުން." މިނިސްޓަރ ފައްޔާޒު ވިދާޅުވިއެވެ.
ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، ރާއްޖޭގެ ރިސޯޓެއްގައި ދިވެހި އުފެއްދުންތެރިން ތައްޔާރުކުރާ އެއްޗެހި ވިއްކާލާނެ ފުރުސަތެއް ލިބުމަކީ ވަރަށް ބޮޑު އުފަލެއްކަމަށެވެ. އަދި ކުރިއަށް އޮތްތަނުގައި ބީސީސީއަށް ތަކެތި ވިއްކާ އުފެއްދުންތެރިންގެ އަދަދު ހާހުން އިތުރުވެގެންދިއުމާއި، މުޅި ދުނިޔޭގައިވެސް ދިވެހި ސްވެނިއަރއަކީ އަގު އުފުލި ހިނގައިގަތުމަކީ އުއްމީދެއްކަމަށް މިނިސްޓަރ ވިދާޅުވިއެވެ.
"ވަރަށް އުފާވި ދުވަހެއް މިއަދު މީ. ރާއްޖޭގެ ރިސޯޓެއްގައި ދިވެހި އުފެއްދުންތެރިން ތައްޔާރުކުރާ އެއްޗެހި ވިއްކާލާނެ ފުރުސަތެއް މިލިބުނީ. ބީސީސީގެ ފަރާތުން އޮތެންޓިކް މޯލްޑިވްސްގެ ފިހާރައެއް ރިސޯޓެއްގައި ހުޅުވި ހުޅުވުންމީ ވަރަށް ބޮޑު ކުރިއެރުމެއް. ދުނިޔޭގެ ހުރިހައި ގައުމެއްގަވެސް ހުރިހައި ގައުމެއްގެ އުފގެއްދުންތައް އުޅޭނެ. ސްވެނިއަރގެ ތަފާތު އެއްޗެހިތައް ހުންނާނެ. ނަމަވެސް އެ ޤައުމެއްގެ އަސްލު އުފެއްދުން ވަރުގެ އެއްޗެއް ނުހުންނާނެ." މިނިސްޓަރ މައުސޫމް ވިދާޅުވިއެވެ.
ޕީއެސްއެމް ނިއުސްއަށް ވާހަކަދައްކަވަމުން މިނިސްޓަރ އޮފް އާރޓްސް އެންޑް ކަލްޗަރ ޔުމްނާ މައުމޫން ވިދާޅުވީ، ދިވެހިންގެ ޒަމާންވީ ސަގާފީ މަސައްކަތްތައްވެސް ކުރިއެރުވޭނީ އެއަށް މާކެޓެއް އޮވެގެން އެ ޕްރޮމޯޓްކޮށް ވިއްކޭނެ ގޮތްތަކެއް ހެދިގެންކަމަށެވެ. ބީސީސީން ކުރައްވާ މަސައްކަތަކީ މިކަހަލަ އަތްތެރި މަސައްކަތުގެ ބާވަތްތަކާއި އަދި ފަންނީ އެކިއެކި އުފެއްދުންތައް މާކެޓްކޮށްދެއްވައި ޕްރޮމޯޓްކޮށްދެއްވުމުގެ މަސައްކަތްކަން މިނިސްޓަރ ޔުމްނާ ފާހަގަކުރެއްވިއެވެ.
"ދިވެހިރާއްޖޭގެ ފަންނީ އުފެއްދުންތަކާއި ސަގާފީ މަސައްކަތްތެރިން އުފައްދަވާ އުފެއްދުންތައް ފަތުރުވެރިންނަށް މާކެޓް ކުރުމަށް ރިސޯޓްތަކުގައި މިފަދަ އައުޓްލެޓްތައް ހުރުން ވަރަށް މުހިންމު. އަޅުގަނޑުމެންގެ ޒަމާންވީ ސަގާފީ މަސައްކަތްތައްވެސް ކުރިއެރުވޭނީ ހަގީގަތުގައި އެއަށް މާކެޓެއް އޮވެގެން އެ ޕްރޮމޯޓްކުރެވި އެ ވިއްކޭނެ ގޮތްތަކެއް ހެދިގެން. އެހެންވީމަ ބީސީސީން ކުރައްވާ މަސައްކަތަކީ މިކަހަލަ އަތްތެރި މަސައްކަތުގެ ބާވަތްތަކާއި އަދި ފަންނީ އެކިއެކި އުފެއްދުންތައް މާކެޓްކޮށްދެއްވައި ޕްރޮމޯޓްކޮށްދެއްވުން. މިކަހަލަ އައުޓްލެޓްތައް ރިސޯޓްތަކުގައި ގިނައިން ހުޅުވުނު ވަރަކަށް މާކެޓް އިތުރުވެގެންދާނެ. އާމްދަނީ ލިބޭނެ ފުރުސަތުތަކެއް ލިބިގެންދާނެ." މިނިސްޓަރ ޔުމްނާ ވިދާޅުވިއެވެ.
ކުޑަވިލިނގިލި ރިސޯޓްގެ ޖެނެރަލް މެނޭޖަރ ބެންޖަމިން ވިދާޅުވީ، ދިވެހި އުފެއްދުންތައް ދައްކާލާ ވިއްކާލުމަށް އޮތެންޓިކް މޯލްޑިވްސްގެ ފިހާރައެއް ކުޑަވިލިނގިލީގައި ހުޅުވުމަކީ ލިބޭ ވަރަށް ބޮޑު އުފަލެއްކަމަށެވެ. އެ ރިސޯޓަށް ޒިޔާރަތްކުރާ ފަތުރުވެރިންނަށް ދިވެހި ސަޤާފަތާއި ދިވެހި އުފެއްދުންތައް އަނބުރާ ގައުމަށް ގެންދިއުމުގެ ފުރުސަތު މި ފިހާރައާއިއެކު ހުޅުވިގެންދާނޭކަމަށް އޭނާ ވިދާޅުވިއެވެ. މީގެއިތުރުން ދިވެހި އުފެއްދުންތެރިންނަށް އެމީހުންގެ އުފެއްދުންތައް ފަތުރުވެރިންނާއި ހަމައަށް ފޯރުކޮށްދިނުމަކީވެސް އެ ރިސޯޓްގައި އޮތެންޓިކް މޯލްޑިވްސްގެ ފިހާރައެއް ހުޅުވުމުގެ ބޭނުންކަމަށް އޭނާ ވިދާޅުވިއެވެ.
އޮތެންޓިކް މޯލްޑިވްސްގެ ފިހާރައެއް އެންމެ ފުރަތަމަ ހުޅުވާފައިވަނީ އެއަރޕޯޓް ޑިއުޓީ ފްރީގައެވެ. ނަމަވެސް އޭގެފަހުން ހުޅުމާލެއާއި މާލޭގައިވެސް މިހާރު އޮތެންޓިކް މޯލްޑިވްސްގެ ފިހާރަތައް އަންނަނީ ހިންގަމުންނެވެ. އޮތެންޓިކް މޯލްޑިވްސްއާއިއެކު މިހާރު 100 އަށްވުރެ ގިނަ އުފެއްދުންތެރިން އަންނަނީ މަސައްކަތް ކުރަމުންނެވެ.