ބިލިއަނަރު އެލަން މަސްކުގެ ސްޕޭސް އެކްސްގެ ދަށުން ހިންގާ ސްޓާ ލިންކް އިންޓަނެޓު ޚިދުމަތް ދިނުމަށް އިންޑިއާގައި ކުންފުންޏެއް ރަޖިސްޓްރީ ކޮށްފިއެވެ.
ސްޓާލިން ކުންފުނީގެ ކަންޓްރީ މެނޭޖަރ ސަންޖޭ ބަރްގާވާ ކޮށްފައިވާ ޕޯސްޓަކާއި ހަވާލާދީ އަލްޖަޒީރާއިން ބުނެފައިވަނީ މިހާރު ސްޕޭސް އެކްސްގެ 100 އިންސައްތަ ހިއްސާ އޮންނަ ސްޓާ ލިންކްގެ ކުންފުންޏެއް އިންޑިއާގައި ރަޖިސްޓްރީ ކޮށްފައިވާ ކަމަށެވެ. އަދި ބޭންކް އެކައުންޓުތައް ހުޅުވާ ޚިދުމަތް ދޭން ފެށުމުގެ ކުރިން އެކުންފުންޏަށް ބޭނުންވާ ލައިސެންސްތައް ހޯދުމުގެ މަގުފަހިވެފައިވާ ކަމަށްވެސް އޭނާ ވަނީ ބުނެފައެވެ.
ސްޓަރ ލިންކަކީ ސެޓެލައިޓު މެދުވެރިކޮށް ދުނިޔޭގެ އެކި ކަންކޮޅުތަކަށް ހައި ސްޕީޓް އިންޓަނެޓު ޚިދުމަތް ދިނުމަށް މަސައްކަތް ކުރަމުން އަންނަ ފަރާތެކެވެ. ސްޓާ ލިންކް މައިގަނޑުގޮތެއްގައި އަމާޒުކޮށްފައިވަނީ ފަސޭހައިން އިންޓަނެޓު ފޯރުކޮށް ނުދެވޭ ވަކިން އޮންނަ ސަރަހައްދުތަކަށް އިންޓަނެޓު ފޯރުކޮށްދިނުމަށެވެ. ނަމަވެސް ސްޓަރ ލިންކް ޚިދުމަތް ބޭނުންވާ ފަރާތްތަކަށް އެޚިދުމަތް ހޯދުމަށް ރަޖިސްޓްރީ ކުރެވޭނެއެވެ.
އިންޑިއާގައި ސްޓަރލިންކް ކުންފުނި ރަޖިސްޓްރީކޮށް ނިމިފައިވާއިރު ދިއްލީއާއި ކައިރި ބައެއް ސަރަހައްދުތަކުގެ ސްކޫލްތަކަށް އެކުންފުނީގެ 100 ޑިވައިސް ހިލޭ ދިނުމަށް ވަނީ ހަމަޖެހިފައެވެ. އޭގެ ފަހުން ވަކިން އޮންނަ 12 ސަރަހައްދަކަށް ޚިދުމަތް ދިނުމަށް އެކުންފުނިން އަމާޒު ހިފާނެއެވެ.
އެކުންފުނީގެ އަމާޒަކީ ޑިސެމްބަރު 2022 ނިމެންވާއިރަށް 200،000 ޑިވައިސް އިންޑިއާގެ އެކި ސަރަހައްދުތަކަށް ފޯރުކޮށްދިނުމެވެ. މީގެ ތެރެއިން 80 އިންސައްތަ ޑިވައިސްއަކީ އިންޓަނެޓު ޚިދުމަތް ދިނުމަށް ބޭނުންވާ ވަސީލަތް މިހާރު ޤާއިމު ކުރުމަށް ދަތިވެފައިވާ ސަރަހައްދުތަކަށް ފޯރުކޮށްދޭ ތަކެއްޗެވެ. އެކުންފުންޏާއި ހަވާލާދީ އަލްޖަޒީރާއިން ބުނާ ގޮތުގައި މިހާރުވެސް އިންޑިއާއިން އެކުންފުނީގެ 5000 ޑިވައިސް ޕްރީއޯޑަރ ކޮށްފައިވެއެވެ.