މިއަހަރުގެ ތިންވަނަ ކުއާޓަރުގައި އެމްޓީސީސީއަށް 485 މިލިއަން ރުފިޔާގެ އާމްދަނީއެއް ލިބިއްޖެއެވެ. މިއީ މިއަހަރުގެ ދެވަނަ ކުއާޓަރުގައި އެމްޓީސީސީއަށް އާމްދަނީގެ ގޮތުގައި ލިބުނު 423 މިލިއަން ރުފިޔާ އާއި އަޅާ ބަލާއިރު، 14.5 އިންސައްތަ އިތުރު އަދަދެކެވެ.
ތިންވަނަ ކުއާޓަރުގައި އެމްޓީސީސީއަށް އެންމެ ބޮޑު އާމްދަނީއެއް ލިބިފައިވަނީ ބިންހިއްކުމުގެ މަސައްކަތުންވެެ. އަދި ދެވަނަ އަށް އެންމެ ބޮޑު އާމްދަނީއެއް އެމްޓީސީސީއަށް ލިބިފައިވަނީ ޓްރޭޑިންގ އެންޑު ޓްރާންސްޕޯޓު ސެގްމަންޓުންނެވެ.
އެމްޓީސީސީން އާއްމުކޮށްފައިވާ އެކުންފުނީގެ މިއަހަރުގެ ތިންވަނަ ކުއާޓަރުގެ މާލީ ހިސާބުތައް ދައްކާގޮތުން އެ ކުއާޓަރުގައި ޓެކްސްއަށް ކެނޑުމަށްފަހު ފައިދާގެ ގޮތުގައި އެމްޓީސީސީއަށް ލިބިފައިވަނީ 55.6 މިލިއަން ރުފިޔާއެވެ. މި ނަތީޖާއާއެކު ހިއްސާއަކަށް ޖެހުނު ފައިދާވަނީ 6.9 ރުފިޔާއަށް އަރާފައެވެ.
ތިންވަނަ ކުއާޓަރުގައި ލިބުނު އާމްދަނީއާއި އެކު މިއަހަރުގެ ސެެޕްޓެމްބަރުމަހުގެ ނިޔަލަށް އެމްޓީސީސީއަށް ލިބުނު އާމްދަނީގެ ޖުމްލަ އަދަދުވަނީ 1.3 ބިލިއަން ރުފިޔާއަށް އަރާފައެވެ. އަދި ސާފު ފައިދާގެ އަދަދުވަނީ 212.8 މިލިއަނަށް އަރާފައެވެ.
އަދި އެމްޓީސީސީއަށް ދަތުރުފަތުރުކުރުމުގެ ދާއިރާއިން ކުރިއެރުން ލިބި، ގިނަ އަދަދެއްގެ އާ ޕްރޮޖެކްޓުތައްވެސް ލިބިފައިވާއިރު، މިއަހަރު ނިމޭއިރު އެމްޓީސީސީއަށް އާމްދަނީގެ ގޮތުގައި 1.8 ބިލިއަން ރުފިޔާ ލިބޭނެ ކަމަށް އެކުންފުނިން ލަފާކުރެއެވެ. އަދި އަހަރު ނިމޭއިރު ސާފު ފައިދާގެ ގޮތުގައި 270 މިލިއަން ރުފިޔާ ލިބޭނެ ކަމަށްވެސް އެމްޓީސީސީން ލަފާކުރެއެވެ.
ރާއްޖޭގެ އުތުރާއި ދެކުނުން ތަރައްޤީގެ ބިޔަ މަޝްރޫޢުތަކެއް އެމްޓީސީސީން ހިންގަމުންއަންނައިރު މި ކުންފުނީގެ އެންމެ ބޮޑު އަމާޒަކަށް ވެފައިވަނީ އަސާސީ ޚިދުމަތްތައް ވީހާވެސް އަވަސްކަމާއިއެކު ރައްޔިތުންނަށް ފޯރުކޮށްދިނުމެވެ. މަގުހެދުމާއި، ބިންހިއްކުމާއި، ބަނދަރުހެދުން، ދަތުރުފަތުރުގެ ޚިދުމަތާއި، އެއަރޕޯޓުހެދުމުގެ މަސައްކަތްތަކަކީ އެމްޓީސީސީން ކުރަމުން އަންނަ މަސައްކަތްތަކެވެ.