އެގްރޯނެޓްއިން މިހާރު ރާއްޖޭގެ 12 ރިސޯޓަކަށް ދިވެހި ދަނޑުވެރިންގެ އުފެއްދުންތައް ސަޕްލައި ކުރަމުންދާކަމަށް އެކުންފުނިން ބުނެފިއެވެ.
ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް ސަރުކާރުން އުފައްދާފައިވާ ކުންފުނި، އެގްރޯނެޓުން ދަނީ ރާއްޖޭގެ އެކި ހިސާބުތަކުގައި ދަނޑުވެރިކަމުގެ މަސައްކަތްކުރަމުންދާ ފަރާތްތަކާއެކު ކޮންޓްރެކްޓްތައް ޤާއިމްކޮށް އެފަރާތްތަކާއި ގުޅިގެން މަސައްކަތްތައް ކުރަމުންނެވެ.
އެއްބަސްވުން ޤާއިމްކޮށްފައިވާ ދަނޑުވެރިންނާއެކު އެގްރޯނެޓުން ދަނީ 17 ބާވަތެއް ހެއްދުމުގެ މަސައްކަތްކުރަމުންނެވެ. އެ 17 ބާވަތަކީ ބަރަބޯ، ފަތްކެޔޮ، ބަށި، މެލަން، ފަޅޯ، ކަރާ، ބަޓަރ ނަޓްސް، ޓޮމާޓޯ، ކިއުކަމްބާ، ޗިޗަންޑާ، ތޮރާ، މާމިއާ ތޮޅި، ބީންސް، ކެޕްސިކަމް، ލެޓިއުސް، ކެބެޖް، ޗައިނީސް ކެބެޖްއެވެ. މިހާރު މީގެތެރެއިން ގިނަ ބާވަތްތަކެއް ބާޒާރަށް ވަނީ ނެރެވިފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ 12 ރިސޯޓަކަށް ސަޕްލައިކުރަން ފަށާފައިވާއިރު، ރިސޯޓުތަކަށް ބޭނުންވާ ވަރަށް ތަކެތި އުފައްދުމަށް އެކުންފުނިން ގިނަ މަސައްކަތްކުރަމުންދާކަމަށެވެ.
”އަދި ކިރިޔާ ހާވެސްޓު ކުރަން ފެށުނީ، ދަނޑުވެރިން ހައްދާ ތަކެތި ގަންނަން އަދި މި ފެށުނީ، މިވީތާނގައި 12 ރިސޯޓަކަށް ސަޕްލައިކުރަން ފަށައިފިން، ރިސޯޓުތަކަށް ސަޕްލައިކުރާއިރު، އެބަޖެހޭ ރިސޯޓުތަކަށް ބޭނުންވާ ވަރަށް މިތަކެތި އުފައްދާ ރިސޯޓުތަކަށް ސަޕްލައިކުރެވޭނެ އިންތިޒާމް ހަމަޖައްސަން،" ހާރޫން ވިދާޅުވިއެވެ.
އެގްރޯ ނެޓުންދަނީ ދަނޑުވެރިންގެ އުފެއްދުންތައް މާލޭގެ ލޯކަލް މާރުކޭޓަށާއި، ހޯލްސޭލްކޮށް ތަކެތި ވިއްކާ ފަރާތްތަކަށް ފޯރުކޮށްދެމުންނެވެ. ހާރޫން ވިދާޅުވީ އެކުންފުނީގެ އަމާޒަކީ ތާޒާ ކަންމަތީ ރާއްޖޭގެ ރިސޯޓުތަކަށްވެސް ދިވެހި ދަނޑުވެރިންގެ އުފެއްދުންތައް ފޯރުކޮށްދިނުން ކަމަށެވެ.
އެގްރޯ ނެޓުގެ ފަރާތުން ކުރިއަށްގެންދާ "ކޮންޓްރެކްޓް ފާމިން"ގެ ދަށުން އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެ ކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓް ކުރެވޭނެކަމުގެ ފުރިހަމަ ޔަޤީންކަން ލިބިގެންދާނެއެވެ. އަދި ދިވެހި ދަނޑުވެރިންގެ އުފެއްދުންތަކަށް ހަމައަގު ލިބިގެންދާނެއެވެ.