އިންސާނަކާ ނުލާ ދުއްވާ ޑެލިވަރީ ޓްރަކްތައް އެމެރިކާގެ ވޯލްމާޓުގައި ބޭނުންކުރަން ފަށައިފިއެވެ.
އެމެރިކާގެ ވޯލްމާޓް ފިހާރަތަކުގައި މި ޑެލިވަރީ ޓްރަކްތައް ބޭނުންކުރަން ފަށާފައިވަނީ، ވޯލް މާޓުގެ ގުދަންތަކުން ވޯލް މާޓުގެ ރީޓެއިލް ސްޓޯރުތަކަށް މުދާ ފޯރުކޮށްދިނުމަށެވެ. މިއީ ބޮޑު ވިޔަފާރިއަކުން މުދާ އުފުލުމުގައި އިންސާނަކާ ނުލާ ޓްރަކްތައް ބޭނުން ކުރަން ފެށި ފުރަތަމަ ފަހަރެވެ. މީގެ ކުރީން އިންސާނުންގެ އެހީއާއި ނުލާ ދުއްވާ ކާރުތައް އުފައްދައި އާންމު ބޭނުންތަކަށް ދޫކޮށްފައިވިއަސް މިއީ މުދާ އުފުލުމަށް މިފަދަ ޓްރަކްތައް ބޭނުންކުރާ ފުރަތަމަ ފަހަރު ކަމަށް މި ޓްރަކު އީޖާދު ކުރި ގެޓިކް ކުންފުނިން ބުނެއެވެ.
އެމެރިކާގެ އާރްކަންސަސްގެ ބެންޓަންވިލް ސަރަހައްދުގައި މި ޓްރަކުތައް ބޭނުން ކުރަން ފަށާފައިވާއިރު، މި ޓްރަކްތައް މިވަގުތު ދުއްވަނީ ބަދަލު ނުވާ ރޫޓެއްގައެވެ. އެގޮތުން ގާތްގަނޑަކަށް 7 މޭލުގެ ރާސްތާއެއް ކޮންމެ ދުވަހަކުހެން މި ޓްރަކުތައް ކަޑައްތު ކުރެއެވެ.
މި ޓްރަކުތަކުގައި މީހަކަށް އިށީނދެ އިނދެ، ކޮންޓްރޯލް ކުރެވޭނެ ނިޒާމެއްވެސް ވަނީ ޤާއިމު ކުރެވިފައެވެ. މިއީ ރައްކާތެރިކަމަށްޓަކައި އެއްވެސް ހާލަތެއްގައި މަޑުކޮށް ނުވަތަ އެހެން ގޮތަކަށް ޢަމަލު ކުރަން ޖެހިއްޖެ ނަމަ ޤާއިމު ކުރެވިފައިވާ ނިޒާމެއް ކަމަށް ގެޓިކް ކުންފުނީގެ ސީއީއޯ ގޯތަމް ނާރަނގް ބުނެއެވެ. އަދި މައްސަލައެއް ދިމާވެއްޖެ ހާލަތެއްގައި އިތުރު އުޅަނދެއް އަބަދުވެސް ތައްޔާރަށް އޮންނަކަންވެސް އޭނާ ފާހަގަކުރިއެވެ.
މިމަސައްކަތާއި ގުޅިގެން ވޯލްމާޓުން ބުނެފައިވަނީ އެކުންފުނިން ގެޓިކްއާއެކު ކުރި މަސައްކަތުން މިއީ ދެމެހެއްޓެނިވި އަދި ޙަރަދު ކުޑަ އަދި އަވަސް ނިޒާމެއް ކަމަށް ފާހަގަވެފައިވާ ކަމަށެވެ. މިއާއެކު މިޙިދުމަތް ވޯލްމާޓުގެ ފިހާރަތައް ހުންނަ އެހެން ސަރަހައްދުތަކަށް ފުޅާ ކުރާނެކަމަށް ބެލެވެއެވެ.