އެމެރިކާގެ ވޮޝިންޓަނުގައި ހުންނަ ޓްރަމްޕް އިންޓަނޭޝަނަލް ހޮޓެލް 375 މިލިއަން ޑޮލަރަށް ވިއްކާލުމަށް އެއްބަސްވުމަކާއި ހިސާބަށް އާދެވިފައިވާކަމަށް މީޑިއާ ރިޕޯޓުތައް ބުނެފިއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މި ހޮޓަލް ވިއްކާލުމުގެ މަސައްކަތް ޓްރަމްޕް އޯގަނައިޒޭޝަނުން 2019 އަހަރުން ފެށިގެން ދަނީ ކުރަމުންނެވެ. އެގޮތުން، މި ހޮޓަލް ހިލްޓަން ގްރޫޕުން ހިންގާއިރު ހޮޓަލުގެ ނަން ވަލްޑޯފް އެސްޓޯރިއާއަށް ބަދަލު ކުރާނެ ކަމަށް ރިޕޯޓުތައް ބުނެއެވެ. އެމެރިކާގެ މަޔާމީއަށް ނިސްބަތްވާ ސީޖީއާއި މާޗެންޓް ޤުރޫޕާއެކު ވެވުނު މި އެެއްބަސްވުން މިއަންނަ އަހަރު ފުރަތަމަ ކުއާޓާގެ ތެރޭގައި ފައިނަލް ކުރެވޭނެކަމަށް ރިޕޯޓުތަށް ބުނެއެވެ.
މުޅި ޖުމްލަ 263 ކޮޓަރި ހިމެނޭ މި ހޮޓަލް މަޝްހޫރުވެގެން ދިޔައީ 2016 ވަނަ އަހަރު އެމެރިކާގެ ރިޔާސީ އިންތިހާބަށް ޓްރަމްޕް ވާދަ ކުރާނެކަން އިއުލާން ވެގެން ދިޔަ ހިސާބުންނެވެ. އޭރު ހޮޓަލް އާންމުންނަށް ހުޅުވާލުމާއިއެކު އޭނާއަށް ތައީދުކުރާ ރިޕަބްލިކަން ޕާޓީގެ މީހުން ހޮޓަަލަށް އައިސް އުޅުނެވެ.
ވައިޓް ހައުސްއާއި މާ ދުރުނޫން ސަރަހައްދެއްގައި ހުންނަ މި ހޮޓަލަކީ ވަރަށް ބޮޑު ފައިދާއެއް ލިބޭ ހޮޓަލެއް ކަމަށް ޓްރަމްޕް ވަނީ އޭނާގެ ވެރިކަމުގެ ދައުރުގައި ވިދާޅުވެފައެވެ. އަދި އަހަރެއްގެ މައްޗަށް 150 މިލިއަން ޑޮލަރުގެ ފައިދާވާ ކަމަށް އޭނާ ވިދާޅުވިއެވެ.
ނަމަވެސް ޓްރަމްޕްގެ މި ދައުވާތައް ދާދި ފަހުން އެމެރިކާގެ ކޮންގްރެޝަނަލް އިންކުއަރީއަކުން ވަނީ ދޮގުކޮށްފައެވެ. އެގޮތުން އިންކުއަރީން ހޯދި ހޯދުންތަކުން މި ހޮޓަލަށް އެއްވެސް ފައިދާ ނުވާތާނގައި، ވަނީ ބޮޑު ގެއްލުމަކާއި ކުރިމަތިވެފައެވެ.