ޕީކް-ސީޒަން ރަނގަޅަށް ކުރިއަށް ގެންދިޔުމަށް އަޅަންޖެހޭ ކޮންމެ ފިޔަވަޅެއްވެސް އެޅުން މި ދަނޑިވަޅުގައި މުޙިއްމުކަމަށް ޓޫރިޒަމް މިނިސްޓަރ ޑރ. އަބްދުﷲ މަޢުސޫމް ވިދާޅުވެއްޖެއެވެ.
މިނިސްޓަރ މައުސޫމް މިހެން ވިދާޅުވީ މިހާރު ފެތުރެމުންދާ ކޯވިޑްގެ އައު ވޭރިއަންޓް "އޮމިކްރޯން"އިން ރައްކާތެރިވުމަށް އަޅާ ފިޔަވަޅެއްގެ ގޮތުން އެފްރިކާ ސަރަހައްދުގެ 7 ޤައުމަކުން ރާއްޖެއަށް މީހުން އެތެރެވުން މަނާކުރުމާއި ގުޅިގެންނެވެ.
ޕީއެސްއެމް ނިއުސްއާ ވާހަަކަދައްކަވަމުން މިނިސްޓަރ ވިދާޅުވީ ސަރުކާރުން މި އެޅި ފިޔަވަޅަކީ ރަނގަޅު ފިޔަވަޅެއް ކަމަށެވެ. މިނިސްޓަރ ވިދާޅުވީ މި ފިޔަވަޅާއެކު އެންމެ ބޮޑު އަސަރެއް ކުރާނީ ސައުތު އެފްރިކާއިން ރާއްޖެއަށް އަންނަ ފަތުރުވެރިންގެ އަދަދަށް ކަމަށެވެ.
"ސައުތު އެފްރިކާ މަރކެޓުން މަހެއްގެ މައްޗަށް 1500 ވަރަކަށް ފަތުރުވެރިން މިދުވަސްކޮޅު އަންނާނެ ކަމަށް ބެލެވޭ، އެއްމެ ފަތުރުވެރިއެއްވެސް މަދުވާކަމީ ކަންބޮޑުވާ ކަމެއް، އެހެން ނަމަވެސް ކުރިއަށް އޮތް ޕީކް ސީސަން ރަނގަޅު ސީސަނެއްގެ ގޮތުގައި ކުރިއަށް ގެންދިޔުމަށް އަޅަންޖެހޭ ކޮންމެ ފިޔަވަޅެއްވެސް އެޅުން މުޙިއްމު،" މިނިސްޓަރ މައުސޫމް ވިދާޅުވިއެވެ.
މިނިސްޓަރ ވަނީ ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން ސަރުކާރުން އަޅާ ފިޔަވަޅުތައް ތަންފީޒްކުރުމަށްދޭ އަހައްމިއްޔަތު ފާހަގަކުރައްވާފައެވެ.
"ބޮޑެތި ތަޖުރިބާތަކެއް އިންޑަސްޓްރީ ޕާޓްނަރުން ހޯދައިފި، އަބަދުވެސް ސާބަސް ދެމުން މިދަނީ އިންޑަސްޓްރީ ޕާޓްނަރުން މިކަމަށް ހުށިހާރުކަމަށް، ސަރުކާރުން ކަނޑައަޅާ ކަންކަން ތަންފީޒްކުރުމަށް ދޭ އަޙައްމިއްޔަތަށް،" މިިނިސްޓަރ މައުސޫމް ވިދާޅުވިއެވެ.
ކޯވިޑްގެ އައު ވައްތަރެއް ދެކުނު އެފްރިކާއިން ފެނި މިއީ ކޯވިޑްގެ ކަންބޮޑުވާންޖެހޭ ބާވަތެއްގެ ވޭރިއަންޓެއްކަން ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިންވެސް ވަނީ ކަނޑައަޅާފައެވެ. ކޯވިޑްގެ އައު ވޭރިއަންޓުން ރައްކާތެރިވުމަށް އެޅި ފުރަތަމަ ފިޔަވަޅެއްގެ ގޮތުން މިރޭ ދަންވަރު ބާރައިން ފެށިގެން ރާއްޖެއަށް މީހުން އެތެރެވުން މަނާކޮށްފައިވަނީ ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮސްޓްވާނާ، ޒިންމްބާބްވޭ އަދި އެސްވަޓީނީންނެވެ.
އެޗްޕީއޭއިން ކުރި އިއުލާނެއްގައި ވިދާޅުވީ ރާއްޖެ އައުމުގެ 14 ދުވަސްކުރިން މި ޤައުމުތަކަށް ދަތުރުކޮށްފައިވާ މީހުންނާއި އެއިން ޤައުމެއްގައި 12 ގަޑިއިރަށްވުރެ ގިނައިރު ޓްރާންސިޓްވެފައިވާ މީހުންނަށް މިވަގުތު ރާއްޖެއަށް އެތެރެނުވެވޭނެ ކަމަށެވެ.