އަތޮޅުތަކުގައި ލޯކަލް ޓޫރިޒަމް ފުޅާކުރުމަށް 9 އަތޮޅެއްގެ ކައުންސިލާއެކު މިހާތަނަށް މަޝްވަރާކޮށްފައިވާ ކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
މި ބައްދަލުވުންތަކުގެ އެންމެ ބޮޑު ބޭނުމަކީ ފަތުރުވެރިކަމުގެ ނަފާ ރައްޔިތުންނަށް ހޯދައިދީ ރާއްޖޭގެ ރަށްރަށުގައި ލޯކަލް ޓޫރިޒަމް ފުޅާކުރުން ކަމަށް ޓޫރިޒަމް މިނިސްޓްރީން ވިދާޅުވެއެވެ.
ރަށްރަށުގެ ފަތުރުވެރިކަމުގެ ހާލަތު ދެނެގަނެ ލޯކަލް ޓޫރިޒަމް އިތުރު ހަރުފަތަކަށް ގެންދިއުމަށް ކުރެވެންހުރި ކަންތައްތައް ފާހަގަކޮށް އެކަންކަން ރާވާ ހިންގުމާއި ގުޅޭގޮތުން މަޝްވަރާކުރުމަށް ޓޫރިޒަމް މިނިސްޓްރީން އަތޮޅުތަކުގެ ރަށްތަކަށް ދަތުރުތައް ފެށީ މިއަހަރުގެ އޮގަސްޓް މަހުގެ ތެރޭގައެވެ. މި ދަތުރުތަކުގައި ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާއި ފަތުރުވެރިންނަށް ޚިދުމަތްދޭ ތަންތަނާއި ބައްދަލުކޮށް ޓޫރިޒަމް މިނިސްޓްރީން މަޝްވަރާކުރެއެވެ.
ޓޫރިޒަމް މިނިސްޓްރީން ވިދާޅުވީ، އަތޮޅުތަކުގައި ލޯކަލް ޓޫރިޒަމް ފުޅާކުރުމަށް އެ މިނިސްޓްރީން ކުރަމުންދާ ދަތުރުތައް މިހާރު 9 އަތޮޅަކަށް ކޮށްފައިވާކަމަށެވެ. އެއީ ހއ، ހދ، ބ، ފ، މ، ދ، ޅ، ލ އަދި ވ އަތޮޅެވެ.
މި ދަތުރުތަކުގެ ތެރޭގައި އެ ރަށްތަކުގެ ގުދުރަތީ ތާރީޚީ އަދި ސަޤާފީ ޚާއްސަ ތަންތަނުގެ ފޮޓޯނެގުމަށްފަހު އައިލެންޑްސް.އެމްވީ ވެބްސައިޓްގައި ޝާއިޢުކުރުމަށް އެއްކުރެއެވެ. މި ބައްދަލުވުންތަކުގައި މައިގަނޑުގޮތެއްގައި މަޝްވަރާކުރަނީ ލާމަރުކަޒީ ނިޒާމަށް އެންމެ ފަހުން ގެނެވުނު އިސްލާހުތަކާއެކު ރަށްރަށުގައި ފަތުރުވެރިކަން ތަރައްޤީކުރުމަށް ކައުންސިލްތަކަށް ކުރެވިދާނެކަންކަމާއި، އެރަށެއްގައި ޓޫރިޒަމް ފުޅާކުރުމަށް ކައުންސިލުން ގެންގުޅޭ ވިސްނުންތަކާއި، ޓޫރިޒަމް މިނިސްޓްރީގެ އެހީތެރިކަން ބޭނުންވާ ދާއިރާތަކާ ގުޅޭގޮތުން ކަމަށް ޓޫރިޒަމް މިނިސްޓްރީން ވިދާޅުވެއެވެ.