ރާއްޖެއައި ފަތުރުވެރިންގެ އަދަދު އިތުރުވެ ފަތުރުވެރިކަމުގެ އައު ރެކޯޑެއް ހަދައިފިއެވެ. ކޯވިޑް-19 އަށްފަހު ރާއްޖޭގެ ބޯޑަރު ހުޅުވާލިފަހުން އިއްޔެ ވަނީ 7000 އަށްވުރެ ގިނަ ފަތުރުވެރިން ރާއްޖެ އައިސްފައެވެ.
ޓޫރިޒަމް މިނިސްޓްރީން ވިދާޅުވީ، ޑިސެމްބަރ 26 ވަނަ ދުވަހު ރާއްޖެއަށް 7،098 ފަތުރުވެރިން އައިސްފައިވާކަމަށެވެ. މިއީ ކޯވިޑަށްފަހު އެއްދުވަހެއްގެ ތެރޭގައި ރާއްޖެއަށް މިހާގިނަ ފަތުރުވެރިން އައި ފުރަތަމަ ދުވަހެވެ. މީގެކުރުން އެއްދުވަހެއްގައި ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ދުވަހުގެ ގޮތުގައި އޮތީ މިމަހުގެ 19 ވަނަ ދުވަހެވެ. އެދުވަހު ރާއްޖެއަށް 6955 ފަތުރުވެރިން ވަނީ އައިސްފައެވެ.
On 26th Dec Maldives registers a #NewRecord of tourist arrivals on a single day since reopening borders. Yes it's #SevenThousand plus with 7,098 tourists. Thanks and Congratulations to ALL for the engagement, contributions and support towards #Maldives tourism success story.
— Ministry of Tourism (@MoTmv) December 27, 2021
މި ޑިސެމްބަރ މަހު އެވްރެޖްކޮށް ދުވާލެއްގެ މައްޗަށް ރާއްޖެ އަންނަނީ 5،153 ފަތުރުވެރިންނެވެ. ނަމަވެސް މިހާރު މިވަނީ 7000 އަށްވުރެ ގިނަ ފަތުރުވެރިން ދުވާލެއްގެ މައްޗަށް ރާއްޖެ އަންނަން ފަށާފައެވެ.
ޓޫރިޒަމް މިނިސްޓްރީން ވިދާޅުވީ މިއަހަރު ރާއްޖެއައި ފަތުރުވެރިންގެ އަދަދު 1.3 މިލިއަނަށް މާދަމާ އަރާނެކަމަށެވެ. އިއްޔެގެ ނިޔަލަށް ރާއްޖެ އައިސްފައިވަނީ 1،294،492 ފަތުރުވެރިންނެވެ. އެހެންކަމުން 1.3 މިލިއަން ފަތުރުވެރިން ހަމަވުމަށް ދެން ރާއްޖެއިން ބޭނުންވަނީ 5508 ފަތުރުވެރިންނެވެ.
މިއީ ރާއްޖޭގެ ފަތުރުވެރިކަމުގެ ހައި ސީޒަންކަމުން ރާއްޖެ އަންނަ ފަތުރުވެރިންގެ އަދަދު އަހަރުގެ އެހެން ދުވަސްތަކާއި އަޅާބަލާއިރު ވަނީ ވަރަށް ބޮޑަށްވެސް އިތުރުވެފައެވެ.