2020 ވަނަ އަހަރު މުޅި ދުނިޔެއަށް ކުރިމަތިވި ކޯވިޑާއި ގުޅިގެން ދުނިޔޭގެ ފަތުރުވެރިކަމުގެ އެންމެ ބޮޑެތި ޤައުމުތަކަށްވެސް ޖެހުނީ އެ ޤައުމުތައް ފަތުރުވެރިންނަށް ބަންދުކުރާށެވެ. ކޯވިޑް ފަހަރަކު ބައްރަކަށް ވާސިލްވަމުންގޮސް މުޅި ދުނިޔެ އެއްކޮށް ބަންދުކޮށް ވައިގެ އުދުހުންތައް އެއްކޮށް ހުއްޓުމަކަށް އައެވެ.
ރާއްޖެއަކީވެސް ކޯވިޑްގެ އަސަރު ވަރަށް ހިތިކޮށް ތަޖުރިބާކުރަން ޖެހުނު ޤައުމެކެވެ. މުޅި އިޤްތިޞާދު އޮތީ ފަތުރުވެރިކަމަށް ބަރޯސާވެފައެވެ. އާބާދީގެ ގިނަ މީހުން މަސައްކަތްކުރަނީ ރިސޯޓްތަކުގައެވެ. ސީދާގޮތުން ރިސޯޓްތަކުގައި މަސައްކަތްނުކުރި ނަމަވެސް ގިނަ ބައެއްގެ ދިރިއުޅުން ނުސީދާކޮށް އޮތީ ފަތުރުވެރިކަމާއި ގުޅިފައެވެ.
ކޯވިޑްގެ ނުރައްކާ ބޮޑުވެ ސަރުކާރަށް ނަގަންޖެހުނު އެންމެ ދަތި އުނދަގޫ ފިޔަވަޅަކީ ރާއްޖޭގެ ބޯޑަރު ބަންދުކުރަންޖެހުމެވެ. ކޯވިޑް ފެތުރެން ފެށުމާއިއެކު 2020 ވަނަ އަހަރުގެ މާރޗް މަހުގެ 27 ގައި ރާއްޖޭގެ ބޯޑަރު ފަތުރުވެރިންނަށް ބަންދުކުރިއެވެ. މިއީ ހަމަގައިމުވެސް ރާއްޖޭގެ ފަތުރުވެރިކަމުގެ ދިގު މާޒީގައި ދެކުނު އެންމެ ހިތްދަތި ދުވަހަށް ވާނެއެވެ.
ރައްކާތެރިކަމުގެ ފިޔަވަޅުތަކާއިއެކު ރާއްޖެއިން އަލުން ފަތުރުވެރިންނަށް ބޯޑަރު ހުޅުވާލީ 2020 ވަނަ އަހަރުގެ ޖުލައި 15 ވަނަ ދުވަހުއެވެ. އެދުވަހުން ފެށިގެން މިއަދާއި ހަމައަށް ކޯވިޑްގެ މި އުނދަގޫ ހާލަތުގައިވެސް ރާއްޖެއިން އަންނަނީ ރައްކާތެރިކަމުގެ ފިޔަވަޅުތަކާއިއެކު މި ދަނޑިވަޅުގައިވެސް ފަތުރުވެރިކަން ކުރިއެރުވިދާނެކަން ދައްކައިދެމުންނެވެ. ކޯވިޑްގެ ސަބަބުން ޤައުމުތަކުގެ ބޯޑަރުތައް ފަތުރުވެރިންނަށް ބަންދުކޮށް ތިބެންނުޖެހޭކަމާއި އައު އާންމު ހާލަތާއިއެކު ފަތުރުވެރިންނަށް ދަތުރުފަތުރުކުރުމުގެ ފުރުސަތު ދޭންޖެހޭކަން މިއަންނަނީ ދައްކައިދެމުންނެވެ.
މިއަހަރު ރާއްޖެއަށް އައި ފަތުރުވެރިންގެ އަދަދު 1.3 މިލިއަނަށް މިހާރު ވަނީ އަރާފައެވެ. ރާއްޖެއަށް 1.3 މިލިއަން ވަނަ ފަތުރުވެރިޔާ އައުމާއި ގުޅިގެން އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ، ފަތުރުވެރިކަން ކުރިއަރާފައިވާ އެހެން ޤައުމުތައް ބަންދުކޮށްފައިވާއިރު ރާއްޖެއިން ރައްކާތެރިކަމުގެ ފިޔަވަޅުތަކާއެކު ފަތުރުވެރިކަން ކުރިއަރުވަމުން ދިއުމަކީ ބޮޑު ކާމިޔާބީއެއް ކަމަށެވެ. ނަމަވެސް މި ކާމިޔާބު ދެމެހެއްޓޭނީ ކޯވިޑް-19އަށް ރައްކާތެރިވުމަށް އަޅާފައިހުރި ފިޔަވަޅުތަކަށް ބޯލަންބައިގެން ކަމަށް ޠައްޔިބު ވިދާޅުވިއެވެ.
ދުނިޔޭގެ ފަތުރުވެރިންގެ މެދުގައި މަޤްބޫލު އެހެން ބައެއް މަންޒިލްތައް އަދިވެސް ވަނީ ފަތުރުވެރިންނަށް ހުޅުވާނުލައެވެ. ބައެއް މަންޒިލްތައް ފަތުރުވެރިންނަށް ހުޅުވާލުމަށްފަހު އަނެއްކާ ބަންދުކޮށްފައިވެސް އެބަހުއްޓެވެ. ނަމަވެސް ރާއްޖެއިން އަންނަނީ މިކަމުގައި މުޅި ދުނިޔެއަށް މިސާލު ދައްކަމުންނެވެ. މިއަދު މުޅި ދުނިޔޭންވެސް ރާއްޖެ ދެކެނީ ފަތުރުވެރިކަމުގައި ކާމިޔާބު މަންޒިލެއްގެ ގޮތުގައެވެ. ކޯވިޑްގެ ހާލަތުގައި ރާއްޖެއިން ފަތުރުވެރިކަމުގައި ހޯދި ކާމިޔާބީއަކީ މިއަދު މުޅި ދުނިޔެއިންވެސް ބަލައިގަންނަ ލާމަސީލު ނަމޫނާއަކަށް ވަނީ ވެފައެވެ.
2020 އަދި 2021 ވަނަ އަހަރު ރާއްޖެއިން ވަނީ ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލްގެ އެވޯޑްވެސް ހޯދާފައެވެ. އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށްވާއިރު ކުޑަގޮތަކަށް ފެށުނު ރާއްޖޭގެ ފަތުރުވެރިކަން މިއަދު ވަނީ ދުނިޔޭގެ އެންމެ އުހަށް ޖެހިލާފައެވެ. މިއަދު ރާއްޖެ އަންނަން ބޭނުންވާ ފަތުރުވެރިން މުޅި ދުނިޔޭގައިވެސް ގިނައެވެ. ރާއްޖެއަކީ އެމީހުންގެ "ޑްރީމް" ޑެސްޓިނޭޝަންއެވެ. ރާއްޖެ އާދެވުމުން އެނބުރި ޤައުމަށް ދާކަށް ބޭނުމެއްނުވެއެވެ. އަދި އަނބުރާ ރާއްޖެ އާދެވޭނެ ދުވަހަކަށް އިންތިޒާރުކުރެއެވެ.