މ.އަތޮޅު ދިއްގަރު މޫރިތިގޭގައި ފަތުރުވެރިންނަށް ޚިދުމަތްދޭން ފެށި ފެށުމާއެކު ރާއްޖޭގައި "ހޯމް ސްޓޭ" ޓޫރިޒަމް ތަޢާރަފްކޮށް ފަތުރުވެރިކަން އައު ހަރުފަތެއް ގިރާކޮށްފިއެވެ. މިއީ ރަސްމީކޮށް މުޅި އަލަށް ރާއްޖޭގައި ފެށި ފަތުރުވެރިކަމުގެ ބާވަތެކެވެ.
ދިއްގަރުގައި ބޭއްވި ކުލަގަދަ ރަސްމިއްޔާތެއްގައި "ހޯމް ސްޓޭ" ތަޢާފަރްކޮށްދެއްވީ މިނިސްޓަރ އޮފް ޓޫރިޒަމް ޑރ.ޢަބްދުﷲ މަޢުސޫމެވެ. މިކޮންސެޕްޓަށް އެންމެ ފުރަތަމަ ދިއްގަރުގައި "ހޯމް ސްޓޭ"ގެ ފުރުސަތު ހޯދާފައިވަނީ މޫރިތި ނަމަކަށްކިޔާ ގެއިންނެވެ. 3 ކޮޓަރީގެ މިގެ ހޯމް ސްޓޭއަށް ހުޅުވާލާފައި ވަނީ ޓޫރިޒަމް މިނިސްޓްރީއިން ކަނޑައަޅުއްވާފައިވާ ޚާއްސަ އުސޫލުތަކާއެކުގައެވެ. މިކަމަށްޓަކައި ދިއްގަރުގައި ބޭއްވި ރަސްމިއްޔާތުގައި ޓޫރިޒަމް މިނިސްޓަރ ޑރ.ޢަބްދުﷲ މައުސޫމްވަނީ މޫރިތި ގޭގެ ވެރިފަރާތާ، ހޯމް ސްޓޭގެ ލައިސަންސް ޙަވާލުކޮށްދެއްވާފައެވެ.
މޫރިތިގެއަށް އެންމެ ފުރަތަމަ ފަތުރުވެރިންގެ ގޮތުގައި ޒިޔާރަތްކޮށްފައިވަނީ ސޫދާނަށް ނިސްބަތްވާ ދެމަފިރިއަކާއި އެމެރިކާއަށް ނިސްބަތްވާ ދެފަތުރުވެރިއެކެވެ. އަދި އދ.އިން ރާއްޖެއަށް ކަނޑައަޅުއްވާފައި ހުންނަވާ ދާއިމީ މަންދޫބު، ކެތަރިން ހެސްވެލްއެވެ. މިފަތުރުވެރިންގެ ޓީމަށް ދިއްގަރުންވަނީ ވަރަށްހޫނު މަރުހަބާއެއް ކިޔާފައެވެ. މިތާރީޚީ މުނާސަބާ ފާހަގަކުރުމުގެގޮތުން މިފަތުރުވެރިންގެ ފިޔަވަޅު ވަނީ އެކަމަށް ޚާއްސަ ފްރޭމެއްގައި އަޅައި، ރައްކާކޮށްފައެވެ.
މިރައްމިސްޔާތުގައި ވާހަކަދައްކަވަމުން ދިއްގަރު ކައުންސިލްގެ ރައީސް އަޙްމަދު ނިޝާން ވިދާޅުވީ ރާއްޖޭގެ ފަޅާއި ފަރުތަކުން ނަފާ ލިބެމުންދިޔައީ މިހާތަނަށް ނިސްބަތުން މަދު ބަޔަކަށްކަމަށެވެ. އެހެންނަމަވެސް މިއަދު ތަޢާރަފްވެގެން މިދިޔަ "ހޯމް ސްޓޭ" ކޮންސެޕްޓާއެކު ފަޅުތަކާއި ފަރުތަކުން ނަފާ ހޯދުމުގެ ފުރުސަތު ކޮންމެ ދިވެއްސަކަށް ފަހިވެގެން ގޮސްފައިވާކަމަށެވެ.
ހޯމް ސްޓޭއަށް އެންމެ ފުރަތަމަ ޒިޔާރަތްކުރި ފަތުރުވެރިންނަށް ދިއްގަރުންކީ ހޫނު މަރުޙަބާއާއި ލިބުނު މެޙުމާންދާރީއަށްޓަކާ ފަތުރުވެރިން ތިބީ ވަރަށް އުފަލުންނެވެ. ފަތުރުވެރިންވަނީ މިކުރެވުނު ތަޖުރިބާއާ ގުޅޭތުން އެމީހުންގެ ޝުޢޫރު ޕީއެސްއެމް ނިއުސްއާ ހިއްސާކޮށްފައެވެ.
މިއަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ ރަންޔޫބީލް އަހަރެވެ. މިމުނާސަބަތާ ދިމާކޮށް ރާއްޖޭގައި އަލަށް ފެށި "ހޯމް ސްޓޭ" ޓޫރިޒަމް ކޮންސެޕްޓަކީ ރާއްޖޭގެ ފަތުރުވެރިކަމުގެ ސިނާޢަތް އިތުރު ހަރުފަތަކަށް ގެންގޮސްދޭނެ ކޮންސެޕްޓެއްކަމަށް ޓޫރިޒަމް މިނިސްޓްރީން ވިދާޅުވެއެވެ.
ޓޫރިޒަމް މިނިސްޓްރީއިން ވިދާޅުވީ ހޯމް ސްޓޭ ތަޢާރަފްކުރަނީ ފަތުރުވެރިކަމުގެ ވިޔަފާރިއަށް ވަންނަން ބޭނުންވާ ދިވެހިންނަށް ފަހި ފުރުސަތުތަކެއް ހޯދައިދިނުމަށް ކަމަށެވެ. އަދި މިއާއެކު ފަތުރުވެރިކަމުގެ ސިނާޢަތުގެ ސީދާ ނަފާ ގޭބިސީތަކާ ހަމައަށް ލިބޭނެ މަގު މިއާއެކު ފަހިވެގެންދާނެކަމަށް އެމިނިސްޓްރީއިން ވިދާޅުވެއެވެ.