ޓެސްލާއަށް މިދިޔަ އަހަރުގެ ފަހު ކުއާޓަރުގައި 17.72 ބިލިއަން ޑޮލަރުގެ ޢާމްދަނީއެއް ލިބިއްޖެއެވެ.
2020ވަނަ އަހަރުގެ ފަހު ކުއާޓަރުގައި އެކުންފުންޏަށް ލިބިފައިވަނީ 10.74 ބިލިއަން ޑޮލަރުގެ ޢާމްދަނީއެކެވެ. މިދިޔަ އަހަރުގެ ފަހު ކުއާޓަރުގައި ޓެސްލާއަށް ލިބުނު ޢާމްދަނީއަކީ އެކުއާޓަރުގައި ލިބޭނެކަމަށް އަންދާޒާ ކުރި ޢަދަދަށްވުރެ އިތުރު ޢަދަދެކެވެ.
އެމެރިކާގެ އިލެކްޓްރިކް ވެހިކަލް އުފައްދާ ކުންފުނި ޓެސްލާއިންވަނީ ކާރު އުފެއްދުމަށް ބޭނުންވާ ޗިޕު ލިބުމުގައި ދަތިތަކާއި ކުރިމަތިލާން ޖެހުނު ނަމަވެސް، މިދިޔަ އަހަރުގެ ފަހު ކުއާޓަރުގެ ތެރޭގައި ރެކޯޑު ޢަދަދަކަށް ކާރު އުފައްދާފައެވެ.
ޓެސްލާއިން މިފަހުންވަނީ އެމެރިކާގެ އޮސްޓިން އަދި ޓެކްސަސްގައި ފެކްޓްރީތަކެއް ޤާއިމްކޮށްފައެވެ. މި ދެ ފެކްޓްރީގައި ކާރު އުފެއްދުމުގެ މަސައްކަތް މިހާރުވަނީ ފެށިފައެވެ. މި ފެކްޓްރީތަކުގައި އުފައްދަކީ ޓެސްލާގެ "މޮޑެލް ވައި"ކާރުތަކެވެ.
މިދިޔަ އަހަރުތެރޭ ޓެސްލާއިންވަނީ 936000 އިލެކްޓްރިކް ކާރު ވިއްކާފައެވެ. މިއީ އިލެކްޓްރިކް ކާރު އުފެއްދުމުގައި ޓެސްލާއާއި އެންމެ ވާދަވެރި ކުންފުނިކަމުގައިވާ ވޯކްސްވާގަންއިން މި މުއްދަތުގައި ވިއްކާފައިވާ ކާރުގެ ޢާދަދާއި އަޅާބަލާއިރު ގާތްގަނޑަކަށް ދެގުނަ އިތުރު ޢަދަދެކެވެ.