އެމްއެމްޕީއާރުސީން ޔޫރަޕް މާކެޓްގައި ރާއްޖެ އިސްތިހާރުކުރުމަށް ރިސޯޓް ލައިފް ޓްރެވަލްސްއާއެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން ޔޫރަޕްގެ މާކެޓްތައް ކަމަށްވާ ރަޝިއާ، ސީއައިއެސް، އަދި އިރުމަތީ ޔޫރަޕްގައި ރާއްޖެ އިސްތިހާތުކުރާނެއެވެ.
މި އެއްބަސްވުމުގައި އެމްއެމްޕީއާރުސީގެ ފަރާތުން ސޮއިކުރެއްވީ، އެކޯޕަރޭޝަންގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރ ޠައްޔިބު މުހައްމަދެވެ. އަދި ރިސޯޓް ލައިފް ޓްރެވަލްގެ ފަރާތުން ސޮއިކުރެއްވީ އެކުންފުނީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު މުހައްމަދު ޝާޒެވެ.
ރިސޯޓް ލައިފް ޓްރެވަލް ޕްރައިވެޓް ލިމިޓެޑް (އާރުއެލްޓީ) އަކީ 2006ވަނަ އަހަރުން ފެށިގެން ދުނިޔޭގެ ފެންވަރުގައި ރާއްޖެ ޕްރޮމޯޓްކުރުމުގައި ހަރަކާތްތެރިވަމުން އަންނަ ޓުއަރ އޮޕަރޭޓަރެވެ. މިއީ ފަތުރުވެރިކަމުގެ ދާއިރާގައި 15 އަހަރުގެ ތަޖުރިބާ ލިބިފައިވާ ކުންފުންޏެކެވެ. އާރުއެލްޓީއިން ދަނީ ރާއްޖޭގެ ފަތުރުވެރިކަމުގެ ޚިދުމަތްދޭ ގިނަ ބްރޭންޑްތަކާ ގުޅިގެން ހަރަކާތްތައް ހިންގަމުންނެވެ.
މި އެއްބަސްވުމުގެ ދަށުން އާރުއެލްޓީއިން ރަޝިޔާ، ސީއައިއެސް، އަދި އިރުމައްޗާއި މެދުތެރޭ ޔޫރަޕްގެ މާކެޓްތަކުގައި ބައިވެރިވާ ހުރިހާ އިވެންޓްތަކާއި، ޕްރޮމޯޝަންތަކުގައި އެމްއެމްޕީއާރުސީގެ ބްރޭންޑިންގ، ނަން، އަދި ލޯގޯ ބޭނުންކުރާނެއެވެ. މި އެއްބަސްވުމުގައި ސޮއެކޮށްފައިވަނީ ރާއްޖެއަކީ ފަތުރުވެރިން ދަތުރުކުރުމަށް އެންމެ ޝައުގުވެރިވާ މަންޒިލްގެ ގޮތުގައި ދަމަހައްޓައި ދުނިޔޭގެ ފެންވަރުގައި ބްރޭންޑް ވިޒިބިލިޓީ އިތުރުކުރުމަށެވެ.
މި ޕާޓްނަޝިޕާ ބެހޭގޮތުން ވާހަކަ ދައްކަވަމުން އެމްއެމްޕީއާރުސީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު ޠައްޔިބު މުހައްމަދު ވިދާޅުވީ ރިސޯޓް ލައިފާއެކު ސޮއެކުރެވުނު އެއްބަސްވުމުގެ ދަށުން ކުރެވޭ މަސައްކަތަކީ އެހެން ފަރާތްތަކަށް ރަނގަޅު ނަމޫނާއަކަށް ވާނެ ކަމަށް އުންމީދު ކުރައްވާ ކަމަށެވެ. އަދި މިއީ ލޯކަލް ޓުއަރ އޮޕަރޭޓަރުންނާއެކު އެމްއެމްޕީއާރުސީން ކުރާ މަސައްކަތް އިތުރަށް ފުޅާކުރުމަށް ލިބޭ ފުރުސަތެއްގެ ގޮތުގައި ޠައްޔިބު ވަނީ ސިފަކުރައްވާފައެވެ. މިގޮތުން ކޯވިޑް-19 ގެ ތެރޭގައި އަދި ކޯވިޑަށް ފަހުވެސް ރާއްޖެ އިސްތިހާރުކޮށް ޕްރޮމޯޓްކުރުމަށް އަމިއްލަ ކުންފުނިތައް ފާހަގަކޮށްލެވޭ މަސައްކަތްތަކެއް ކޮށްފައިވާކަން އޭނާ ފާހަގަކުރެއްވިއެވެ.