ގާތްގަނޑަކަށް ދެ ކިލޯ މީޓަރުގެ މި ކުޑަކުޑަ މާލޭގެ މަގުތައް ދުވާލާއި ރޭގަނޑު ފެންނަނީ ދުއްވާ ތަކެތިން ތޮއްޖެހި ފުރި ބާރުވެފައިވާތީއެވެ. މާލޭގެ އަބާދީގައި އެއްސަތޭކަ ފަންސާސް ތިންހާހަށްވުރެ ގިނަ މީހުން އުޅެމުންދާއިރު، އެ އަދަދުގެ ތިންބައިކޮށްފައި އެއްބަޔާއި އެއްވަރަށް މާލޭގެ މަގުތަކުގައި އުޅަނދު ދުއްވަމުން ގެންދެއެވެ.މާލޭގައި ދުއްވާ އެއްގަމު އުޅަނދުގެ ތަފާސްހިސާބަށް ބަލާއިރު ހަމައެކަނި މާލޭގައި 57626 އެއްގަމު އުޅަނދު ރަޖިސްޓްރީކޮށް ދުއްވަމުންދެއެވެ. މީގެތެރޭގައި 20 އަހަރުވެފައިވާ 973 ވެހިކަލް އޮތްއިރު ދުއްވާތާ 15 އަހަރަށްވުރެ ގިނަދުވަސްވެފައިވާ 4818 އުޅަނދު އޮތްކަމަށް ތަފާސްހިސާބުތަކުން ދައްކައެވެ. އަދި 10 އަހަރާއި، 15 އަހަރާ ދެމެދުގެ މުއްދަތެއް ވެފައިވާ 10376 ވެހިކަލް ރަޖިސްޓްރީކޮށްފައިވެއެވެ. 5 އަހަރާއި 10 އަހަރުގެ ސަތާރަހާހަށްވުރެ ގިނަ ވެހިކަލް ދުއްވަމުންދާއިރު 5 އަހަރުވީ އެއްގަމު އުޅަނދުގެ އަދަދު 23 ހާހަށްވުރެ މަތިކަމަށް ތަފާސްހިސާބުން ދައްކައެވެ.މާލޭގައި ދުއްވާ އެއްގަމު އުޅަނދު މަދުކުރެއްވުމަށް ސަރުކާރުން ކަމާގުޅުން ހުރި މުއައްސަސާތަކާއެކު މަޝްވަރާތައް ކުރައްވައި، މިހާރު ވަނީ ސިޔާސަތެއް ކަނޑައަޅުއްވާފައެވެ. އަދި އެ ސިޔާސަތު އިޢުލާންކުރެއްވުމަށް މިހާރު ވަނީ ވަގުތުކުޑަތަންވެފައެވެ. ސަރުކާރުން ކަނޑައެޅުއްވި ސިޔާސަތަކީ ރާއްޖެއަށް އަލަށް އެތެރެކުރެވޭ ދެފުރޮޅުލީ އެއްގަމު އުޅަނދާއި، ހަތަރުފުރޮޅުލީ އެއްގަމު އުޅަނދު ދުއްވޭނެ ޢުމުރު ކަނޑައެޅުއްވުމެވެ. މިގޮތުން ރާއްޖެއަށް އަލަށް އެތެރެކުރެވޭ ކާރާއި ސައިކަލް ރާއްޖޭގައި ދުއްވޭނެ އެންމެ ދިގު މުއްދަތަކީ 15 އަހަރު ކަމަށް ޓްރާންސްޕޯޓް އޮތޯރިޓީން މިވަނީ ނިންމަވާފައެވެ. އަދި އެކަން ވަރަށް އަވަހަށް އިޢުލާން ކުރުމަށްވެސް އެ އޮތޯރިޓީން ދަނީ ތައްޔާރުވަމުންނެވެ. އަދި އަލަށް ރަޖިސްޓްރީކުރާ އުޅަނދު ރަޖިސްޓްރީކޮށްގެން ދުއްވާތާ 15 އަހަރު ވުމަށްފަހު ރާއްޖޭގެ އެއްވެސް ތަނެއްގައި ނުދުއްވޭނެކަމަށް ޓްރާންޕޯޓް އޮތޯރިތީން ވަނީ ނިންމަވާފައެވެ. މިއާ ޚިލާފަށް އެހެން ޤައުމެއްގައި ބޭނުކޮށްފައިވާ އުޅަނދެއް ރާއްޖެ ގެނެސް ރަޖިސްޓްރީ ކޮށްގެން ދުއްވާނަމަ އެ އުޅަނދެއް ދުއްވޭނެ އެންމެ ދިގު މުއްދަތަކީ 10 އަހަރުކަމަށްވެސް ޓްރާންސްޕޯޓް އޮތޯރިޓީން މިވަނީ ނިންމަވާފައެވެ.ޓްރާންސްޕޯޓް އޮތޯރިޓީގެ ޗެއަރމަން ޢަބްދުއްރަޝީދު ނާފިޒު ވިދާޅުވީ މިކަން ތަންފީޒުކުރައްވަން ފަށްޓަވާނީ އަންނަ މާޗުމަހުގެ އެއްވަނަ ދުވަހުކަމަށެވެ. އަދި އަލަށް ރަޖިސްޓްރީކުރެވޭ އުޅަނދުފަހަރަށް މިއުޞޫލު ހަމަޖެހިގެންދާއިރު ކުރިން ރަޖިސްޓްރީކޮށްފައިވާ އުޅަނދުތައް މި އުޞޫލުގެ ތެރޭގައި ނުހިމެނޭނެކަމަށެވެ.ރާއްޖޭގައި މީގެކުރިން ހަމަޖެހިފައި އޮންނަ އުޞޫލުން އެއްގަނމު އުޅަނދުތަކަށް ދުއްވުމުގެ ޢުމުރު ކަނޑައެޅިފައިވަނީ ޓެކްސީތަކަށް އެކަންޏެވެ. އެއީ ރަޖިސްޓްރީކޮށްގެން 25 އަހަރު ދުއްވޭގޮތަށެވެ. ކުރިޔަށް އޮތްތާނގައިވެސް ޓެކްސީތަކަށް އޮންނާނީ ހަމަ އެ އުޞޫލުކަމަށް ޓްރާންސްޕޯޓް އޮތޯރިޓީން ހާމަކުރައްވައެވެ. ރާއްޖެއަށް އެއްގަމު އުޅަނދެއް އެތެރެކުރެވޭނީ ހަތަރުފުރޮޅުލީ އުޅަނދެއްނަމަ އުފެއްދި ތާރީޚުން ފެށިގެން 5 އަހަރު ނުވާ ނަމައެވެ. އަދި ސައިކަލްނަމަ އެތެރެކުރެވެނީ އަލަށް އެއްވެސް ވަރަކަށް ބޭނުންނުކޮށް ހުންނަ ސައިކަލެވެ.