މިއަހަރަށް ރާއްޖެއިން ކަނޑައެޅި އަމާޒުކަމަށްވާ 1.6 މިލިއަންވަނަ ފަތުރުވެރިންގެ އަމާޒު ހާސިލްވެއްޖެއެވެ.
ރާއްޖެއަށް އައި 1.6 މިލިއަންވަނަ ފަތުރުވެރިޔާއަށް ވެލާނާ އިންޓަރނޭޝަނަލް އެއަރޕޯޓުންވަނީ ހޫނު މަރުހަބާއެއް ކިޔާފައެވެ. ރާއްޖެއަށް އައި 1.6 މިލިއަންވަނަ ފަތުރުވެރިއާއަކީ އިންޑިއާގެ ރައްޔިތެއް ކަމަށްވާ ސަންޖޭ ތޭޖަސް ކޮތަރީއެވެ.
ދިވެހި ސަޤާފީ ބޮޑުބެރުގެ ހަރަކާތްތަކާއިއެކު 1.6 މިލިއަންވަނަ ފަތުރުވެރިއާއަށް މަރުހަބާ ކިޔުމަށް ވެލާނާ އިންޓަރނޭޝަނަލް އެއަރޕޯޓުގައި ބޭއްވި ހަރަކާތުގައި ނާއިބު ރައީސް ފައިޞަލް ނަސީމާއި، ޓޫރިޒަމް މިނިސްޓަރ ޑރ. އަބްދުﷲ މައުސޫމާއި، މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުހައްމަދު ބައިވެރިވެވަޑައިގެންނެވިއެވެ.
ރާއްޖޭގެ ފަތުރުވެރިކަން ދުނިޔެއަށް އިޝްތިހާރުކޮށް ރާއްޖެއަށް އަންނަ ފަތުރުވެރިންގެ އަދަދުތައް އިތުރުކުރުމަށް، އެމްއެމްޕީއާރުސީއާއި މި ސިނާއަތުގައި މަސައްކަތްކުރާ ފަރާތްތަކުން ދަނީ ގިނަ މަސައްކަތްތަކެއް ކުރަމުންނެވެ. މި މަސައްކަތްތަކާއި އެކު ރާއްޖެއިންވަނީ ވިދިވިދިގެން 3 އަހަރު "ވޯލްޑް ލީޑިންގ ޑެސްޓިނޭޝަން"ގެ އެވޯޑް ހާސިލްކޮށްފައެވެ.
އެމްއެމްޕީއާރުސީން ވަނީ ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކުރުމަށް މިއަހަރު 24 މާކެޓެއްގައި 150 އަށްވުރެ ގިނަ ހަރަކާތް ހިންގާފައެވެ.