ފަތުރުވެރިކަމަށް މިދިޔަ އަހަރުތެރޭ އިތުރު 6497 އެނދު ނެރެފައިވާ ކަމަށް ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިދިޔަ އަހަރު ނިމުނުއިރު، ފަތުރުވެރިކަމަށްވަނީ ޖުމްލަ 59657 އެނދު ނެރެފައެވެ. 2021ވަނަ އަހަރު ނިމުނު އިރު މި އަދަދު ހުރީ 53160 އެނދުގައެވެ. އެހެންކަމުން މިދިޔަ އަހަރުތެރޭ އޮޕަރޭޝަނަށް ގެނެސްފައިވާ ފަތުރުވެރިކަމުގެ އެނދުގެ އަދަދުވަނީ 12.2 އިންސައްތަ އިތުރުވެފައެވެ.
ފަތުރުވެރިކަމަށް ނެރެފައިވާ އެނދުގެ އަދަދު 59657 އަރާފައިވާއިރު، މިއީ 1208 ފެސިލިޓީއަކުން ފަތުރުވެރިކަމަށް ނެރެފައިވާ އެނދެވެ.
ފަތުރުވެރިކަމުގެ ފެސިލިޓީތަކުން ނެރެފައިވާ އެނދުގެ އަދަދުތަކަށް ބަލާއިރު،
* 168 ރިސޯޓަކުން 41081 އެނދު
* 865 ގެސްޓުހައުސްއަކުން 13992 އެނދު
* 4 ހޯމް ސްޓޭއަކުން 26 އެނދު
* 158 ސަފާރީއަކުން 2918 އެނދު
* 13 ހޮޓަލުން 1640 އެނދު
ފަތުރުވެރިކަމަށް ނެރެފައިވާ އެނދުގެ އަދަދަށް ބޮޑު ކުރިއެރުމެއް ލިބިފައިވާއިރު، ފަތުރުވެރިކަމަށް ރަޖިސްޓްރީކޮށް، އޮޕަރޭޝަނަށް ގެނައުމަށް ތައްޔާރުވަމުންދާ އެނދުގެ އަދަދުވަނީ 60553 އަށް އަރާފައެވެ. މި އަދަދު 2021ވަނަ އަަހަރު ނިމުނުއިރު ހުރީ 57103ގައެވެ.
ފަތުރުވެރިކަމުގެ އެނދުގެ އަދަދުތައް އިތުރުކުރުމަށް ސަރުކާރުންދަނީ އިންވެސްޓަރުންނަށް ފަހި މާހައުލެއް ރާއްޖޭގައި ގާއިމްކުރުމަށް ގިނަ މަސައްކަތްތަކެއް ކުރަމުންނެވެ. މިކަމުގެ ހެޔޮ ނަތީޖާ އޮޕަރޭޝަނަށް ނެރޭ ފަތުރުވެރިކަމުގެ އެނދުގެ އަދަދުންވެސް ހާމަވެއެވެ.
ރާއްޖެއިން ފަތުރުވެރިކަމަށް ނެރެފައިވާ އެނދުގެ އަދަދު އިތުރުވެފައިވާއިރު، ރާއްޖެއަށް އަންނަ ފަތުރުވެރިންގެ އަދަދަށްވެސް ދަނީ ކުރިއެރުން ލިބެމުންނެވެ. ތަފާސްހިސާބުތައް ދައްކާގޮތުން މިދިޔަ އަހަރު ނިމުނު އިރު ރާއްޖެއަށް 1،675،299 (އެއް މިލިއަން ހަލައްކަ ހަތްދިހަ ފަސްހާސް ދުއިސައްތަ ނުވަދިހަ ނުވަ) ފަތުރުވެރިން ވަނީ ޒިޔާރަތްކޮށްފައެވެ. މިއީ ކޯވިޑަށްފަހު މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި އަހަރެވެ.
ސަރުކާރުން 2022 ވަނަ އަހަރު ރާއްޖެއަށް ގެނައުމަށް އަމާޒުހިފީ 1.6 މިލިއަން ފަތުރުވެރިންނެވެ. މި އަމާޒު ވަނީ ޑިސެމްބަރ މަހުގެ 20 ވަނަ ދުވަހު ހާސިލްވެފައެވެ. އަދި މިފެށުނު 2023 ވަނަ އަހަރަށް ސަރުކާރުން އަމާޒުހިފާފައިވަނީ 1.8 މިލިއަން ފަތުރުވެރިން ގެނެސް ފަތުރުވެރިކަމުގެ ރެކޯޑެއް ހެދުމަށެވެ.