އުރީދޫ މޯލްޑިވްސްއަށް މިދިޔަ އަހަރުގެ ފަހު ކުއާޓަރުގައި 500.5 މިލިއަން ރުފިޔާގެ އާމްދަނީއެއް ލިބިއްޖެއެވެ.
އުރީދޫ މޯލްޑިވްސްއިން ޢަންމުކޮށްފައިވާ މިދިޔަ އަހަރުގެ 4ވަނަ ކުއާޓަރުގެ މާލީ ހިސާބުތައް ދައްކާގޮތުން އެ ކުއާޓަރުގައި އާމްދަނީގެ ގޮތުގައި ލިބިފައިވަނީ، މިދިޔަ އަހަރުގެ 3ވަނަ ކުއާޓަރުގައި ލިބުނު 471 މިލިއަން ރުފިޔާގެ އާމްދަނީއާއި އަޅާ ބަލާއިރު 6.2 އިންސައްތައިގެ އިތުރު ޢަދަދެކެވެ.
މުވާސަލާތީ ކުންފުނި، އުރީދޫއިން އާމްދަނީ ހޯދަނީ މައިގަނޑު 2 ދާއިރާއަކުންނެވެ. އެއީ މޯބައިލް ޚިދުމަތްތަކާއި، ފިކްސްޑް ބްރޯޑް ބޭންޑް އެންޓަޕްރައިޒް ވިޔަފާރިތައް މެދުވެރިކޮށެވެ. މާލީ ރިޕޯޓުގައިވާގޮތުން އެކުންފުންޏަށް މޯބައިލް ޚިދުމަތްތަކުންވަނީ 386 މިލިއަން ރުފިޔާގެ ޢާމްދަނީއެއް ލިބިފައެވެ. މިދިޔަ އަހަރުގެ ތިންވަނަ ކުއާޓަރުގައި މޯބައިލް ޚިދުމަތްތަކުން ލިބިފައިވަނީ 363 މިލިއަން ރުފިޔާއެވެ.
ފިކްސް ބްރޯޑްބޭންޑު ޚިދުމަތުން ލިބުނު އާމްދަނީއަށްވެސް 4 ވަނަ ކުއާޓަރގައިވަނީ ކުރިއެރުން ލިބިފައެވެ. ތަފާސްހިސާބުތައް ދައްކާގޮތުން 4 ވަނަ ކުއާޓަރުގައި ފިކްސްޑު ބްރޯޑްބޭންޑު ޚިދުމަތްތަކުން 113 މިލިއަން ރުފިޔާ ލިބިފައިވެއެވެ. ތިންވަނަ ކުއާޓަރުގައި ފިކްސް ބްރޯޑްބޭންޑް އާމްދަނީގެ ގޮތުގައި އުރީދޫއަށް ލިބިފައިވަނީ 107 މިލިއަން ރުފިޔާއެވެ.
ތަފާސްހިސާބުތައް ދައްކާގޮތުން 4ވަނަ ކުއާޓަރުގައި ކުންފުނި ހިންގުމަށް 261 މިލިއަން ރުފިޔާވަނީ ޚަރަދުކޮށްފައެވެ.
އަދި ޓެކުހަށް ކެނޑުމަށްފަހު ފައިދާގެ ގޮތުގައި އުރީދޫއަށް 143 މިލިއަން ރުފިޔާ ލިބިފައެވެ. މި ޢަދަދަކީ މިދިޔަ އަހަރުގެ 3 ވަނަ ކުއާޓަރުގައި ފައިދާގެ ގޮތުގައި ލިބުނު 127 މިލިއަން ރުފިޔާއާއި އަޅާ ބަލާއިރު 12.9 އިންސައްތަ އިތުރު ޢަދަދެކެވެ.
އުރީދޫ މޯލްޑިވްސްއަކީ 2005 ވަނަ އަހަރު ރާއްޖޭގައި ޓެލެކޮމިއުނިކޭޝަންގެ ޚިދުމަތްދޭން ފެށި ކުންފުންޏެކެވެ. އެކުންފުނީގެ 9.5 އިންސައްތަ ޙިއްސާ އާއްމުންނަށް ދީފައިވާއިރު، ބާކީ 90.5 އިންސައްތަ ހިއްސާއަކީ ޤަތަރުގެ ވަތަނިއްޔާ އިންޓަނޭޝަނަލްގެ ޙިއްސާއެވެ.